Naalakkersuisooqatigiilersut nutaat Demokraatit, Inuit Ataqatigiit, Siumut aamma Atassut saqqummiunneqarneranniik qaammat ataaseq sinnilaarlugu qaangiutereeraluartoq, Aalisarnermut, Piniarnermut, Nunalerinermut Imminut Pilersornermullu Naalakkersuisunngortup, Peter Borgep, Demokraatit, aalisarnermi politikkikkut anguniakkat pillugit aalisarnermut kattuffinnik suli ataatsimeeqateqannginnera, Kalaallit Nunaani Aalisartut Piniartullu Kattuffiata KNAPK-p, Qalerualiunniat Aalisagarniallu Kattuffiata QAK-p kiisalu Sinerissap Qanittuani Aalisartullu Kattuffiata SQAPK-p paasiuminaatsippaat. Piaartumillu tamanna pisariaqartoq taakku isumaqarput.
Politikkikkut anguniakkat saqqummiunneqartariaqartut
Naalakkersuisooqatigiilersut nutaat Demokraatit, Inuit Ataqatigiit, Siumut aamma Atassut saqqummiunneqarneranniik qaammat ataaseq sinnilaarlugu qaangiutereeraluartoq, Aalisarnermut, Piniarnermut, Nunalerinermut Imminut Pilersornermullu Naalakkersuisunngortup, Peter Borgep, Demokraatit, aalisarnermi politikkikkut anguniakkat pillugit aalisarnermut kattuffinnik suli ataatsimeeqateqannginnera, Kalaallit Nunaani Aalisartut Piniartullu Kattuffiata KNAPK-p, Qalerualiunniat Aalisagarniallu Kattuffiata QAK-p kiisalu Sinerissap Qanittuani Aalisartullu Kattuffiata SQAPK-p paasiuminaatsippaat. Piaartumillu tamanna pisariaqartoq taakku isumaqarput.
Politikkikkut anguniakkat saqqummiunneqartariaqartut
Naalakkersuisut ivertinneqarnerisa kingorna Aalisarnermut Naalakkersuisoq nutaaq Peter Borg KNAPK-miit ataatsimeeqatiserineqarsimasoq, maannakkumulli suli tamanna pisimanngitsoq, KNAPK-mi siulittaasoq Nikkulaat Jeremiassen, oqarpoq.
- Naalakkersuisooqatigiilersut saqqummiunneqarneranniik piffissaq sivitsoreerpoq aamma Naalakkersuisut sulillutik aallartereerput, taamaattumik aalisarneq eqqarsaatigalugu pingaarnertut suut siunnerfigineqarnersut maannakkut saqqummiunneqareersimanissaat pissusissamisoorsimassagaluarpoq.
- Peter Borgep naalakkersuisoqarfia nunatsinni inuussutissarsiutit pingaarnersaannut attuumassuteqarluinnarpoq, taamaakkaluartoq suut suliarineqarniarnersut suli ilisimanngilluinnarparput.
- Aalisarnermut inatsit aammalu pinngitsaaliilluni ileqqaartussaatitaaneq atorunnaarsinneqartariaqartut, Inatsisartunut qineqqusaarnermi Demokraatit siulittaasuata Jens Frederik Nielsen oqaatigaa. Tamannali ilumut anguniarneqarnersoq aamma ilisimanngilarput, taanna oqarpoq.
Sinerissap qanittuani aalisarneq ukiorpassuarni missukutaasimasoq, tamannalu aaqqiiviginiarlugu Aalisarnermut Naalakkersuisup suliutinik aallartitsinissaa pingaaruteqartoq, Nikkulaat Jeremiassen isumaqarpoq.
Isumaqatigiissut imakittoq
Aalisarnermut, Piniarnermut, Nunalerinermut Imminut Pilersornermullu Naalakkersuisunngorlaap, Peter Borgip aamma QAK-p ataatsimeqaatiginissaat isumaqatigiissuteqareertoq, tamannali aamma suli pisimanngitsoq, kattuffiup siullittaasua Henrik Sandgreen oqarpoq.
- Naalakkersuisooqatigiilertussat suleqatigiinnissamut isumaqatigiissutaanni aalisarnermut tunngasortaa imakippoq tamannalu eqqumiiginarpoq.
- Taamaattumik aalisarneq pillugu suna sammivigineqarnersoq pillugu piaakannertumik paasisaqarnissarput pingaartipparput, taanna oqarpoq.
Peter Borgep avannaani aalisarnermut toqqaannartumik attuumassuteqannginnera pitsaaqutitaqarsinnaasoq, Henrik Sandgreen isumaqarpoq.
Paasissutissat ujartorneqartut
Aqutsiveqarfik 47-mi, tassa Qeqertarsuup Tununaniit avannamut Upernavik tikillugu, sinerissap qanittuani qaleralinniarluni aalisarneq Kalaallit Nunaani annerpaaq ingerlanneqarpoq, tassungalu tunngatillugu ukiuni tulliuttuni qanoq pilersaaruteqartoqarnersoq, Aalisarnermut Naalakkersuisup suli saqqummiussaqannginnera, SQAPK-mi siulittaasip Anthon Lindenhannip paasiuminaatsippaa.
- Suut pilersaarutigineqarnersut piaartumik saqqummiunneqartariaqarput. Peter Borg avannaani aalisarnerup iluani annerusumik ilisimanngilarput, tamaattumik suut suliniutigineqarniarnersut pissangalluta utaqqivarput, taanna oqarpoq.
Aalisarnermut inatsimmi umiatsiaararsortunut tunngassuteqartut SQAPK-miit ataatsimut isigalugu iluarisimaarneqarput, taamaattorli allannguutissanik assigiinngitsunik siunnersuutissaqarlutik, Anthon Lindenhann oqarpoq.
Aalisarnermut, Piniarnermut, Nunalerinermut Imminut Pilersornermullu Naalakkersuisunngortoq oqaaseqarsinnaanngikkalluartoq, naalakkersuisup allattaa Naja Lynge Petersen Sermitsiamut paasissutissiivoq.
