Ittoqqortoormiit kitaani piffissamut aalajangersagaq malillugu nalunaaqqutaqartussaanngilaq

Kalaallit Nunanni piffissap aalajangersarneqarnera UTC-3-mut utertinneqassanersoq, aasaaneranilu nalunaaqutaq atorunnaarsinneqartassanersoq, Inatsisartut inaarutaasumik Sisamanngornermi novembarip 12-ianni aalajangiissapput.

Pituffimmi sakkutooqarfik silasiortarfillu Danmarkshavnimiittoq pinnagit, nuna tamakkerlugu piffissap aalajangersarneqarnera atorneqarpoq.

Ittoqqortoormiit 2024 sioqqullugu nammineq, piffissap aalajangersarneqarnera nammineq atugarisani atorpaa. Nunap sineriaani UTC-2-mut nuuttoqarnerata kingorna aalajangerneqarpoq, illoqarfik avannaata kangianiittoq UTC-1-miittoq aamma tassunga nuunneqassasoq.

Ittoqqortoormiinili innuttaasut paasivaat piffissap aalajangersarneqarnera Inatsisartunit akuerineqarpat UTC-3-mut – tassa nalunaaquttap akunnerinik marlunnik siuarsimasumut – nuuttariaqalersoq. Innuttaasulli tamanna kissaatiginngilaat.

Innuttaasullu piffissallu aalajangersarneqarnerata, allanngornera maanna malugisinnaalereerpaat.

- Taarsigaluttuinnarpoq. Taartalernera siusinnerulerpoq, ingammik ukiukkut ullup qeqqaniit taartalernera, nalunaaqutarlu ataasinngoraangat taarsilluinnartarpoq, Hans Brønlund Ittoqqortoormiini najukkami ataatsimiititaliami siulittaasoq oqarpoq.

Taassuma oqaatigaa inuit arlallit ukiukkut annertuumik isumatsaqqanermit, malunniutit misigisimagaat, aamma taartarnera sivisunerusalertoq malugineqarsinnaavoq.

Ittoqqortoormiini novembarip 23-aniit januaarip 18-ata tungaanut, kaperlannerani seqineq nuineq ajorpoq.

Iluaqutaasut ajoqutaasullu

Aamma atuakkit

Takussutissaq: Piffissaq pillugu qanoq pisoqarpa?

Timmisartukkut angallannermi nalunaaquttap-akunneri assigiinngitsut, aammattaaq sunniuteqarput. Ittoqqortoormiinukassatilluni Islandimit Nerlerit Inaat timmisartumik aqqusaarneqaqqaartariaqartut, tassanngaanniillu qulimiguulimmik aatsaat tikittoqarsinnaasoq, Hans Brønlundip oqaatigaa.

- Timmisartoq Islandimit ukiukkut tikippat, inuit amerlanerit Nerlerit Inaanni unnuisarput. Tassami taarpallaartillugu qulimiguulimmik timmisartorsinnaaneq ajorput. Ilaannikkut aqaguani silarlulertarpoq, taamaattumillu inuit ulluni arlalinni Nerlerit Inaanniittariaqartarput.

Ittoqqortoormiit UTC-1-imiikkallarmat nunattalu sinneraa UTC-3-miikkallarmat nalunaaquttap akunnerinik marlunnik nikingasarpoq. Taamaasisoqaqqinnissaa Hans Brønlundip taamaasisoqaqqinnissaa kissaatigaa.

Taassumali nassuerutigaa piffissap nikinganera suliffeqarfinnut inunnullu ataasiakkaanut sunniuteqartartoq, soorlu aningaaserivimmut nakorsiartarfimmulluunniit attaveqarniaraanni nalunaaquttap-akunneri marluk utaqqisoqartariaqartartoq.

Piffissaq aalajangersarneqarneranut apeqqut inuit peqqissusaat inuussutissarsiornerulluunniit soqutigisai pingaarnerussappata, tamanna UTC-3-mut uternissaq pillugu oqallinnermi annertuumik apeqqutaalissavoq.

Nunatta Nakorsaaneqarfia tusarniaanermut akissummi erseqqissarpaa allannguutit peqqissutsimut naliginnaasumik annikinnerusumillu pitsaasumik sunniuteqarsinnaasut, iluaqutissartaalu annikitsuinnaasut.

Ittoqqortoormiit nammineq piffissap aalajangersarneqarneranik atuilersinnaavoq

Siumut inatsisissatut siunnersuutaa, Inatsisartuni novembarip aqqaneq-aappaanni aalajangiiffigineqassaaq.

Naleraq aamma piffissap aalajangersarneqarneranik allannguiumavoq, Inatsisartunulli siunnersuutaa. oktobarip 21-ani itigartinneqarpoq. Siunnersuutit assigiinngissutaat pingaarnerpaaq tassaavoq Naleqqap piumasarimmagu Qaanaami, Tasiilami Ittoqqortoormiunilu innuttaasut tusarniaaffigineqassasut sumiiffinni taakkunani piffissamik allannguisoqartinnagu.

Ittoqqortoormiini najukkami ataatsimiisitaliaq tusarniaanermut akissuteqaammi allappoq illoqarfimmi innuttaasut Facebookikkut Naleqqap inatsisissatut siunnersuutaanut tusarniaaffigisimallugit.

Ittoqqortoormiit UTC-1-imut uternissaa tapersersorlugu innuttaasut 54-it taasipput, kitaatali sineriaa malillugu Ittoqqortoormiit UTC-3-mut pisinneqarnissaa tapersersorlugu, innuttaasut 53-it taasillutik.

Hans Brønlundilli isumasiuineq eqqortumik oqaatigisinnaanngilaa.

- Aasaanerani tusarniaanerup nalaani taamaaliorpugut, taamaammat kaperlak eqqarsaatiginngilluinnarpaat, oqaluttuarporlu illoqarfimmi inuppassuit UTC-1-imut uternissamik kissaateqartut oqaloqatigalugit, oqarpoq.

Siumut inatsisissatut siunnersuummi allappoq Naalakkersuisut aalajangersinnaagaat sumiiffinni aalajangersimasuni Kalaallit Nunaanni nalunaaqutaq nalinginnaasoq malillugu nalunaaquttap immikkoortinneqarneranit allaanerusumik nalunaaqutaqartitsisoqartassasoq.

Hans Brønlundip neriuutigaa inatsisissatut siunnersuut akuerineqarpat Naalakkersuisut periarfissaq tamanna atorluarumaaraat.

- Neriuppunga ukiukkut aasakkullu nalunaaquttap allanngortinneqarnissaa pillugu tusarniaanerit amerlanerulissasut, taamaalillutik inuit maani najugallit paasisaqarnerussammata.