Ilinniarneq Sermersuarmut ingerlaaqatigiinnermik  naammassineqarpoq

Arktisk basisuddannelsemi ilinniaqatigiit aappassaat ilinniakkaminnik sapaatip akunnerani matumani naammassinnipput, tassani illersornissamut, upalungaarsimanermut piareersimanissamut politiinullu tunngasutigut piginnaasaqalersimallutik.

Ilinniaqatigiit 30-it aallartipput, taakkunanngalu 28-it naammassillutik, taamaasilluni ilinniarneq angusaqarfiulluarluni naammassineqarpoq. 

Issittumi Sakkutuut, Arktisk Kommando tusagassiorfinnut nalunaaruteqarluni taamak ilisimatitsivoq.

Ilinniartut aperineqarpata, ilinniarnerup ilungersunartorsiorfiunerpaaq suusimanersoq, amerlanerit isumaqatigiipput: sikumi allorissaaqatigiilluni pisoqatigiinneq.

Ilinniarnerup naammassiniarnerani Kangerlussuarmi ilinniarfimmiit sermersuarmut 37 kilometerinik ungasitsigisumut ilinniartut pisupput.

- Naggataatigut avatikka tamaasa anniarilerpakka, kilometerillu sisamat ingerlaffigereerneranni niora talerperleq qilusooqattaalerpoq. Kisianni ingerlaannarpunga, siulliit ilagalugit naammassinnikkusukkama. Taamatullu iliorpunga, 22-nik ukiulik Kristian Petersen Maniitsumeersoq oqaluttuarpoq.

Julia Steenholdt 23-nik ukiulik Nuummeersoq aamma sikukkut allorissaaqatigiilluni pisunnermi pikkunartorsiorpoq:

- Kilometerit arfinillit kingulliit pikkunartorsiorfigaakka. Nukkilisitsivunga, pisussinnaanissannillu eqqarsartaatsikkut tamaviaartariaqarlunga. Unitsikkusunngilarali, taanna oqaluttuarpoq.

Taamaakkaluartoq ilinniarnerup ingerlanerani misigisarpassuaqarput, Kristian Petersenilu Illersornissaqarfimmi ingerlaqqikkusuppoq. Sakkutuutut imarsiortutut ilinnialerusulluni taassuma Arktisk basisuddannelse piareersarfigaa.

"Maanna illit sakkutuunngussaatit"

Ilinniartuni naammassigajalersuni ilaavoq 22-nik ukiulik Anja Christensen, taanna Aasianni peroriartorsimavoq maannalu Nuummi najugaqarluni.

Taanna ilinnialerpoq imminut unammillerusulluni aammalu pissusissanik malinnilluarnissamut sungiusarusulluni. Taanna aamma Kristian Petersenitut sakkutuunngorniarluni ilinniagaqarnissaminut ingerlaqqinniarpoq.

Pingaartumik misigisaq ataaseq immikkut misigisaqarfigaa killissaminillu qaangiiffigalugu. Sakkutuut imarsiortut misilittaaffigigamikkit containerimiit imaanut sisoorlutik misileraapput, sisoorfissaq meterinik sisamanik portussuseqarpoq - Taanna Anja Christensenimut unammillernarsimavoq, imermik nuannarisaqanngitsuugami.

- Sapileraluarpara. Ilitsersuisorli nilliavoq, Sæbymut qiviartariaqarlunga, kisianni suli sapersaatigivara. Containerimiit aqqaqqiinnartariaqarpunga. Kingusinnerusukkut ilitsersuisoq aperivoq, misilikkusunnginneriga. Misilikkusuppara - kisimiillungami sisuunngitsoorusunnginnama.

- Misileqqikkaluarpara, kisianni suli pisinnaanngilanga. Imermi ersigivara. Kisianni ilitsersuisut ilaat oqarpoq: "Maanna illit sakkutuunngussaatit. Eqqissisimaniaannarit, ilitsersuutikkalu tusarnaakkit." Taamaalillunga sisoorpunga, Anja Christensen oqaluttuarpoq.

Kalaallit Nunaat kusanartuuvoq, sakkortuujulluni pinngortitarlu aqunneqarsinnaanngilaq

Naammassisunit 28-nit 27-t ingerlaqqittussaapput ingerlaqqinnissaminnut atatillugu sungiusassallutik, tassani praktikkerneqartussaallutik - ilaatigut Nuummi qatserutaasivimmi aammalu Arktisk Kommandosimi qullersaqarfimmi. 

- Illersornissaqarfiup suliassaa pingaarneq tassaavoq Issittumi Kalaallit Nunaata Savalimmiullu illersornissaat - tamannalu pingaarnerulersimavoq. Taamaattumik illersornissaqarfiup iluaqutigilluinnarpaa, Kalaallit Nunaanni qajannaatsumik piareersimasuuteqalerneq, tamannalu pissarsiarissavarput siunissami ilinniartut Arktisk Basisuddannelsemeersut peqatigalugit ineriartortissallutigu, Arktisk Kommandomi tullersorti, flotilleadmiral Lars Bjerring Ravn Nielsen oqarpoq.

Atuartitsinermi suleqatigisimasat Kangerlussuarmiillu innuttaasut peqatigalugit peqataavoq Arktisk Basisuddannelse-p naammassineqarnerani, pingasunngornermi 29. oktoberimi KFUM’s Soldaterhjem-imi Kangerlussuarmi pisumi - tassani oqalugiartoqarpoq, qullilisoqarpoq qungujulangaartoqarlunilu.

Ilinniartunut oqalugiarnermini Arktisk Basisuddannelsemi pisortaq, kaptajn Mathias la Cour Vågen ilaatigut oqarpoq:

- Kalaallit Nunaat assigiinngitsorpassuarnik imaqarpoq. Kusanartuuvoq, sakkortuvoq, pinngortitarlu peqqarniissinnaasaqaluni. Kalaallit Nunaat qajannaassutsimik akissarsititsisarpoq - pissutsini allanngorartuni sakkortusinnaasunilu qajannaatsuulluni ingerlaannarsinnaaneq. Timikkummi eqqarsartaatsikkullu nukittussusermiittarpoq tatisimaneqaraluaraanniluunniit pajajaatsunngortarneq. Tassa piginnaassuseq, ilissi maanna uppernarsagarsi. Tamanna ingerlaqqinnissinni siammartersiuk ingerlateqqillugulu, avatangiisissinnilu qajannaassusermik pilersitsigitsi.

Inuusuttut 131 onlinekkut qinnuteqarput holdit aappaanni ilinnialerusullutik Issuttumi tunngaviusumik ilinniarfimmi, taakkunannga arnat 13-it angutillu 17-it aallartipput 1. maj 2025-mi. 1. Maannalu decemberip tungaanut misileraasoqassaaq ilinniartunut nutaanut Arktisk Basisuddannelsemut iserniartunut, taakunanngalu isertut aappaagu aasaanerani aallartissapput.