Piniartut ilisimasaat biologinngorniarnermut ilanngunneqassapput

Oceans North Kalaallit Nunaata Ilisimatusarfiullu akornanni suleqatigiinnerup nutaap aalisartut piniartullu ilisimasaasa annertunerusumik biologinngorniarnermik ilinniartitaanermi ilaatinneqarnissaat qulakkiissavaa. Peqatigisaanik ilisimasaminnik ilapittuineranni ajunngitsorsitinneqartassapput.

Illuatungeriit naapertorlugit suleqatigiinneq ilinniagartuut ilisimasaasa, aalisartut piniartullu misilittagaasa kiisalu nunap inoqqaavisa ilisimasaasa assigiinngitsutut, kisiannili naligiittut imminnullu iluaqutseeqatigiittutut ilisimasatut sanarfineqarput.

Assi: Oscar Scott Carl

Morten Okkels Morten Okkels Tusagassiortoq

Saqqummersinneqarpoq 30. Aggusti 2026 - 13:37

Ussassaarut

Piniartut aalisartullu inuinnaassanngillat biologit paasissutissanik katersivigalugilluunniit ilisimatusarfigisaat.

Taakku annertunerusumik biologinngorniartut Kalaallit Nunaanni ilinniartinneqarneranni suleqataanermikkut ilapittuisuussassapput.

Tamanna avatangiisinut suliniaqatigiiffiup Oceans North Kalaallit Nunaata, ONKN-p, Ilisimatusarfimmi Silamik immikkoortullu akornanni suleqatigiinnissamut isumaqatigiissummi nutaami anguniagaavoq.

Ilisimatusarfimmi SILA-mik ilinniarneq

SILA tassaavoq pinngortitaq, kinguaariit tulliuttut uumassusillit assigiinngiiaartorpassuunerannik, silap pissusaata allanngoriartorneranik, inuit pinngortitallu akornanni ataqatigiinnermik, nunatsinni issittumilu immikkuullarissuusumi periarfissanik piusunik ataqqinnittumik atuinissaq toqqammavigalugu ilinniartitaaneq.

Ilinniartitaaneq nunatsinni inuussutissarsiornermut immikkut sammitinneqarpoq, ilinniartullu piginnaasaannik aalajangersimasunik, nunatsinni uumassusilerisutut sulinerminni atorsinnaasaannik qulakkeerisussaalluni.

Issuaaffik: Ilisimatusarfik

Isumaqatigiissummi aalisartut piniartullu misilittakkanik aallaavilimmik ilisimasaat kiisalu nunap inoqqaavisa ilisimasaat ilinniartitsinermut akuutinneqarnerat nukittorsarneqassaaq.

Aallaqqaammut suleqatigiinneq PUISI-mik pikkorissarnermut aallussiffiussaaq.

Ussassaarut

ONKN-mit aningaasaliissutit ilaatigut aalisartut piniartullu ilinniartitsinermut ilapittuisunut ajunngitsorsititsinermut atorneqassaaq. Aningaasat aamma misissuilluni suliaqarnermi ilinniartitsinermullu atortussianik nutaanik ineriartortitsinermik ikorfartuissapput.

– Piniartut aalisartullu ilisimatusarfiuinnaatinnginnissaat, ilinniartitaanermulli suleqataalutik ilapittuisuunissaat pingaaruteqarpoq. Taamaammat ajunngitsorsiat misissuinernilu attaveqaatit pingaarnerutissallugit toqqarparput, Jenseeraq Poulsen, ONKN-imi pisortaq oqarpoq.

Piffinni piniartut peqatigalugit

PUISI-mi pikkorissarnermi ilinniartut ilaatigut piniartut peqatigalugit piffinni suliaqassapput.

Tassani puisinniarnermik, silap sikullu pissusaanik, ukiup qanoq ilinerani assigiinngissutsinik, uumasoqatigiinnik ilisimasanik isumannaallisaanermillu ilinniassapput. Ilinniartitsinermi uumasut miluumasut anatomiannik fysiologiannillu biologit ilisimasaat kiisalu nunap inoqqaavisa ilisimasaat ataqatigiississavaat.

Puisip amiata kulturikkut aningaasaqarnikkullu pingaarutaa, peqatigisaanillu issittumi nunap inoqqaavisa akornanni puisip atorneqarnera pillugu maanna oqallinneq, immikkoortumilu ilisimatusarneq aamma pikkorissarnermut ilaatinneqassaaq.

– ONKN-imit aningaasaliissutit iluaqutigalugit SILA pikkorissaanerup ilaanik aalisartunut piniartunullu peqataasunut ajunngitsorsititsinermik ilaatitsisumik, piffinni suliaqarnermut atasumik attaveqaatinik ikorfartuinerit kiisalu ilinniartitsinermi atortussianik nutaanik ineriartortitsinerit immikkut aallunneqarsinnaassapput, Aviâja Lyberth Hauptmann, SILA-mi immikkoortumut pisortaq oqarpoq.

ONKN aamma imaani pisuussutit piujuartitsisumik aqunneqarnerat pillugu immikkut ilisimasanik kiisalu nunap inoqqaavisa ilisimatusarnermik aqutsinermillu ilisimasaasa atorneqarnerannut ilapittuissaaq.