Akerliussutsimik Nuummi takutitsisut Naalakkersuisut marluk oqaaseqarneranni avaallattaaginnavittut

“Naammaleqaaq, Naammaleqaaq Naammaleqaaq.” “Tunuarlik.” “Pinnguartut” oqaatsit tamakkua Nuummi Inatsisartoqarfiup saani ualeq manna tusarsaapput.

Innuttaasut Nuup qeqqani katersuuttarfimmi, Amisuni, ualimut pingasunut katersuupput. Taakkua Inatsisartoqarfiup tungaanut ingerlaaqatigiipput. Akerliussutsimik takutitsinermi Inatsisartunut qinerseqqinnissaq anguniagaasoq, aaqqissuisoq, Juulut Jeremiassen Sermitsiamut tallimanngornermi ilisimatitsivoq.

Juulut Jeremiassen Inatsisartunut Naalakkersuisunullu ilaasortat saanni sassapoq. Taassuma Namminersorlutik Oqartussat inaataanni attartortut akiliutaasa ukiumut 7 procentimik qaffanneqartarnissaanut Naalakkersuisut aalajangiinikuunerat isumaqatiginngivissorpaa. Taamatuttaarlu Naalakkersuisut angalaneri, Sermitsiap aggustip naanerani oqaluttuarisai, akerliussutsimik takutitsisut isoraat. 

Markus E. Olsen, Juulut Jeremiassenip oqaaseqarnerani eqqaani nikorfavoq. Taassuma suaartaat, megafoni, paaraa.

Napaattooq: Naalakkersuisut siulliorusunngillat 

Juulut Jeremiassen oqaaseqareermat qinikkat oqaaseqartussanngorput. Oqaaseqartorli siulleq Naalakkersuisuninngaanniinngilaq. Naleqqap politikkikkut oqaaseqartartua, Jens Napaattooq, sassartertuni siulliuvoq.

- Naalakkersuisut siulliorusunngillat. Illuatungiliuttut siulliuinnalerpugut, taanna oqarpoq. 

Taamalu oqartoq akerliussutsiminnik takutitsisut nillerput.

Naleqqameersup takkuttut qujaffigai:

- Qujanaq takugassiuk torinngitsumik ingerlasut.

- Qineqqusaarnermi qanoq neriorsorneqarpisi? Peqqinnissaqarfik pitsaanerulissasoq, aningaasarsiasi pitsaanerulissasut, Napaattooq oqarpoq.

Nivi Olsenip megafoni tigugaluaraa

Naleqqameersoq oqaaseqareermat, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Nivi Olsen (D), sassarteqqaaraluarpoq. Sulili oqaaseqanngitsoq akerliussutsimik takutitsisut sakkortuumik nipituumillu nillerput. Tassalu Nivi Olsen oqaaseqarneq ajulerpoq. Taamaalimmat Erik Jensenip (S) megafon tiguaa. Takutitsisut nipaarupput Jensenillu oqaasiinut tusarnaalerlutik.

- Akerliuneq ataqqeqatigiinnermik tunngaveqassasoq oqariartuutigissuara, taanna oqarpoq

Taamaalisinnarluni akerliulluni takkuttunut nersualaarivoq.

- Qineqqusaarutaannartut inissittoqassanngilaq, nikussaarniarta.

- Kamaqartoqarnera paasisinnaavarput. Pissutigalugu neriorsuutit piviusunngortinneqanngimmata, Erik Jensen oqarpoq.

Nivi Olsenip oqaaseqarnera tamaat avaallattut

Illuatungiliuttunit oqaaseqartoqareermat Naalakkersuisoq Nivi Olsen megafonimik aappassaanik tiguseqqippoq. Megafon tigummagu innuttaasut nillerput, taassumalu oqaaseqarnera tamaat avaallaqqapput. Taamaakkaluartoq Nivi Olsen oqariartuutiminik sapinngisani tamaat atorlugu takkuttunut apuussivoq, naak oqaatsini tamarmik paasineqarsimassasut ilimananngikkaluartoq.

Taassuma kusarnartumik takutitsineq oqariartuutaanut ilaavoq. Naalakkersuisullu millionilikkaanik atuillutik angalasimanerat aamma oqaasertalerpaa. 

- Eqqaamasiuk siulittaasorput angalasimanngikkaluarpat nunarput annaasimassagaluarparput! Asuli angalanngilagut. Isumaqatigiissusiorpugut, taanna oqarpoq.

Aningaasaqarnermut Naalakkersuisoq, Aqqaluaq B. Egede (IA), Nivi Olsen oqaaseqareermat oqaaseqarpoq. Taassuma partiimi Inuit Ataqatigiit oqariartuutaa anngullugu aallaqqaammut oqaatigeqqaarpaa. Taannali aamma takkuttunit nuannarineqanngeqaaq.  

- Ineqarnermut tunngasoq tusaavarput.

- Angalanermi aningaasartuuteqarput. Kisianni 1,9 milliardit koruuninik pissarsisimavugut. Oqaaseqarnera takisuujussanngilaq. Oqariartuutisi tusaavagut, Aqqaluaq B. Egede oqarpoq.

Kalaallit Nunaanni Politiit pigaartuisa pisortaata, Hans Peter Berthelsenip, Sermitsiamut oqarnera naapertorlugu akerliussutsimik Nuummi takutitsisut 100-it 150-illu missaannik amerlassuseqarput. Taakkua eqqissisimasumik takutitsisimasut taanna naliliivoq.

Sisimiuni aamma akerliussutsimik takutitsisoqarpoq. Tassani inuit 30-it missaat peqataasut, pigaartut pisortaata oqaluttuaraa.