Timmisartup Sermitsiami nakkarnera suli qulaajarneqanngitsoq

Tuluup/italiamiup timmisartortartup Ralph Salvinip siorna ajunaarnerani timmisartup ajutoorneranut suna pissutaanersoq suli paasineqanngilaq.

Statens Havarikommission for Luftfart (Timmisartornermi ajutoornerit pillugit misissueqqissaartartut) 2026-mi oktobarip 22-ani Interim Statementimik taasami taama nalunaaruteqarpoq.

”Timmisartornermi uuttuutinik paasissutissiisinnaasut amerlanerit septembarip naanerani 2026-mi qallorneqarput. Qaqqap ilaanit qaqinneqarsimasunit paasissutissat pissarsiarineqartut suli misissorneqarput uppernarsarneqarlutillu", Timmisartornermi ajutoornerit pilugit misissueqqissaartartut nalunaarummi taama allapput.

- Air Greenland Kommuneqarfik Sermersuumilu Upalungaarsimasut suleqatigivagut, septemberillu ingerlanerani sisamariarluta ajutoorfiusumiippugut, naalagaaffimmi timmisartornermi ajutoornerit pillugit misissueqqissaartartut pisortaat Anders Kristensen oqaluttuarpoq.

- Air Greenlandip qulimiguuliiatigut qaqqamut ingerlanneqartarpugut, upalungaarsimasut sulisuisa timmisartup eqqaavianut, tikikkuminaatsorujussuarmiittumut, majuartarlutik. Tassunga taamaallaat tikittarneqanngilaq.

- Silap unerisimannginnerani suliaq ajornakusoortoq ingerlanneqarpoq. Arlaleriarluta aallanngitsoortariaqartarpugut, silaqqissinissaalu ullut ilaanni utaqqisariaqartarlugu.

Aseqqukut misissoqqissaarneqassapput

- Timmisartup nakkarfianeersut aseqqukualuit aavagut. Paasissutissat nammineerluta misissoqqissaarsinnaanngilagut, taamaammat nunani allani suleqatigisatsinnut ingerlateqqinneqarput. Ajunaarnermut tunngatillugu qanoq pisoqarsimaneranik paasisaqarnerunissarput soorunami neriuutigaarput – paasissutissanilli pissarsiumaarnersugut oqaatigissallugu siusippallaarpoq. Suliat tamarmik iluatsinngitsoortumik ingerlanneqarsimasinnaapput, Anders Kristensen oqaluttuarpoq, misissuinissallu qaqugu naammassineqarnissaanni ulloq aalajangersimasoq oqaatigisinnaanngilaa.

Timmisartoq nakkarnikoq massakkumut Sermitsiap kujataa-tungaani kilometerip missaani qatsitsigisumiiginnarallassaaq.

- Maannakkuugallartoq tassaniiginnassaaq. Politiit sillimmasiisarfiillu timmisartoq nakkarnikoq qanoq iliuuseqarfigineqassanersoq, timmisartoq pillugu suliaq iperarutsigu, aalajangiiffigissavaat, Anders Kristensen oqarpoq.

Angallanissamut inerteqqut

Sermitsiami nakkarfiusup eqqaani angallanneq inerteqqutaasoq Kalaallit Nunaanni Politiit septembarip 30-anni nalunaarutigaat.

”Innuttaasut isumannaatsuunissaat eqqarsaatigalugu Sermitsiami sumiiffimmi aalajangersimasumi angalasoqannginnissaa sivitsorneqarpoq. Inerteqquteqarnermut piffissaritinneqartoq nutaaq 2026-mi septembarip 30-aniit decembarip 30-anut atuutissaaq.

Sermitsiami 2025-mi ukiakkut timmisartumik ajutoortoqarnera pissutigalugu timmisartup aseqqukuisa inissisimaffimminit sisooratarsinnaanera suli aarlerinaateqarnera inerteqqummik sivitsuinermut tunngavigineqarpoq.

Kalaallit Nunaanni Politiit sumiiffimmi nalunaaqutsersuisimapput. Imminut allanullu isumannaatsuunissaq pillugu nalunaaqutsersuutit kikkunni tamanit malinneqarnissaat qinnutigaarput", Kalaallit Nunaanni Politiit nalunaarutaat taama nipeqarpoq.

Sermitsiami ajutoorneq siorna oktobarip 25-ani pivoq. Tuluk/italiamiu timmisartortartoq Ralph Salvani timmisartoq nutaaq Cessna 182T ataatsimik motoorilik Polenimut tunniunneqartussaq atorlugu Canadami Goose Bay-imit Narsarsuarmukarluni Davis Strædet qulaallugu timmivoq. Timmisartortartup kujataani silap unerisimannginnera pissutigalugu Nuummut minnissi siunniuppaa, tamannali inuunermik akeqarpoq.

Nuummut minnialernermi timmisartup Sermitsiaq 3.500 fodinik qatsitsigisumi – kilometerip missaani qatsitsigisumi - aporpaa. Tamanna annaassiniaanermik aallartitsivoq, tassani Naviair, Kalaallit Nunaanni Politiit kiisalu Issittumi Sakkutooqarfik peqataapput. Sumiiffimmi silap unerisimanerani timmisartup sumiissusersineqarnissaa ulluni pingasuni sivisussuseqarpoq – ajunaartorlu sakkutuunit immikkut ilinniarsimasunit sapaatip-akunnera qaangiuttorlu qaqinneqarpoq.