Ajornartorsiulernermi iluatsittumik minneq

Tyskit timmisartuaraat Piper PA-46 Malibu ataatsimik motoorilik Narsuarsuup kujammut kitaani 56 sømiilisut ungasitsigisumi Davisstrædimi motooriminik siorna juulip 29-iani unittoormat ajutuuinnissaq aarlerinarpoq. Timmisartumik ingerlatsisoq ilaasorlu ataaseq timmisartumiipput. Motoorip unittoornera imaanut mittariaqalernermik kinguneqarpoq.

Qujanartumillu timmisartumik ingerlatsisoq pikkorissuuvoq, taassumalu ajornartorsiulernermi minnissaq sioqqullugu minnerminnilu suut tamaasa eqqortumik ingerlappai. Qujanartumik qaamallunilu silagippoq – isikkivigilluni anoreqaranilu, qujanartumillu aamma Issittumi Sakkutooqarfik nalaatsortumik Challengerimik timmisartoqarpoq, sinerissamilu nakkutilliissut Triton piffimmiippoq.

Taamaammallu ajornartorsiulernermi minneq ajunaarnermik kinguneqarsinnaasoq iluatsippoq, timmisartumimmi ingerlatsisoq ilaasorlu annanniumminniittut Tritonip gummibådianit ajornartorsiorlutik minnerannit minutsit 50-t qaangiuttut qaqinneqarput. Nalunaaquttap akunnerata ataatsip missaata qaangiunnerani timmisartoq 75 – 500 meterisut itissuseqassangatinneqartumi kivivoq.

Uuliakoortoq

Maannakkullu Statens haverikommission for Luftfart pisoq pillugu nalunaarusiaminik saqqummiussivoq, taannalu pingaarnertut timmisartumik ingerlatsisumik, Issittumi Sakkutooqarfimmi sulisunik oqaloqatiginninnernik kiisalu timmisartoq pillugu teknikikkut nalunaarusianik toqqammaveqarpoq, timmisartorli imaanit qaqinneqanngilaq. Taamaammat timmisartup motoorianik unittoortoqarneranut patsisaasumik Haverikommissioni tikkuagassaqanngilaq, motoorimilli uuliamik aniasoqarnera patsisaagunartoq allapput.

- Timmisartoq itisoorujussuarmiippoq, taamaammallu timmisartup qaqinneqarneranut aningaasartuutit misissuinerup inernissaanut naapertuutinngitsut nalilerparput, Statens Havarikommission for Luftfartimi misissuisoq Carsten Pedersen oqarpoq.

- Timmisartup imaaniinnerani videokkut assilisat timmisartup ajoquteqarneranik takutitsinngillat – timmisartumilu uuliakoornermik takussutissaqanngilaq.

- Timmisartup pineqartup ajoquteqarneranut takussutissaqanngilaq. Piper PA-46 Malibu timmisartutut qajannaatsutut ilisimaneqarpoq, tamannalu kiisalu inuup inuuneranik annaasaqannginneq, timmisartup qaqinneqarnissaata pisariaqannginneranik naliliinitsinnut patsisaavoq.

- Pisoq allaanerusumik inerneqarsimasuuppat, soorlu ajunaartoqarluni, taava timmisartoq qaqinniarsimassagaluarparput. Pisumili uani tamanna siunertaqanngitsoq nalilerparput.

- Timmissartornerup isumannaatsuunissaa suliassatsinni pingaarnerpaavoq – pisumilu uani tamanna timmisartumut namminermut, pisullu passunneqarneranut kinguneqaateqanngitsoq naliliivugut.

Ajornartorsiornermi minneq pitsaalluinnartoq

Ajornartorsiornermi minnerup pitsaasumik kinguneqarneranut timmisartumik ingerlatsisup pan-panimik kingornalu maydayimik nalunaaruteqarluni iliuusissarpiaminik iliuuseqarnera, pitsaalluinnartumillu minnera, Haverikommissionip nalunaarusiamini inerniliutigaa. Timmisartumik ingerlatsisup ilaasullu annanniutinik atisaqarnerat, timmisartullu annanniutaata pullattakkap piareeqqanera erseqqissarneqarpoq, taamaalillunilu taakku minnermik kinguninngua timmisartoq isumannaatsumik qimassinnaasimavaat.

- Timmisartumik ingerlatsisup piareersarluarsimanera oqaatigisariaqarpara. Annanniut timmisartumi piareeqqavoq – timmisartorlu imaanut mimmat, timmisartup matuata qulliup ammaneratigut masalernani annanniummut ikisoqarsinnaasimavoq. Tamanna pitsaalluinnartumik ingerlanneqarpoq. Nersorneqartariaqartumik sulineruvoq, Carsten Pedersen oqarpoq.

Tyskit timmisartuat ulloq tamanna Canadami Goose Bayimit Narsarsuup tungaanut aallarpoq.

Timmisartumik ingerlatsisoq angut 56-inik ukiulik nalunaaquttap akunnerini 17.000-ini timmisartornermik misilittagaqarpoq. Ilaasoq flymekanikeritut ilinniarsimasuuvoq, taamatullu aamma timmisartumik ingerlatsisinnaasutut allagartaqarpoq, nalunaaquttallu akunnerini 900-ni timmisartornermik misilittagaqarluni. Angutit taakku marluk timmisartumik piginneqatigiipput.

Tyskit marluk taakku timmisartunik takutitsinerit annersaannit Airventuremi, ukiut tamaasa USA-p avannamut kangiani tasersuit angisoorsuit eqqaanni Wisconsinimi Oshkoshimi ingerlanneqartartumit Tysklandimut angerlarlutik ingerlaarput.

Annaassiniarneq annertooq

Timmisartumik ingerlatsisoq maydayimik nalunaaruteqarmat, nalunaarut Nuummi Naviairimi Issittumilu Sakkutooqarfimmit tusarneqarpoq. Timmisartoq Challenger kiisalu sinissamik nakkutilliissut Triton qanittumiittut paasinarsivoq. Challengerimi inuttat timmisartoq sumiiffissilertorpaat, imaanullu mikkiartornera qulaaniit malinnaaffigaat.

Ajornartorsiornermi minnerup kingorna angutit marluk timmisartortik qimallugu annanniumminnut ikipput, Challengerimilu inuttanut usserarlutik, timmisartorlu piffiup qulaanit qimagunnani kaaviiaarpoq.

Tamanna sioqqullugu sinerissamik nakkutilliissut Triton annanniutip tungaanut ingerlaarpoq, minnermillu minutsit 50-t qaangiunneranit inuttat marluk Tritonip gummibådianut qaqinneqarput. Tritonimi nakorsamit misissorneqarput Qaqortumullu oqqunneqarput, tassanilu Kalaallit Nunaanni politiinit apersorneqarput.

Timmisartup iluatsittumik ajornartorsiorluni minnera nunarsuarmi tusagassiuutinut siaruaappoq. Nutaarsiassatsialaavormi, timmisartummi issittup imartaani nilleqisumi motooriminik unittoornera aviisinik atuartartut TV-kullu isiginnaartut amerlanersaannik qiiaammisitsisinnaalluarpoq.

Ajornartorsiorluni minneq Sermitsiaq 2024/32-mi sukumiisumik allaaserineqarpoq