Aasianni kommunip inissiaatai nutaat suli inoqanngillat
Svendborgip aqqutaani Aasianni inissiat nutaaliat 60-it sananeqareerlutik piareeqqapput, taakkunannga inissiat 40-it kommunip attartortagaatigai, namminersorlutillu oqartussat sinneri inissiat 20-it pigalugit. Namminersorlutik Oqartussat inissiaataat tamarmik attartortunik inunereerput, kommunilli suli paasiniarpaa qanoq annertutigisumik ineqarnermut akiliuteqartitsissanerluni, taamaattumik kommunip inissiaatai inoqanngillat.
Inissiaqarfit tallimanik quleriiaartut pingasuupput taakkulu inissiaqarfiupput attartortittakkat. Inissiaqarfik aappaluttoq namminersorlutik oqartussanit pigineqarpoq, tassaniippullu inissiat attartortittakkat 20-it, inissiaqarfiit sinneri marluk suli inoqanngillat, ineqarnermut akiliutigitinneqartartut suli aalajangerneqanngimmat.
Asseq: Inissiaqarfinnut sanaartortitsisut, Kommune Qeqertalik aamma Namminersorlutik Oqartussat
Naaatsuarannguamik nalunaaruteqarluni Kommuni Qeqertalik nittartakkamini nalunaarpoq svendborgip aqqutaani kommunip inissiaatai suli iserterfigineqarsinnaanngikkallartut.
Kommune ilisimatitsivoq innuttaasunit ilisimaneqareersutuut Svendborgip aqqutaaniittut inissiarsuit quleriiaat nutaat suli iserterfigineqanngitsut.
- Inissiarsuit pineqartut innuttaasunut attartortinneqarsinnaanngikkallarput, attartornermut qaammammut akiliutigineqartartussaq suli misissuiffigineqarlunilu nalilersuiffigineqarmat, nalunaarummi ilisimatitsissutigineqarpoq.
Namminersorlutik Oqartussat inissiaatai iserterfigineqareerput
Kommunip ineqarnermut akiliutissat annertussusissaat naatsorsuleruttorai, Namminersorlutik Oqartussat inissiaatai tamarmik iserterfineqareerput, tamanna ineqarnermut naalakkersuisoqarfimmi pisortaanerup Ruth Lindhardtip uppernarsarpaa.
Titartakkamik ilusilersugaq: Inissiaqarfinnik sanaartortitsisut, Kommune Qeqertalik aamma Namminersorlutik Oqartussat.
Namminersorlutik Oqartussat inissiaqarfiutaat tassaavoq aappaluttoq, tassaniipput inissiat qulit marlunnik initallit taamatuttaaq qulit pingasunik initallit.
Inissiaqarfiit qorsuk qaqortorlu Kommuni Qeqertalik pigivai. Inissiaqarfik Qorsummi inissiat tamarmik marlunnik initaqarput inissiaqarfimmilu qaqortumi marlunnik pingasunillu initallit akuleriipput.
Taakkuupput inissiaqarfiit marluusut katillugit 40-nik inissiartaqartut, taakkunannga inissiat 30-it marlunnik initaqarlutik inissiallu qulit pingasunik initallit.
Tassa kommunip inissiaatai 40-t attartortussanut suli iserterfigineqarsinnaanngillat, ineqarnermut akiliutissat annertussusissaat suli naatsorsorneqarmat.
Sermitsiamit kommunip akigititassaminik aalajangerniarneranut piffissaq qanoq sivisutigisoq pisariaqartinneqarnersoq paasiniarlugu Kommune Qeqertalimmut saaffiginnippugut, borgmester Simigaq Heilmann (D) oqaloqatigaarput, taassumalu aningaasaqarnermut pisortaagallartumut innersuuppaatigut, taannali allaaserisap suliarinerani attavigisinnaasimanngilarput.
