Suliffeqarfissuup ingerlatsinera 2024-mi aningaasarsiortitsisoq Greenland Airportsip naatsorsuutaani takuneqarsinnaavoq. Naatsorsueqqissaarnermili professori Frank Thinggaard naapertorlugu 130 millionit koruunit ingerlatsinermut ilaanngitsut naatsorsuinermut ilanngunneqarsimapput.
Aningaasat tamakkerlugit ilanngaatigineqarpata kisitsisit illuatungaat ersertarpoq: Suliffeqarfiup aningaasat isertitanit amerlanerusut atorpai. Tamanna piginnittunut suleqataannullu sunniuteqarpoq.
Suliffeqarfissuup ingerlatsinera 2024-mi aningaasarsiortitsisoq Greenland Airportsip naatsorsuutaani takuneqarsinnaavoq. Naatsorsueqqissaarnermili professori Frank Thinggaard naapertorlugu 130 millionit koruunit ingerlatsinermut ilaanngitsut naatsorsuinermut ilanngunneqarsimapput.
Aningaasat tamakkerlugit ilanngaatigineqarpata kisitsisit illuatungaat ersertarpoq: Suliffeqarfiup aningaasat isertitanit amerlanerusut atorpai. Tamanna piginnittunut suleqataannullu sunniuteqarpoq.
- Taamaalilluni uanga naliliinera naapertorlugu naatsorsuinermi kukkuneq annertuvoq, Frank Thinggaard oqarpoq.
Taanna Aarhus Universitetimi Institut for Virksomhedsledelse-mi, tassa suliffeqarfinnik aqutsinermi ilisimatusarfimmi, avataanit naatsorsuuserineq pillugu professoriuvoq.
130 millionit koruunit taarsigassarsiat allanngortinneqarneranni nalingata appariarneranit iluanaarutigineqarput. Taamaammat Frank Thinggaardip naliliinera naapertorlugu Greenland Airportsip aningaasat taakku 2024-mi ingerlatsinermit isertitatut ilanngussimasussaagaluarpai.
- Iluanaarutit isertitaqassutaanngillat. Taamaammat suliffeqarfimmi ingerlatsinermi anigaasat kaaviiaartut naatsorsorneqaraangata ilanngaatigineqartartussaapput.
Aningaasanik taarsigassarsiat pisoqqat taarserneqaraangata nutaanillu taarsigassarsisoqaraangat akiliutit aningaasanik kaaviiaartitsinermut naatsorsuutinut ilaasarput, taanna nassuiaavoq.
Greenland Airportsip allaaserisat siuliini aningaasat sumiiffii erseqqissumik oqaatigiumasimanngimmagit Sermitsiap professori naatsorsuutitigut paasissutissanik taakkuninnga misissueqquaa. Ingerlatseqatigiiffiup tamanna suli maannamut oqaatigiumanngilaa.
87 millioninit sinneqartooruteqarnermit 43 millioninik amigartooruteqarnermut
Kisitsisit taakkua aningaasat ingerlaarnerannut, tassa isertitanut akileraarutinullu, tunngassuteqarput. Kisitsisit taakku ingerlatseqatigiiffiup sinneqartoorutaanut paarlaanneqassanngillat.
Aningaasat ingerlaarneri pillugit naatsorsuinermi suliffeqarfissuarmi ingerlatsineq aningaasartuuteqarnermiit 87 millionit koruunit missaannik isertitaqarnerusimasoq takuneqarsinnaavoq.
130 millionit koruunit assortuussutigineqartut tamarmik naatsorsuutinit ilanngaatigineqassappata, tamanna illuatungaanut sunniuteqassaaq. Taamaatsillugu ingerlatsineq isertitaqarnermiit 43 millionit koruuninik aningaasartuuteqarfiuneruvoq.
- Piginnittoq, aningaasaliisoq, taarsigassarsisitsisoq imaluunniit misissuisartoq taamaalilluni allaanerulluinnartumik paasisaqarpoq, aamma eqqortumik inissiisoqarluni aningaasat ingerlaartut tamarmiusut annertussusaat allanngornavianngikkaluarpalluunniit, Frank Thinggaard oqarpoq.
Tamanna ingerlatsinermimi aningaasat isertitat sinnerlugit atorneqarpata pingaaruteqarmat amigaatigineqarsinnaasut ingerlatseqatigiiffiup aningaasaatai allanilluunniit aningaasalersorneqartariaqarput.
Naqqiinermi Greenland Airports piitsuunerulernavianngilaq. Professorili naapertorlugu ingerlatsinermit aningaasanut nakkartitsineq eqqunngitsumik ersersinneqartoq iluarsiivigineqassaaq.
