MOTOORI
Aalisarnermut piniarnermullu atortussat nutaat
Piniarnermik aalisarnermillu soqutiginnittunut tamanut pisussat annersaat ukioq manna Ilulissani oktobarimi pissaaq. Piniarnermut aalisarnermullu tunngasut nutaajunerpaat tamarmik nittarsaavinni, sulianut tunngasunik workshoppertitsinerni oqalugiarnikkullu nittarsaanneqassapput.
Ilulissani nittarsaassineq 2022-mi 2.000-ingajannik ornigarneqarsimavoq. Aaqqissuussaq iluatsittoq maannakkut aamma ingerlanneqaqqissaaq
Assiliisoq: Polar Expo Fishing and Hunting
Aalisarnermut piniarnermullu tunngasunik nittarsaassineq 2024-mi
oktobarip arfineq-pingajuanit qulinganut Ilulissani ingerlanneqaqqissaaq.
PolarExpo – Fishing & Huntingimik, kingullermik 2022-mi Ilulissani
ingerlanneqartumik, Avannaata Kommunia aamma Aalborg Kongres & Kulturcenter
aaqqissuisuupput. Nittarsaassineq ukiuni siuliini Sisimiuni
ingerlanneqartarsimavoq.
ILULISSAT TIMERSORTARFISSUANUT ISERNEQ
Inersimasoq: DKK 100
Ullunut pingasunut isissutissaq: DKK 250
Meeraq (8-13 ukiullit): DKK 50
Ammaffissat
Marlunngorneq
oktobarip arfineq-pingajuani nal. 10-17
Pingasunngorneq
oktobarip qulingiluaani nal. 10-17
Sisamanngorneq
oktobarip qulingani nal. 10-17
2022-mi nittarsaassineq iluatsilluarpoq ullunilu pingasuni
inuit 2.000-ingajaat ornigussimapput, tamannalu rekortitut inissippoq. Ukiuni siuliini
1500-t missaanniittut peqataasarsimapput.
Siornaak nittarsaassisut Kalaallit Nunaannit, Danmarkimit, Islandimit, Norgemit
Savalimmiunillu peqataasut ilagaat AWI Boats, Vonin, LP Marine Service, Mar
Wear, Nuuk Marine Center, Tankeeraq, Yama-Tek, CAT, VB Marine aamma Furuno.
Ilulissat timersortarfissuata iluani silataanilu tupersuarmi
saqqummersitsisoqarpoq. Ukioq manna aamma taamaattoqaqqissaaq.
Atortussanik isumassarsineq
Nittarsaassineq PolarFish-imik taaguutilimmit
aallaaveqarpoq, taannalu ukiuni arlalinni ukiut marluk allortarlugit
ingerlanneqartarsimavoq, tassanilu aalisarnermik inuussutissarsiuteqartut
soqutiginnittut pingaarnertut sammineqartarsimapput. Ilulissanili
takornarialerisut atortussanut takornarialerinermillu ineriartortitsinissamut
isumassarsisinnaapput.
“Isumaqatigiissut uagutsinnut kommunimilu aalisartunut
piniartunullu pingaaruteqarpoq. Nittarsaassinertaaq nunanit tamalaanit
soqutigineqaraluttuinnarpoq, taamaalillutalu aalisarnermik
inuussutissarsiuteqartut atortussanik ineriartortitsinermillu
isumassarsisinnaanissaat qulakkeertarparput,” Avannaata Kommuniani borgmesteri
Palle Jerimiassen oqarpoq.
Polar Expo Fishing & Hunting pillugu nittarsaassineq
takornariaqarnerup sivitsornissaanik kommunimilu tamarmi akunnittarfinni
unnuisarfinnilu unnuisoqarnerulernissaanik politikkikkut anguniakkanut ilaasoq,
taanna nangilluni oqarpoq.
Allaaserisaq Motoorimi saqqummersinneqarpoq. Motoori uani atuarsinnaavat.
