Kujataa, avannaa tunulu
Air Greenland unammilligassaqaqisoq nutaanik iliuuseqartoq
Silarluk teknikkikkullu ajutoornerit peqqutaallutik Air Greenland kujataani, avannaani tunumilu angallassiniarnera ajornakusoorpoq. Timmisartuussinissalli pitsanngorsarniarlugit timmisartortitseqatigiiffik assigiinngitsunik nutaanik iliuuseqarpoq.
Qulimiguulik H155 Uummannamiittoq teknikkikkut ajornartorsiuteqarnera pissutigalugu Air Greenland qulimiguulimmik allamik assiganik atuilerpoq.
Air Greenland
Avannaani kujataanilu
borgmesterit illoqarfiillu pingaarnersaanni politikerit Air
Greenlandip timmisartuussinissaraluamik taamaatitsiinnartarnera
naammagittaalliuutigaat. Timmisartortitseqatigiiffilli
isumannaallisaanermik ajoqusiinngitsumik angallannerup
pitsaanerunissaa anguniarlugu arlalinnik suliniuteqarpoq.
Avannaani qulimiguulimmik
ilaatigut taarsiisoqarpoq. Tunumi sermiiaat atorneqalerpoq
kujataanilu angallassineq sivitsorneqarpoq qulimiguulimmillu
ataatsimik ilasinikkut annertusineqarluni.
Sumiiffiit taakku pingasut
tulleriiaalaariartigit. Air Greenlandip tusagassiisartuini pisortap
Inga Dora G. Markussenip akissutai ataani atuarsinnaavatit:
Kujataa
- Kujataani sila
pissutigalugu piffissami kingullermi ajornartorsiuteqarpugut,
pingaartumik Qaqortup Narsarsuullu akornanni. Sumiiffiit akornanni
sikoqarsinnaaneranik aarlerisoqarnera pissutaalluni angallassinissat
ilaat kinguaattoorsimallutik. Ingammik weekendip ingerlanerani.
- Sikorsuit nalinginnaasumit siusinnerusukkut takkunneri unammilligassatta aapparaat. Tamanna Disko Linemut ilaasunillu angallassinermut unammillernarpoq, soorlu siorna aamma taamaassimasoq. Taamaattumik Attaveqaqatigiinnermut Naalakkersuisoqarfik aalajangerpoq Air Greenlandimik kiffartuussinissamik isumaqatigiissut annertusillugu immikkut isumaqatigiissusioqqinnissamik. Isumaqatigiissummi qulimiguulimmik AS350-imik marlunnik amerlanerusunik angallassisoqarsinnaanera qulakkeerneqarpoq. Isumaqatigiissut decembarip aallaqqaataanit februaarip 29-ata tungaanut atuuteqqaaraluartoq suli taanna naanngitsoq 2024-mi maajip 31-ata tungaanut sivitsorneqarluni.- Qulimiguulimmik ilasinerput imaatigut angallassisoqarsinnaatinnagu ilaasunik angallassinissamut iluaqutaassaaq.
Avannaa
- Uummannami
nunaqarfiinilu angalasut kinguaattoornerat ilumoorpoq, tamannalu
ajuusaarutigaarput.
- Qulimiguulik H155
Uummannamiittoq teknikkikkut nalinginnaanngitsumik
ajornartorsiuterpassuaqarsimavoq, nalunngilarpullu ilaasorpassuarnut
eqquisoq. Aammattaaq Ilulissat Uummannallu akornanni piffissami
kingullermi sila pissutaalluni taartissanik apuussiniarneq
kinguaattoorfiusimavoq.
