KANUNUPE-mi siulittaasooqqaartoq atuuffikuminut utertoq

Nunaqarfimmiut peqatigiiffiat, KANUNUPE, nutaamik siulittaasortaarpoq. Taanna tassaavoq Kangaamiormiu Jens Meeraq Lyberth. Siulittaasunngortup nunaqarfimmiut isumasioqatigiisinneqarnissaat pingaarnertut ilaatigut angorusuppaa.

Nunatsinni nunaqarfiit 54-iupput, taakkua ilagaat Tasiilap eqqaani nunaqarfik Tiilerilaaq.

Assiliisoq: Oscar Scott Carl

Arnaq Nielsen Arnaq Nielsen tusagassiortoq

Saqqummersinneqarpoq 27. Oktobari 2026 - 09:15

Ussassaarut

Jens Meeraq Lyberth nunaqarfimmiut peqatigiiffiat KANUNUPE 1997-imi pilersinneqarmat siullersaalluni siulittaasuusoq, peqatigiiffik immikkut ittumik tallimanngornermi oktobarip 16-iani ataatsimeersuarmat siulittaasunngoqqippoq.

- Kaammattorneqarnikuuvunga. Qilanaarivara suliassat aallartinnissaat, Jens Meeraq Lyberth oqarpoq.

Peqatigiiffik ukiuni kingullerni arlariinnik unammillernartunik nalaatsiviuvoq. Ilaatigut peqatigiiffiup siulittaasorisimasaa Karl Petersen 2024-mi suli atuuffimminiilluni toquvoq. Kingorna Ingvar Motzfeldt siulittaasunngorpoq, taannali maajimi tunuarmat qinigaaffimmi ataatsimi peqatigiiffiup siulittaasuata pingajussaat, Nuunoq Per Ole Frederiksen siulittaasuugallalerpoq.

Nunaqarfimmiut isumasioqatigiisinneqartariaqarput

Nunaqarfimmiut inoqarfinnilu mikinerusuneersut kingullermik 2022-mi isumasioqatigiisinneqarput. Isumasioqatigiisitsisoqartariaqalersoq siulittaasunngorlaaq isumaqarpoq. Siulittaasunngornerminimi anguniagassamisut pingaarnerit ilaattut taanna angorusuppaa.

- Qinersivik una kingulleq taamatut aaqqissuisoqarnikuunnginnera maqaasinarami, Jens Meeraq Lyberth oqarpoq.

Ussassaarut

Isumasioqatigiisitsinerit Naalakkersuisut aningaasaliiffigisarpaat. Jens Meeraq Lyberthip Naalakkersuisunut tamanna saaffiginnissutigissamaarpaa.

Isumasioqatigiinnermi nunaqarfimmiut atugaat oqallisigineqassaaq. Atukkatillu ilungersunartuusut siulittaasunngorlaap oqaatigaa.

- Soorlu assersuutigiinnarlugu nioqqutissanik pajuttorneqarneq ajorami. Assersuutigiinnarlugu uanga aquuteralattaarniaruma Sisimiunut piniarlunga taava Nuummut nassiuteqqaarlugu Kangaamiunut. Qaammat utaqqisarpugut. Tamakkua ajoramik nunaqarfimmiuulluni. Aamma pisiassat allallu nioqqutit akitsoqqaqigamik, Jens Meeraq Lyberth oqarpoq.

Jens Meeraq Lyberth Naleraq tunuliaqutaralugu Qeqqata Kommuniani kommunalbestyrelsemi ilaasortaavoq, taassuma saniatigut Kangaamiuni nunaqarfinni aqutsisuni siulittaasup tulliulluni.

Nunaqarfimmiut isumasioqatigiisinneqarsimatillugit Naalakkersuisunut ataatsimoortumik anngussisoqartarmat isumasioqatigiinnerup kingorna anngussassaqarumaassallutik siulittaasunngorlaap qularinngilaa.

Peqatigiiffik nalinginnaasumik nunaqarfinnut aqutsisunut qinersereernerup kingorna, ukiut sisamakkaarlugit, ataatsimeersuartarpoq. Pilersaarutit malillugit ataatsimeersuarneq tulleq 2029-mi pissaaq. Tassanilu siulittaasumut qinersisoqaqqittussaassalluni.

Jens Meeraq Lyberth KANUNUPE-mi siullermik 1997-imiit 2008-p tungaanut siulittaasuuvoq.