ILINNIARTITAANEQ
Aalisartut piniartullu ilisimasaat uumassusilerineq pillugu ilinniarnermi peqataatinneqalerput
Avatangiisit pillugit suliniaqatigiiffik Ocean North Kalaallit Nunaat aammalu Ilisimatusarfiup immikkoortortaqarfia SILA suleqatigiinnissamik isumaqatigiissusiorput, taannalu aqqutigalugu aalisartut piniartullu ilisimasaat uumassusilerinermik ilinniarnermi peqataatinneqarnerat annertusaavigineqassaaq. Taamaalilluni ukioq manna pikkorissarneq Puisi nutaanik imaqalerlunilu ilinniartitsissutinik atortoqalissaaq.
SILA-mi ilinniartut timmiaq toqungasoq misissoqqissaarpaat
Assi: Ilisimatusarfik
SILA - UUMMASSUSILILERINERMI BACHELORINNGORNIARFIK
SILA uumassusilerinermi bachelorinngorniarneq ukiuni pingasuni ilinniarnermik ingerlatsiviuvoq immikkoortukkaanut sapaatip akunneri qulikkaarlugit agguagaavoq sapaatip akunnera soraarummeerfiusoq ilanngullugu.
Pikkorissarnerit tamarmik attuumassutilinnik ilisarnartunillu aallaaveqarput, ilinniarnerlu tigussaasunik suliaqarluni ilinniarnernik aammalu atuagarsorluni ilinnianernik imaqarpoq.
Qinnuteqarfissap killia tulleq: 1. november 2026
Ilinniakkap aallartiffissaa: 1. februar 2027
Ilisimatusarfimmi uumassusilerineq pillugu ilinniartut siunisami piniartut peqatigalugit puisinniartalissapput.
Tamanna atuarneqarsinnaavoq avatangiisit pillugit suliniaqatigiiffiup Ocean North Kalaallit Nunaat-a (ONKN) aammalu immikkoortortaqarfiup SILA-p isumaqatigiissutigiligaanni.Suleqatigiinneq aqqutigalugu aalisartut, piniartut aammalu nunat inoqqaavisa ilisimasaat Kalaallit Nunaanni uumassussilerinermik ilinniarsimasunngortussat ilinniartitaanerini peqataatinneqarnerat nukittorsarneqassaaq.
Ukioq manna ONKN-imit aningaasaliisoqarneratigut pikkorissarneq ”Puisi” ilinniartitsissutinik nutaanik ilaneqassaaq, taamatuttaaq piniartut peqatigalugit asimi sulisoqassalluni, tassani puisinniarneq, silap sikullu pissusaat, ukiup qanoq ilinerini piniagassat, puisit suussusaat isumannaallisaanerlu ukkatarineqassallutik.
Ilinniartitaanermut tapertaassapput
Imaani uumasut ilusaannik aammalu timimikkut sananeqaataannik ilinniartut ilisimasaqarnerulernissaasa saniatigut aamma nunat inoqqaavisa puisip amiinut tunngatillugu ilisimasaat, kulturikkut aammalu aningaasarsiornikkut isumaqassusaat pillugit ilikkagaqarfiginissaat periarfissiissutigineqassaaq.
" Piniartut aalisartullu ilisimatusarfissaannartut atuutiinnannginnissaat kisianni ilinniakkamut ingerlatsinermi tunniusseqataanissaat pingaaruteqarpoq. Taamaattumik ilinniartut klassip avataani ilinniarnerminnut atatillugu angallassisut akilerneqartarnissaat pingaartillugu taama aalajangiivugut," Jenseraq Poulsen, ONKN-imi pisortaq tusagassiuutitigut nalunaarummi oqarpoq.
Ilisimasaqariaatsit pillugit peqataatitsineq
Suleqatigiinneq ilisimatuussutsikkut ilisimasanik, aalisartut piniartullu misilittakkatik tunngavigalugit ilisimasaannik kiisalu nunat inoqqaavisa ilisimasaannik ataqqeqatigiinnermik aallaaveqarpoq. Siunertaavoq ilisimaqariaatsit taakku peqataatinnissaat kinguaariinni tulliuttuni kalaallit uumassusilerituunngorumaartussat ilinniartitaanerannut.
ONKN aqqutigalugu aningaasaliinikkut SILA pikkorissarnernik klassip avataani sulinermut atatillugu assartuinermut kiisalu atuartitsissutinik nutaanik ineriartortitsinermut aalisartunut piniartunullu peqataasunut akiliisoqarsinnaanissaanut immikkut ukkataqarsinnaavoq. Taamak oqarpoq immikkoortortaqarfimmi SILA-mi pisortaq, Aviâja Lyberth Hauptmann
Assi: Emil Stach
Isumaqatigiissusiortut akuersaarpaat ilisimasaqariaatsit taakku assigiinngitsut naligiimmik naleqartut aammalu imminnut sinnerseraassinnaalluartut, taakkulu peqatigiinnerisa ilisimatusarneq ingerlatsinerlu nukittorsarsinnaagaat. Taamaammat suleqatigiinnerup ilisimasaqarnerup aaqqissuussaanerisa assigiinngitsut peqatigiinnissaat peqataatitsinissarlu siuarsassavai aammalu takutissavaa, qanoq ililluni taamatut suleqatigiinnerup ilisimasanik pilersitseqatigiinneq taamaalullunilu aalajangigassanut tamakkiinerusumik isiginnissinnaaneq tapertaaffigineqassalluni.
“ONKN aqqutigalugu aningaasaliinikkut SILA pikkorissarnernik klassip avataani sulinermut atatillugu assartuinermut kiisalu atuartitsissutinik nutaanik ineriartortitsinermut aalisartunut piniartunullu peqataasunut akiliisoqarsinnaanissaanut immikkut ukkataqarsinnaavoq.” Immikkoortortaqarfimmi SILA-mi pisortaq, Aviâja Lyberth Hauptmann, oqarpoq.
Piujuartitsisumik aqutsineq pillugu suliassamik ilinniartitsineq
ONKN aamma SILA-ilinnniakkamut imaani pisuussutinik piujuartitsisumik aqutsineq pillugu sulianut tunngasunik saqqummiuissinermut, aqutseqatigiinnermut ilapittuisinnaavoq kiisalu ilisimatusarnermi aqutsinermilu nunap inoqqaavisa ilisimasaannik peqataatitsinermi.
Taamatuttaaq ONKN-p nunap inoqqaavisa najukkamik tunngaveqartumik nakkutilliisarnermi aqutsinermi, aqutseqatigiittarnermi peqataatitsinermi suliaqarnermut misilittakkanik ilisimasanillu tunniussisassapput, ilisimasat amerlasuut tunngavigalugit aqutsinissamut pilersaarutinik ineriartortitsinermut kiisalu nunap inoqqaavisa ilisimasaannik suliaqarnermut ileqqorissaarnikkut malittarisassaliornermut ilapittuissapput.
Allaaserisaq aviisimiit ilinniarneq pillugu sammisameersuuvoq, akeqanngitsumik una toorlugu atuarneqarsinnaavoq.
