Atlantiku qulaallugu timmisartuussineq sisamanngornermi taamaatinneqarpoq – timmisartoq minnerusoq attartorneqartoq

Københavnip Nuullu akornanni timmisartuussinerit timmisartup timmisartuussisussap teknikkikkut ajornartorsiuteqarnera pissutigalugu sisamanngornermi taamaatinneqarput. Timmisartoq tallimanngorneq ilanngullugu atorneqarsinnaanngitsutut nalunaarutigineqarpoq.

Air Greenlandip nittartakkamini tamanna ilisimatitsissutigaa.

Timmisartoq minnerusoq, Airbus A320, timmisartuutileqatigiiffimmit DAT-imit Air Greenlandip taarsiullugu attartorpaa, taannalu tallimanngornermi timmisartuussissaaq.

– Timmisartoq A320 ikinnerusunik ilaasunut issiaveqarpoq, ajoraluartumillu ilaasunut arlalinnut allannguinermik tamanna kinguneqarpoq, Air Greenland allappoq.

Tallimanngornermi bilitsillit timmisartuussinernut marlunnut agguataarneqassapput. Ilaasussat pillugit Air Greenland sisamanngornermi ima allappoq:

– Ilaasut sisamanngornermi timmisartuussinernut GL781-imut GL782-imullu ilaasussat sapinngisamik tallimanngornermi ulloq novembarip 13-anni timmisartuussinernut ilaatinneqassapput. Ilaasulli sinneruttut ajoraluartumik arfininngornermi ulloq novembarip 14-ata tungaanut utaqqisariaqassapput, EuroAtlantic ulloq taanna timmisartuusseqqinnissaa naatsorsuutigaarput, Air Greenland allappoq.

Nassiussat sisamanngornermi tallimanngornermilu assartorneqartussatut, pilersaarutigineqartut arfininngornermi novembarip 14-anni assartorneqassasut naatsorsuutigineqarpoq, EuroAtlanticip timmisartuusseqqinnissaa naatsorsuutigineqarmat.

Angalasussat pineqartut angalanissamut pilersaarutertik nutaaq pillugu nalunaarfigineqassapput. Pisut pillugit paasissutissat amerlanerusut Air Greenlandip nittartagaani takukkit.