Marluusut aappaa

Inuunerup ilaani naammattoortakkat ilagaat aporfiit imaluunniit oqartarnerattut: unammillernartut.

Taakku aporfingaatsiarsuusinnaasut imaluunniit unammillernavissut, anersaartorujussuaqqaarfissat – sivikitsukullammik.

Pisoq soorlu ilisarnassasoq. Imminullu aperivutit: ”Sooq? Allatummi iliorsinnaasimagaluarputit!”  Taamaappoq, taamatut pisoqartuaannarpoq, qularnanngitsumilli ingerlaqqittarputit, ilaa?

Silattuallaatigisarpatimmi, qinigassani marluusuni aappaa toqqaraangakku.

Toqqagassaq

1970-ikkunni inuusunnitsinni (siusinnerusukkullu) ilinniakkamik toqqaaniarnitsinni ilinniagaq Danmarkimi imaluunniit nunatsinni, taamanikkut ikittuinnarnik ilinniagaqarfissalimmi ingerlanneqassanersoq aalajangiisuusarpoq. Ungasissorssuarmut nalusamullu nuunnissamut ernumanartoqartitsisartunik ilaqarpugut. Ilaali qujanartumik iluatsittarput, allat angerlaannartut.

Periarfissanuku marluugaangata ilaanni aappaa isumannarani aappaa nalunartunik ulikkaartsinnaasartoq. Tamanna inuunermi, sumulluunniit tunngatillugu, soorlu aappaqarninni, ilinniagaqarniarninni, nuunniarninni, meerartaarnissamut tunngatillugu allatigullu ilinnut pingaarutilinnik aalajangiiniarninni misigisarpat. Ilaqarpugut qunusuilluinnartunik sapiillutillu toqqaasartunik. Allat eqqarsarfissaqarusuttarput aammali allanik toqqagassap aappaanik qunugisalinnik ilaqarpugut.

Sulimi ullumikkut toqqagassat pineqartillugit pissutsit taamaapput, kisianni soorlu ungasissusermik eqqarsaat allatut ilisimallunilu attaveqaatit ajornannginnerulersimasut. Sulili unammillernartorpassuaqarpoq.

Illit isikkiviit

Inuunertik naallugu sumiiffimminniiginnarusuttunik aamma ilaqarpugut.  Nunaqarfimmi illoqarfimmiluunniit kiserngorutissagaluarunilluunniit nikikkusunngitsunik. Immaqa pisussat nalusatik ernumagalugillu aporfissaqarfissat kisiisa takusarpaat.

Allat iluarilluinnakkaminnik imminnut aqqutissiuunnikuupput.

Tassa inuunerup ilaani toqqagassappit ilai, qanorluunniit killiffiit ikkaluarpat ilinnut toqqissisimanarnerusut ujartortarlugilluunniit nalusatit pissanganarsinnaatittarpatit. Nalunartunimmi toqqaaneq tamatigut ajornartorsiutaasariaqanngilaq. Imaassinnaavoq persaqqusersuutaasunik unammillernartunillu nalaataqartutit, tamakkuli aaqqinneqarsinnaasarput. Ajornerusariaqanngilaq.

Nammineq toqqakkakka toqqammavigaakka. Innaallagiaqanngitsumulli nooqqusaassagaluaruma taamaaliornavianngilanga. Ilorrisimaarnermut uerinikuugama!