POLITIIT
Aasiaanni innaallagiaq qamittooqqasoq - Qaqortumi Tasersuup sikua qajannartoq aammalu nuna tamakkerlugu suliat imigassartorsimanermut tunngasut amerlalluinnartut
Kalaallit Nunaanni Politiini nakkutilliisuutitat pisortaat, Poul Kreutzmann oqaluttuarpoq, sapaatip akunnerata naanerani nuna tamakkerlugu politiit ulapissimaqisut. - Aasianni innaallagissap qamittooqqanerani pisariaqartitsisoqassappat Politiit ikiuinissaminnut upalungaarsimapput, Qaqortumilu Tasersuup sikuata suli qajannarpallaarnera pillugu ornigunnerit arlaliusimapput. Tamanilli annersaavoq aalakoornartumik imigassartortoqarsimaneranut atatillugu suliassat nuna tamakkerlugu amerlasoorujussuusimanerat.
Assiliisoq (toqqorsivik): Leiff Josefsen
Aasianni illoqarfik tamarmi innaallagiaaruteqqavoq, tamatumunngalu atatillugu Aasianni Politiit pisariaqartitsisoqassappat ikiorsiisinnaallutik piareersimapput.
Politiit Nukissiorfiit oqaloqatigisimavaat, Nukissiorfiillu innaallagissap uterteqqinnissaanut maanna ulapipput. Nukissiorfiit ilisimatitsipput innaallagissamik qamittooqqaneq suli nalunaaquttap akunnerini marlunniit arfinilinnut sivisussuseqarsinnaasoq.
Kalaallit Nunaanni Politiit vagtchefiat, Poul Kreutzmann ilisimatitsivoq oqarasuaatit qamittooqqanermi sunnerneqarsimanngitsut, Aasiannilu innuttaasut politiit ikiorsiinissaannik pisariaqartitsissagunik sianersinnaasut.
Qaqortumi tasersuarmi siku suli qajannarpalaarpoq
Nakkutilliisuutitat pisortaata aamma oqaluttuaraa Qaqortumi politiit arlaleriarlutik Tasersuarmukartariaqarsimasut, tassami innuttaasut ernumasut nalunaarutiginnittarmata Tasersuup sikua suli qajannarpallaaraluartoq inuit angalaarfigigaat:
- Qaqortumi innuttaasut kajumissaarusuppagut utaqqeqqullugit, tasersuarmi sikup isumannaallisimaneranik nalunaaruteqartoqarnissaata tungaanut. Taamaattumik Qaqortumi innuttaasut kajumissaarusuppugut tasersuarmi angalaaqqunagit, tassami sikup suli qajannaassusia annikippallaarmat, taamaalillunilu aarlerinaateqarmat tatsip imaanut nillertumut nakkartoqarsinnaaneranut.
Angerlarsimaffimmi eqqissiviilliornerit, aqqusinermi eqqissiviilliornerit, nakuusernerit, biilinik aallarussinerit aamma imminut toqunnissamik sioorasaarinerit
Kalaallit Nunaanni Politiini nakkutilliisut pisortaat, Poul Kreutzmann, oqaluttuarpoq imigassamik aalakoornartumik imertoqarsimaneranut atatillugu politiit assut ulapaarsimasut.
Taanna oqaluttuarpoq 16-eriarluni angerlarsimaffimmi eqqissiviilliortoqarneranut orniguttoqartariaqarsimasoq, taakkunannga marlunnik meeqqat eqqissiviilliornernik isiginnittuusimasut.
Tamatuma saniatigut nakuusertoqarneranut atatillugu suliassat arfinillit aallartinneqarsimasut, biilinik aallarussinerit pingasut unitsinneqarsimasut, aalakoornartumik imersimallutik biilertut unitsinneqarsimaneri, aalakoorpallaarlutik maaniinnaq artuleqqasut isumagineqarsimaneri aammalu imminut toqunnissamik sioorasaarinerit amerlasuut suliarineqarsimapput.
- Aalakoornartumik imertoqarsimaneranut atatillugu suliat assigiinngitsut sapaatip akunnerata naanerani maannamut pisut 75-it sinnerlugit orniguffigineqarput nalunaarsorneqarlutillu døgnrapportimut, tamannalu nunami tamarmi, pingaartumik illoqarfinni anginerusuni, matumanilu pingaartumik Nuummi ulapaartitsingaatsiarput, Poul Kreutzmann, Kalaallit Nunaanni Politiini nakkutilliisut pisortaat, oqaluttuarpoq.
