Air Greenlandip aqutsisuini angut nutaaq
Amerikamiu Chris Shern Air Greenlandimi niuernermi ingerlatsinermut pisortatut atorfinitsinneqarpoq.
Foto: Oscar Scott Carl
Air Greenlandimi niuernermik ingerlatsinermi pisortaq nutaaq Chris Shern novembarip aallaqqaataani aallartissaaq, Air Greenland aamma Chris Shern LinkedInimi allapput.
- Nutaamik aallartinnissannut qilanaaqaanga, inuttut suliffimmilu. Air Greenlandimi, suliffeqarfimmi inuiaqatigiinnut pingaaruteqartumi, suleqataanissannut qilanaaqaanga, Chris Shern allappoq.
Chris Shern Amerikamiuuvoq ukiorpassuarnili Danmarkimi najugaqarsimalluni. Ilaatigut Danmarkimi Henley Business Schoolimi misilittagaqarluarpoq ukiunilu 21-ni SAS-imi assigiinngitsuni aqutsisutut atorfeqarsimalluni. Chris Shern atorfittaarnini pissutigalugu Nuummut nuuppoq.
Air Greenlandip pisortaanerata suleqatigiinnissaq qilanaaraa:
– Air Greenlandip inuiaqatigiinnut akisussaaffitsinnik aallutsiutigaluta niuerfimmi inissisimaffitsinnik pitsanngorsaanissatsinnut anguniagaqarnitsinnut Chris tulluartupilussuuvoq, Jacob Nitter Sørensen oqarpoq.
