Aavarnermi mianerisassat
Aavarfinngornissaanut qaammataajunnaarpoq, piniariassagaannilu eqqumaffigisassat arlallit uani atuarsinnaavatit
Assi Sermitsiaq.AG-p toqqorsivianit
Ukioq manna tuttunniarlutit umimmanniarnissalluunniit aallarnissat eqqarsaatigigukku, taava arlalinnik eqqumaffigisassaqarputit. Pisarneq malillugu ukioq manna tuttunniarneq aggustip aallaqqaataani aallartissaaq, Sermitsiallu Kalaallit Nunaanni Politiivini pigaartut pisortaat Malik Olesen piniarnerup aallartinnginnerani eqqumaffigineqartussat pillugit attavigisimavaa.
- Angalaleraanni eqqumaffissat
siulliit ilagaat pigisat ajunnginnersut misissorluarnissai, ingammik
kalerrisaarutit soorlu VHF-it. Angalannginnermi silassamik marserluarnissaq
aamma pingaaruteqarpoq, sila allanngortuaannarmat. Piareersarnermi aamma ilaavoq
ilaquttat nalunngisat oqaloqatigilluarnissaat, ilisimatillugit
sumukarniartugununa, qanoq sivisutigisumik angalaniarpugut, Malik Olesenip oqaatigaa.
Nunamut allamut piniariarneq
Piniarnermut akuersissummik atuuttumik nassarnissaq piniarnissamullu atortussat aallannginnermi misissornissaat pingaaruteqartuaannarpoq. Nunamut allamut piniarniaraanni aallartinnani arlallit eqqarsaatigineqaqqaassapput.
- Inuit ilaasa avarfiit nalunngisatik uteqattaarfigisarpaat, kisianni ilai allamik misiliisarput. Nutaamut
misiliiniaraanni ornigutinnani nunap marserluarnissaa pingaaruteqarpoq,
assersuutigalugu internetikkut googlemaps periarfissaavoq.
Kisimiillutit piniariarnissat eqqarsaatigigukku, eqqarsaatigilluaqqaarnissaa aamma pisariaqarpoq.
- Kisimiigani aavarnissaq aamma
pingaaruteqarpoq, arlaatigut ajutooraanni kisimiillunilu ikiortissamut
kalerrisaarinissamut periarfissaq annikillingaatsiartussaagami, taamaammat
ilaqarnissaq pingaaruteqartarpoq.
Satellitsikkut attaveqatigiinneq
Piniarnermi ajoquserlutit unittuussagaluaruit satellitsikkut attaveqaammik nassarnissat kaammattuutigineqarpoq. Satellitsikkut attaveqaatit atorlugit nunarsuarmi satellitsit attaveqatigiittarnerat ajornartoornermi sianersinnaallutillu attaveqarsinnaavutit.
- Qujanartumilli amerlasuut massakkut
nunami pisuttuartartut inReach-inik taaneqartartunik kalerrisaarutit
mikisunnguit pigisaramikkut. Toorunikku inissisimaviup sumiiffia
kalerriissutigissavaat, aamma naatsumik allaqqasoqarsinnaalluni susoqarneranik,
sms-imut assingusumik. Taakku iluaqutaangaatsiartarput ikiusoqarniartillugu.
Ujaasinerit
Kalaallit Nunaanni Politiivini pigaartuinut nunami inunnik ujaasinernik 20-nik siorna suliassanngortinneqarsimapput, taakkunanngali qassit piniarnerup nalaani suliarineqarsimanersut ilisimaneqanngilaq. Pigaartut pisortaat Malik Olesenilli oqaatigaa piniarfiup nalaani nunami inunnik ujaasinerit annertusisartut.
- Ukiut tamaasa ujaasisoqartarpoq,
immaqa ilaquttat ernumallutik kalerrisaarisut piniartoq ullut arlallit
tutsaqarfigisimanagu, immaqalu isumaqatigiissimanatik ullut qassit
aavarniarlutik, taamaammat ernumalerlutik. Taamaalilluta naliliilluta ujaasinermik
aallartitsisinnaasarpugut.