Air Greenlandip United Airlinesilu suleqatigiilernertik isumalluarfigigaat
Nuup avataaniittut billitsi ataaseq atorlugu USA-p Kalaallit Nunaatalu akornanni maanna timmisartortoqarsinnaanngillat. Siunissamili tamanna allanngorsinnaavoq, timmisartortitseqatigiiffiit taakku marluk New Yorkimut timmisartuussisoqartalereernerani nalunaarput.
New Yorkimiit timmisartuussineq nutaaq arfininngornermi juunip 14-ianni Nuummi mittarfimmi Patrick Quaylep oqalugiareernerata kingorna atoqqaartinneqarpoq.
Assi: Oscar Scott Carl
United Airlinesip nittartagaani New Yorkimiit Sisimiunut Ilulissanulluunniit bilitsissarsiortoqarsinnaagaluarluni pisisoqarsinnaanngilaq. United Airlinesip Nuummut aqqutaa kisimi pisiarineqarsinnaavoq, sinerissallu sinneranut ingerlaqqiffissat pisiarineqarsinnaanatik.
Patrick Quaylep, United Airlinesimi pilersaarusiornermi suleqatigiinneq pillugu pisortap tulliata, qanittukkut USA-mut timmisartuussineq nutaaq ammarneqarmat tamanna uppernarsarpaa. Tamakkua periarfissanngorsinnaanerannut piffissaq sivisunerusoq pisariaqartoq taassuma naqissuserpaa.
United Airlinesili siunissami suleqatigiinnissamut ammavoq, taamaalilluni atuisut Unitedip aqqutaanut nutaamut nunallu iluani Air Greenlandimut bilitsit ataatsikkut inniminnersinnaalersinnaallugit.
- Nuummut timmisartuussisarneq nutaaq assut soqutigineqarpoq. Aqqutip nutaap ammanerani aatsaat taama sukkatigisumik inissat nungupput. Unitedip ilaasorisartagaasa Kalaallit Nunaanni misigisassarsiornissartik qilanaarigaat tamatuma takutippaa, Patrick Quayle oqarpoq.
Patrick Quayle naapertorlugu United Airlinesimut ilaasut arlallit Nuummiit Kalaallit Nunaata sinneranut ingerlaqqinnisamut billetseqarput.
– Air Greenlandimik angalanermit pitsaanerusumik periarfissaqanngilaq. Timmisartuutileqatigiiffiit taakku marluk akornanni periarfissat nutaat, aqqut nutaaq tamannalu aqqutigalugu ammarneqarsinnaasut USA-llu Kalaallit Nunaannilu sumiiffiit allat akornanni angalanissamut periarfissat nutaat qilanaaraakka, oqarpoq.
Nunatsinnut tamarmut iluaqutaasoq
Air Greenlandip United Airlinesillu isumaqatigiissutaat USA-p Nunattalu sinneranit timmisartumik angalasunut iluaqutaassaaq.
Taamaalillutik ataasiaannarlutik angalanissamut tunniussissapput, angalanissaq taamaatinneqassagaluarpat kinguaattoortoqassagaluarpalluunniit pitsaanerusumik atugaqalissaqalissallutik.
Air Greenlandip aamma aaqqiissutissat allat eqqarsaatigai:
– Tamanna Kalaallit Nunaannut tamarmut iluaqutaasinnaavoq, Air Greenlandillu nunap iluani timmisartuussisarnini ingerlatiinnarsinnaavaa, pisortaaneq Jacob Nitter Sørensen oqarpoq.
– Taamaattumik Unitedip Air Greenlandillu suleqatigiinnissaq pillugu qanimut oqaloqatigiinnerat qilanaarnarpoq, neriunarlunilu tamanna ingerlaavartumik bilitsinik ataqatigiittunik angalanermullu periarfissaqalersitsissasoq. Suleqatigiinneq aqqutissaavoq, naqissusiivoq.
Air Greenlandip periarfissat nutaat kingusinnerpaamik 2026-mi aasakkut atulersinneqarsinnaassasut neriuutigalugulu ilimagaa. United Airlines New Yorkimi Newarkimiit aasakkut angallassisarpoq, tassalu juunip qaammataaniit septembarip tungaanut.
Teknikkikkut ajoquteqarneq pissutigalugu inniminniinermut systemikkut Kalaallit Nunaannut angalaffissanik ujaasisoqarsinnaalereersoq United Airlinesip ilisimatitsissutigaa. Tamanna nutarterneqarpat aaqqinneqassaaq, tusagassisartut allapput.