– Ineriartornermi allanngorneq naatsorsuutiniluunniit pingaarnerni allannguineq oqartussaasut kukkunerup annertuuneranik nalilersuinerminni maluginiartarpaat, Frank Thinggaard erseqqissaavoq.
Kukkunerup annertussusianik nalilersuineq naatsorsueqqissaarnerni tulliuttuni qanoq iliuuseqarfigineqarnissaanuttaaq aalajangiisuuvoq.
- Kukkuneq annertuppat, naatsorsuutit kingusinnerusukkut suliarineqarneranni iluarsineqassaaq, professori nangippoq.
Ajornartorsiut taannarpiaq ukiuni tulleriinni?
Professori ilumoorpat ukiut marluk tulleriisiinnarlugit millioninik pingasunik kisitsisitalinnik kukkusumik inissiisoqarnera pissutigalugu Greenland Airportsip ingerlatsinera aningaasanik nakkaatitsivimmut ikisitsilluni aningaasanillu tigusisoqartutut isikkoqalersimavoq.
Suliffeqarfissuup 2025-mut naatsorsuutaani aamma taama pisoqartoq Sermitsiap ukiaq manna paasivaa. Tassani 364 millionit koruunit kukkusumik aningaasatut ingerlatsinermi isertitatut allassimagaluarput. Taamaammat naatsorsuutit ingerlatsinermi 145 millionit koruuninik iluanaaruteqarfiusutut isikkoqarput. Kukkusoqaarsimanngitsuuppat amigartoorutit 219 millioniussagaluarput.
– Kukkussut nassuerutigalugulu akisussaaffimmik tigusivugut, pisortaaneq Jens Lauridsen taamanikkut Sermitsiamut oqarpoq.
Aningaasaqarnermut pisortap Per Stjærnholm Trærupip tamanna Excelimi piaarinani kukkunerunerarpaa. Suliffeqarfiullu tamanna iluaqutaasimanngitsoq erseqqissarpaa.
Akissut erseqqissumik nassuiaateqarani attatiinnaraa
Akerlianilli Greenland Airports 2024-mi naatsorsuutini 130 millionit koruunit pillugit suli erseqqissumik nassuiaateqanngilaq. Greenland Airportsimi siulersuisuini siulittaasoq Jens Wittrup Willumsen aningaasat pineqartut pillugit Sermitsiamut siornatigut allagaqarnikuuvoq.
- Allatut nalilerneqarsinnaasimasinnaagaluartut nassuerutigissavarput. Aningaaseriviit suleqatilluunniit allat naliliineq tamanna pissutigalugu eqqugaanngitsut aamma erseqqissaatigerusupparput, siulittaasoq oqarpoq.
Jens Wittrup Willumsenip aningaasat allamut allanneqarsimasut taamatut oqarnermigut nassuerutigaa, kukkusumilli paasissutissiisoqarsimanera nassuerutiginngilaa.
Tamatumunnga atatillugu ingerlatseqatigiiffiup akissutaa siusinnerusukkut oqaatigineqartumit allannguuteqanngitsoq Per Stjærnholm Trærup Sermitsiamut oqarpoq.
- Siusinnerusukkut akissutigisatsitut 2024-mut aningaasat ingerlaarneri pillugit nalunaarusiaq naleqqulluartumik saqqummiunneqarsimasoq suli isumaqarpugut, aningaasaqarnermut pisortaq allappoq.
Aningaasat ingerlaarneri qanoq naatsorsuutigineqartarnissaat pillugu malittarisassat iluanni assigiinngitsunik isumaqartoqarsinnaanera Greenland Airportsip erseqqissarpaa.
- Tamanna tunngavigalugu ukiumut nalunaarusiap ataatsimut isigalugu eqqortumik saqqummiussineranik naliliisimanerput allanngortinngilarput, aningaasaqarnermut pisortaq allappoq.
Greenland Airportsip taamaalilluni 130 millionit koruunit kukkusumik inissinneqarsimanerat nassuerutiginngilaa. Ingerlatseqatigiiffik aningaasat inissinneqarsimanerannut tunngatillugu suli tunngavilersuinngilaq. Aamma professorip Frank Thinggaardip naliliinera akerlilersuiffigineqanngilaq.
Ingerlatseqatigiiffiup akissutaa erseqqinngitsoq Transparency International Greenlandimit siornatigut isornartorsiorneqarpoq.
Aningaasaqarnermut pisortap akissutaa ingerlatseqatigiiffiup kukkunersiuisuinik, Grønlands Revisionimik, ullumikkut Grant Thornton Danmarkip ataaniittunik, suleqateqarluni suliarineqarpoq. Grønlands Revisionittaaq 2024-mi naatsorsuutit kukkunersiorpai.
