ILINNIARNEQ

Kalaallit Nunaanni aalisarnermi ingeniør siulleq

Edna Lyberth juunip 19-ani allagartartaarpoq. Kalaallit Nunaanniillu aalisarnermi ingeniøritut siullersaalluni Sisimiuni DTU Aquami aamma Danmarkimi Hirtshalsimi maanna ilinniarsimasutut imminut taasinnaalerpoq.

Aalisarnermut teknologiingeniørinngorniarluni ilinniakkami Edna Lyberth (tunorleq) ilaatigut DTU-p ilisimatusarnermut umiarsuaani Havfiskenimi sapaatit akunnerini pingasuni Hirtshalsimi pikkorissarpoq. Assimi ilinniartoqatinilu saamerlermiit: Julie Grønlund Danmarkimi Strandbymeersoq, Margit Ravn Hindholm Danmarkimi Stevnsimeersoq aamma Jákup Jógvansson Clementsen Savalimmiuni Thorshavnimeersoq.

Assi: Nammineq pigisaq

Trine Juncher Jørgensen Trine Juncher Jørgensen TUSAGASSIORTOQ / TUSAGASSIORTOQ

Saqqummersinneqarpoq 9. Septembari 2026 - 09:21

Ussassaarut

Edna Lyberth Maniitsormiu aalisarnermi ingeniøritut ilinniakkami Sisimiuni Hirtshalsimilu ingerlanneqartumi kalaallini siullersaalluni naammassivoq.

Ilinniarnerup ingerlanerani biologii, aalisarnermi teknikki, tunisassiorneq aqutsinerlu sammineqartarput, taamaalillunilu aalisarnermik inuussutissarsiuteqarnermi aqutsinermilu assigiinngitsorpassuarni siliffissaqartitsilersinnaalluni.

Edna Lyberthip inaarutaasumik misilitsinnera kingornalu nalliuttorsiutigineqarnera juunip 19-ianni Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmi pivoq, tassani Edna Lyberth ilinniartuullunilu, ilinniarnermini ikiortitut sulisimavoq.

Edna Lyberth aalisarnermut, piniarnermut nunalerinermullu naalakkersuisoqarfimmi soraarummeernermi naggataarnersiorpoq.

AALISARNERMI TEKNOLOGI

DTU Aqua-p Pinngortitaleriffik, Namminersorlutik Oqartussat aamma Kalaallit Nunaanni aalisarnermik inuussutissarsiuteqartut qanimut suleqatigalugit ukiuni sisamani aalisarnermi teknologimik diplomingeniørinngorniarluni ilinniagaq ineriartortissimavaat, taannalu siullermeerluni aggustimi 2019-imi neqeroorutigineqarpoq. Ilinniagaq namminerisaminik inuussutissarsiornermut iluaqutaavoq. Tamatumali saniatigut masteritut ilinniakkani attuumassuteqartuni, soorlu DTU-mi Akvatisk Videnskab og Teknologi-mi imaluunniit Aquatic Food Production-imi, DTU-mit ilaatigut Norgemi NTNU suleqatigalugu neqeroorutigineqartumi, ilinniaqqinnissamut periarfissiivoq.

Ilinniarnerup immikkoortui siulliit pingasut Sisimiuni ARTEK-imi ingerlanneqartarput. DTU-milu Hirtshalsimiittumi immikkoortut marluk kingorna ingerlanneqartarlutik, tamatumalu kingorna suliffimmi misiliisoqarpoq. Nammineq toqqakkamini pikkorissarluni imaluunniit nunani allani ilinniarluni kiisalu soraarummeernermi suliniutitut suliaq Danmarkimi, Kalaallit Nunaanni nunanilu allani suliarineqarsinnaasarpoq, inuussutissarsiortut suleqatigalugit.

Aalisarnermut teknologimi ilinniartut aalisarnerup, aalisakkanik qalerualinnillu inuussutissanik suliarinninnerup iluani naleqartitsineq tamaat pillugu ilisimasaqalertarput. Tassa imaani uumassusillit, piniarnermiit nerisassiornermut, aqutsinerlu ilanngullugit.

Immap uumasuisa tunngaviusumik ataqatigiinnerata marinboilogi aamma oceanografi tunngaviusumillu ilinniarnerup kiisalu ingeniøritut ilinniakkani tunngaviusut (matematikki il.il.) ilinniarfiup saniatigut, fagit pingasut tassaasut piniarnermik teknologi, aalisarnermik aqutsineq aamma aalisakkanik qalerualinnillu (seafood) suliarinninneq sammineqartarput. Tamatuma saniatigut ilinniartitaanermi nutaaliorneq aallarnisaanerlu sammineqartarput, taamaalilluni inuussutissarsiutit ineriartortinneqarnissaat aamma sammineqartarluni. Ilinniarnermi piujuartitsineq sammineqartartarpoq. Ilinniagaq itinerusumik uani paasisaqarfigiuk: www.dtu.dk/fiskeri

Suliniut pingaarutilik

Inaarutaasumik suliaa naalakkersuisoqarfimmik suleqateqarluni allaaserineqartoq aqutsiveqarfimmi 47-mi, Qeqertarsuup Tunuani, Uummannami Upernavimmilu umiatsiaararsortut pisassaminnik tunineqarsinnaanerannik atuutilersitsinermut attuumassuteqarpoq. Aalisarnermut, Piniarnermut Nunalerinermullu Naalakkersuisoq Peter Borg Ednap nalliuttorsiutigineqarneranut atatillugu ima oqarpoq:

Ussassaarut

”Aalisarnermut ingeniøritut ilinniagaqalerninni pilluarit. Kalaallit Nunaanni siullersaallutit naammassinerit, nuanneqaaq. Inuusuttutta inuussutissarsiornermi pingaarnerusumi sulinissamut ilinniartinneqarnissaat pingaaruteqarpoq, tassami ilinniarsimasunik sulisoqarnissamik pisariaqartitsineq annertusiartuinnarpoq. Aalisarnermut tunngasunik sulinerni pitsaanerpaamik atugaqarnissarnik kissaappakkit neriullungalu illit inuusuttut allat aalisarnermi ingeniøritut ilinniarusulernissaannut aalisarnermullu tunngasunik sulilerusulernissaannut isumassarsititsilluassasutit.”

Edna Lyberth ilinniarnermini nunanut allanut arlaleriarluni angalasarpoq inuusuttullu allamik kulturillit naapittarlugit.

Allaaserisaq aviisimiit ilinniarneq pillugu sammisameersuuvoq, akeqanngitsumik una toorlugu atuarneqarsinnaavoq.