Air Greenland utiinnartariaqarnermut: Naamik, misiliiniaannarluta misiliisanngilagut
Timmisartorsuaq Nuummut ingerlaartoq sapaatip-akunnerani kingullermi marloriarluni utiinnarpoq. Piffissami aallarfimmi ajunngitsutut isikkoqarpoq, Air Greenland paasissutissiivoq. Missinnaagaluarluni utiinnartoqarnissaa pisariaqalersinnaasartoq aamma paasinarsivoq.
Nuummut anorlernerani minnissap taamaatiinnarneqarneranit isikkivik. Tuukkaq mittarfik sisamanngormat marloriarlugu qulaakkaluariarlugu minngitsoorpoq.
Assi: Morten Okkels
Air Greenlandip timmisartorsua sapaatip-akunnerani kingullermi marloriarluni Nuummukaraluarsinnarluni utiinnarpoq.
Siullermik ataasinngornermi marsip qulingani Tuukkaq Tasiilaq nallinngilaarlugu Københavnimut uterpoq.
Timmisartuussinissaq aallaqqaammulli sooq taamaatiinnarneqarsimannginnersoq, tassa DMI-mi silasiortut ataasinngornermi ullaap tungaani Nuummi anorersuarnissaanik ilimasaaruteqarnikuummata, Air Greenland aperaarput. Piffissami aallarnerup nalaani isikkivigissimanera pissutaasoq Air Greenland paasissutissiivoq.
- Minnissatsinnut ajornartorsiuteqassagutta soorunami aallarnavianngilagut, tamannami sianiilliornerussagaluarpoq, Piujuartitsinermut Attaveqaqatigiinnermullu pisortaq Inga Dóra Markussen oqarpoq.
- Nakkutiginnittoqarpugut sunik tamanik nakkutilliisunik, sila pillugu paasissutissanillu allanik pingaarutilinnik aallaaveqartunik aalajangiisartunik - silasiortunullu toqqaannartumik attaveqartarluta.
Utaqqiinnarsinnaanngitsut
Ajoraluartumik issittumi sila allanngupallassinnaasartoq ilanngullugu oqaatigaa. Tuukkaq ataasinngormat missinnaagaluarluni taamaaliunngilaq, Piujuartitsinermut Attaveqaqatigiinnermullu pisortaq oqarpoq.
- Ilaasut timmisartumiit anisinnaajunnannginnerat ajornartorsiutaagami. Anorlerpallaarnera pissutigalugu ilaasunut majuartarfiit atorneqarsinnaasimannginnamik.
Københavnimulli uternatik mittarfimmi anori qatsorseerusunnerussanngikkaluarpaat?
– Aap, kisianni akunnerit arlaliusinnaagamik, timmisartuussinermilu malittarisassaqarpoq maleruagassatsinnik. Sulisut qasuersaarfissaat aamma timmisartup uteqqinnissaanut piffissarititaasut maleruartussaavagut. Tuukkaq Københavnimi timmisartoqarfeqarpoq, piffissallu aalajangersimasup iluani Danmarkimut utertariaqartarpugut, Inga Dóra Markussen oqarpoq.
Sisamanngornermi marsip 13-ianni ajoraluartumik sila ajorseqqippoq, timmisartorsuarlu utiinnartariaqaqqilerluni:
– Sisamanngornermi ilimagisimagaluarparput anorersuaq aatsaat nalunaaqutaq sisamanut takkutissasoq. Tamanna tupaallaatigaarput, taamaattumillu Nuuk nallereeraluarlugu utiinnartariaqarsimalluta, Inga Dóra Markussen oqarpoq.
App-ikkut aarlerisaarutit
Ulloq taanna DMI-mit aarlerisaaruteqartoqarsimanngilaq. Atuartartut ilaasa sila pillugu app-imi anorlertoq maluginiarsimavaat, tupigusuutigalugulu timmisartuussisoqaannarnissaa. Tamanna tupinnarpallaanngitsoq akissutigineqarpoq.
- Silamut timmisartunullu tunngasut app-it atorlugit inerniliisoqartarnissaata mianersuutiginissaa kaammattuutigerusuppara. Malinnaalluni ajunngilaq, app-illi taakku pivisumi pissutsit ajornakusoornerusut timmisartortartutta nakkutilliisuttalu sulinerminnut aallaavigisaat paasissutissiissutigineq ajorpaat.
- Assersuutigalugu sisamanngornermi anori kisimi ajornartorsiutaanngilaq, aammali timmisartup sajuttarnera ajornartorsiutaavoq – ilaasullu aperigukkit tamanna uppernarsarsinnaagaat ilimagaara, Inga Dóra Markussen oqarpoq.
Timmisartoq sapaatip-akunneranut marloriarluni utiinnarpoq, tamannalu ilissinnut ilaasunullu kalluaalluni. Københavnimiit misiliillusi aallarnermiit aallanngiinnarnissaq pitsaanerunersoq eqqarsaatersuutigisimannginnerpisiuk?
– Misiliiniaannarluta misiliisanngilagut. Ilisimasavut tunngavigalugit pisunut aalajangiisarpugut. Issittumi sila allanngoriataarsinnaasarpoq, taamaattumillu pissutsit allanngorsinnaasarlutik. Taamaattoqartillugu sillimaniarneq eqqarsaatigalugu nutaamik aalajangiisariaqartarpugut, Inga Dóra Markussen oqarpoq.
Portugalimi timmisartortitseqatigiiffik Hi Fly ikiortigineqarpoq, timmisartuussinissamullu pilersaarutit nutaat malillugit ingerlapput. Taamaattumik januaarimisut ajornartoortoqarani, tassa silarlunneranit mittarfiullu quasarpallaarneranit kinguaattoortoqarmat ilaasut amerlasuut ingerlariaqqinnaaveeraluarput.
