Aalisarnermut inatsit nutaaq: Pingajussaaneerinninnermi sakkortuumik oqallinneq ingerlaannarpoq

Siunnersuutip pingajussaaneerneqarnerani aalisarnermut inatsisissatut siunnersuut suli uummaarissumik oqallisigineqarpoq.

Siumup oqaaseqartuata Karl Tobiassenip Siumup siunnersuut tamakkiisumik tapersersoraa pingajussaanerinninnermi erseqqissaatigaa

Naalakkersuisooqatigiit Inuit Ataqatigiit Siumullu aalisarnermut inatsisissatut siunnersuummik tapersersuinertik aalajangiusimavaat. Sisamanngornermi Inatsisartuni pingajussaaneerinninnermi tamanna paasinarsivoq.

Sisamanngornermi suliarinninneq Inatsisartut Siulittaasuata Mimi Karlsenip (IA) ilaatigut torersumik oqallinnissamik qinnuiginnittup naveersineranik aallarnerneqarpoq. 

Siulittaasup erseqqissumik Kalaallit Nunaanni inussiaateqartoqarneranik oqaaseqartoqassannginnera erseqqissaatigaa. Naveersineq Doris J. Jensenip aappassaaneerinninnermi oqaaseqarnerata kingorna pivoq.

Mimi Karlsenip aallarniinerata kingorna Aalisarnermut Naalakkersuisoq Kim Kielsen (S), ataatsimiititaliap suliaqarsimanera, inatsisissatullu siunnersuummik tapersiinera qujassutigaa.

Suliffinnik kinguneqaatissat pillugit oqallinneq

Kingorna Aalisarnermut, Piniarnermut Nunalerinermullu Ataatsimiititaliap siulittaasua Kristian Jeremiassen (IA) oqaluttarfimmut qaqivoq, IA-lu sinnerlugu partiip inatsisissamik iluarisimaarinninnera oqaatigalugu:

- Pisuussutitta kalaallinit pigineqalernerat pingaarnerpaajuvoq. Siunissaq eqqarsaatigisussaavarput, ineriartornissamullu immitsinnut sapijaassuseqalersilluta. Inatsit aalisartunut pitsaasunik sinaakkusiivoq, ilaatigut Jeremiassen taama oqarpoq.

Illuatungiliuttut ilaatigut fabrikkini suliffissaqartitsinermi aalisartullu amerlassusaannut siunnersuutip kinguneqaatissaanut atatillugu oqaaseqartartumut sakkortuuliorput. Assersuutigalugu inatsit pisassanik annerpaaffiliinermigut Polar Seafoodip Aasianni tunisassiorfiutaanik matusinermik kinguneqassasoq, ingerlatseqatigiiffik oqaaseqarsimavoq, matumanili tunisassiorfiup ammatiinnarneqarnissaa pillugu Naalakkersuisunut suliakkiisimaneq, Jeremiassenip pingaartutut oqaatigaa.

Karl Tobiassen aalajangiusimannippoq

Taamattaaq Siumup oqaaseqartuata Karl Tobiassenip inatsisissatut siunnersuummik iluarisimaarinnilluni oqaluttarfimmit oqaatigaa.

- Nutaamik eqqarsarneq inatsisikkut pilersussaq aalisartut soqutigigaat qularutiginngilara, taama ilaatigut Tobiassen oqaluttarfimmit oqarpoq.

Taamattaarlu aamma Karl Tobiassen illuatungiliuttunit apeqqutinik isorinnittunik amerlasuunik apeqquteqarfigineqarpoq. Ilaatigut suliffeqarfinnut namminersortunut, Royal Greenlandimut kiisalu aalisarnermi aalisartut amerlassusaannut pitsaanngitsumik kinguneqaateqartoqarsinnaaneranik aperineqarpoq.

- Inatsisip matuma naleqquttuunnginneranik aalisartut isumaqarnerat arajutsigassiuk? Jens-Frederik Nielsen (D) aperaaq.

Inatsit nutaaq aalisartunut iluaqutsiillunilu iluanaarfiussasoq, aalisartullu ataasiakkaat qanoq amerlatigisunik pisassaateqarsinnaanerata qummut killilerneqarnissaanik Karl Tobiassen akivoq.

Suliffeqarfiit nukittunerusut kissaatigineqartut

Pisassanik niuerutigineqarsinnaasunik peqalernissamik periarfissaqalersitsinerup qanoq sinerissap qanittuani aalisartunut nunaqarfinnullu kinguneqarsinnaanera oqallinnermi qitiuvoq.

Aalisartut inatsit nutaaq aqqutigalugu immikkut aalisagassanik pisassinneqarsinnaaneq toqqarsinnaalissavaat, taakkuli aamma tunineqarsinnaasuussapput.

Ilaatigut aaqqissuussinerup sinerissap qanittuani aalisarnerup inunnit ikittunit ingerlanneqalersinnaanera, kommuninilu innuttaasunut pilersuinermik ingerlatsisutut toqqammavigineqartut annikillinerannik kinguneqarsinnaanera Avannaata Kommuniata annertuumik aarleqqutigaa.

Polar Seafoodimut pisassanik pinngitsaalisaalluni tuniniaalersussamut tunngatillugu Karl Tobiasseni ima oqarpoq:

- Suliffeqarfimmut ataatsimut pisassat appassavagut. Taakku ingerlalluarnissamut suli toqqammavissaqarluarput, pisassammi 20 procentii suli pigisussaavaat – suliffeqarfiimmi allat pisassaqassannginnamik? Suliffeqarfinnik namminersortunik nukittuunik pilersitsinissaq annertuumik soqutigisaraarput, Karl Tobiassen oqarpoq, taassumalu ikaarsaarnermi ukiunik qulinik periarfissiineq innersuussutigaa, taamaammallu inatsimmut nutaamut nalimmassarnissamut piffissaqarluarnerarlugu.

Allaaserisap allannerata nalaani suli oqallittoqarpoq, maannakkuugallartorli naalakkersuisooqatigiit inatsimmik tapersiinerat sunnguamilluunniit aalassanngilaq.

Powered by Labrador CMS