Ærø Efterskolep kalaallit atuartut atugarissaarnerulersinniarpai
Kalaallit efterskolemi atuartut toqqissisimanerulissasut efterskolertarfik Ærømiittoq Fynip kujataaniittoq aalajangerpoq, taakkulu neriuutigaat ukiumi atuarfiusumi nutaami amerlanerusut atualerumaartut.
Ærømi napasuliamut majuarneq Pinngortitamiinnermi & Silamiinnermilu sammisassanut ilaavoq, aamma ilaatigut imaani qajariarnermik, orpinnut qallornermik, aalisarnermik aamma mountainbikingimik sammisaqarfiusoq
Assiliisoq: Ærø Efterskole
- Atuartut Atlantikup avannaaneersut toqqissisimasumik atugaqarnissaat qulakkeerniarlugu akisussaaffik tiguniarlugu aalajangerpugut. Atuartut uagutsinni toqqissisimanissaat pingaaruteqarpoq, pisortaagallartoq Lasse Bøgeskov Andersson Sermitsiamut oqarpoq.
Taamaasilluni Galtrup Efterskolemi ilinniartitsisoq kalaallinik atuartuuteqarnermik ukiorpassuarni misilittagaqartoq atorfinitsinneqassaaq, ilinniartitsisorlu taanna atuartunut ilinniakkanut tunngasunut attaveqaataassaaq: qallunaatut, tuluttut matematikkilu, taakkulu kalaallinut atuartunut misilitsiffiunissaannik piumasaqaateqarfiunngillat.
Ukioq manna efterskolertut 56-iupput, taakkunanngalu pingasut Kalaallit Nunaanneersuupput. 60-70-it angunissaat siunniunneqarpoq, taakkunanngalu qulit Kalaallit Nunaannit Savalimmiunilluunniit atuariartortuunissaat sulissutigineqarluni.
Atuarfiup ilinniartitsissutai assigiinngitsuupput, atuartut timikkut sammisaqarnermikkut unammillerneqarusuttunut, aammattaaq eqqumiitsuliornermik assassornermillu sammisaqarfiusut toqqarneqarsinnaallutik.
Ilinniarneqarsinnaasut ukuupput:
- Timersorneq
- Pinngortitamiinneq & Silamiinneq
- Tusagassiuutit & assiliisarneq
- Silap pissusia & Kulturi
- Eqqumiitsuliorneq
- Nerisassiorneq
- Piujuartitsinermik sanaartorneq
Ilinniartut Ærømiiginnarnatik Japanimut angalanissaq aamma aaqqissuunneqassaaq. Tassanilu ilinniartut kulturi immikkuullarissoq misigissavaat, "nerisassat immikkuullarissut usserniarlugit nunallu oqaluttuarisaaneranik soqutiginartumik paasisaqarlutik“, soorlu efterskolip nittartagaani allassimasoq.