- Qulimiguulik H155
sukkasuumik timmisinnaammat sila atoruminartillugu illoqarfiit
akornanni angallassisinnaanissaa periarfissaavoq. Tamannali
pitsaanerpaamik aaqqiissutissaanngilaq, timmisartuussinerit
sumiiffimmut aalajangersimasumut ingerlanneqartariaqartaramik,
tamannalu silarluup kinguneranik ilaannikkut
ajornakusoorsinnaasarluni. Taamaalisoqarpat qulimiguuliup
nalinginnaasumik angallassisarfiginngisaani aallarnaveerpat
sumiiffiit allat eqqugaassammata. Tamakku periarfissat
ataasiakkaarlugit nalilersorneqarput, angallassisinnaanermik
atugassarititaasut pilersaarutillu naammassinissaat
eqqarsaatigalugit.
- Qulimiguulik H155-ip
teknikkikkut ajornartorsiuteqarnera pissutigalugu kinguaattoornerit
2023-miilli appariartupiloorsimasut ilanngullugu
ilisimatitsissutigisinnaavarput. Uummannamili qulimiguulik
teknikkikkut nalinginnaanngitsumik ajornartorsiuteqarnerummat
aalajangerpugut Ilulissanut nuunniarlugu. Ilulissaniikkuni taartissai
teknikerillu sukkanerusumik tikissinnaammata. Tamanna Uummannap
nunaqarfiillu timmisartukkut angallanneqarluarnerulernissaannut
iluaqutaassaaq.
Tunu
- Tunu piffissami
kingullermi sivisuumik sila allanngorarpoq. Qulisimarujussuarpoq
imaliliortarluni nittangertarlunilu. Anorlerujussuaqattaarpoq aamma
sakkukinnerumaamik anorersuartarluni. Tamatuma kingunerisaanik
kitaanit Kulusummut timmisartuussinerit kiisalu Tasiilamut
nunaqarfinnullu qulimiguulimmik timmisartuussinerit
taamaatiinnarneqarput. Tamannalu angalasorpassuarnut ajoraluartumik
eqquivoq.
- Air Greenland ilaatigut
Mittarfeqarfiit suleqatigalugit ingerlatsinermik atuisullu
pitsanngorsaaniarluni arlalinnik suliniuteqarpoq.
- Kulusummi sermiiaat
atugassaq pissarsiaraarput sulisullu maskiinamik tamatuminnga
atuinissamut ilinniartillugit, Tasiilamilu heliporti qullernik
ikkussuiffigineratigut sivisunerusumik angallassisoqarsinnaanera
periarfissanngorlugu.
- Angallassinerup
aalajaannissaa anguniarlugu, ingammik aasakkut putsertarnerata
nalaani, umiarsuaatileqatigiiffinnik isumaqatigiissuteqarpugut
silaannakkut angallassisinnaannginnermi imaatigut
angallassisarnissamut. Taakkualu juulimiit oktobarimut
angallassisinnaapput.- Teknikkikkut
ajornartorsiuteqalissagaluarpat timmisartuussineq
ingerlatiinnarniarlugu Greenland Copters
isumaqatigiissuteqarfigaarput, taannalu oktobarimiit juunip tungaanut
taartatut atorneqarsinnaavoq.
- Timmisartoq Dash 8-t
arfineq-pingajussaat pisiaraarput sulisullu amerlillugit. Taakku
teknikkikkullu ajornartorsiortoqartillugu piareersimapput. Kulusummi
akunnittarfinni inissat amigalissagaluarpata Kulusummi
Mittarfeqarfiit suleqatigalugit siniffiit amerlanerusut
inissinneqarput, Aamma nerisassanik qerititsivinnillu pisivugut.
- Aammattaaq Kommuneqarfik Sermersooq suleqatigalugu
Kulusummi talittarfiliorpugut, taannalu imaatigut angallannermut
atorneqassaaq.
- Suliniutit taakku timmisartuussinissat piffissaq
eqqorlugu naammassineqarnissaannik oqilisaataassapput
pitsanngorsaataallutillu. Qulimiguulinnilli teknikkikkut
ajornartoortoqartillugu imaluunniit mittarfiit matoqqatillugit
timmisartuussisoqarnissaa periarfissaajuaannaannginneranik
allannguinngilaq. Angallassinissamulli periarfissat
naammassiniarlugit sapinngisarput tamaat sulivugut.