Angallannermut Aqutsisoqarfiup Nuummi timmisartunik aqutsisoqarneq akueraa – killilersuutit atorunnaariartuaassapput
Nuup mittarfiata qulaani silaannakkut angalasut timmisartumik aqutsisut sisamanngornerup ullaavaniit aqussinnaanngussavaat. Taamaalillunilu mittarfimmi killilersuutit siorna sukaterneqarnerat atorunnaariartuaartussanngorput.
Aasaanerani angallannerpaaffik sioqqullugu timmisartunik aqutsisoqalerneq inissinneqarpoq.
Assi: Oscar Scott Carl
Angallannermut Aqutsisoqarfiup Nuup Mittarfiani timmisartunik
aqutsisoqalerneq maleruagassanik pisariaqartunik naammassinnittoq
uppernarsarpaa. Taamaalilluni timmisartunik aqutsisut Nuummi qulaani
silaannakkut angalasunik sisamanngornerup ullaavaniit
aqutsisinnaalerput.
–
Qaammatini tulliuttuni aasaanerani angallannerpaaffiup
aallartinnginnerani Nuuk qulaallugu silaannakkut angallannerup
nakkutigineqarsinnaalernera tamanut suliassaasimavoq
imaannaanngitsoq, Angallannermik Aqutsisoqarfimmi pisortap tullia
Lars Korsholm oqarpoq.
TIMMISARTUNIK AQUTSISUT PILLUGIT PAASISAT
Akuersissuteqarnermi Nuummi Mittarfiup silaannartaani sumiiffik killilersugaasoq– taaneqartartoq Terminal Maneuvering Area imaluunniit TMA-ginnartut taagorneqartoq – pilersinneqassaaq, tassani timmisartunut aqutsisut mittarfimmut mittarfimmiillu timmisartumik angallanneq alapernaarsussallugu nakkutigissallugulu.
Siunissami mittarfimmut mittarfimmiillu timmisartumik angallanneq Nuummi Naviair-ip timmisartunut paasissutissiisarfianiit timmisartunut aqutsisunit suliaqarfigineqassaaq.
Timmisartunut aqutsisut Nuummi Mittarfimmi AFIS-imi sullissisut, aallarnernut minnernullu atatillugu mittarfimmut qaninneruneranni timmisartortartunut siunnersuisussat paasissutissiisussallu, qanimut peqatigalugit sulissapput.
Timmisartunik aqutsinermut aaqqiissutissami nutaami tassani mittarfiup ammasarfii malinneqassapput, taamaalillunilu 06:00-miit 21:00-mut nalinginnaasumik ammasassalluni. Tassaniipput angallannerup annertunerpaaffiani ulloq unnuarlu nalunaaquttap akunneri.
Tusarfik: Greenland Airports
–
Taamaattumik ataatsimoorluta suliniuteqarnitsigut anguniagaq
naammassisinnaagatsigu nuannaarutigaara, maannalu Greenland Airports
piffissami pisariaqartitsiffiusumi timmisartuussinerusinnaalermat,
nangippoq.
Timmisartunik
aqutsisoqalerneq Nuup mittarfianut siuariaallaataaqaaq,
Angallannermummi Aqutsisoqarfiup timmisartut qanoq akulikitsigisumik
tikissinnaanerat siorna killilersuiffigilerpaa.
Timmisartunik
aqutsisoqalerneq pissutigalugu killilersuinerit taakku maannamiit
atorunnaariartuaartussanngorput.
-
Timmisartut nalunaaquttap-akunnerata iluani tikissinnaasut sisamaniit arfineq-pingasunut maajip 14-ianni qaffanneqassapput, sapaatillu
akunnerini tulliuttuni timmisartut nalunaaquttap-akunneranut
amerlanerpaamik 15-inut amerliartortinneqassallutik, Angallannermut
Aqutsisoqarfik ilisimatitsivoq.
Patajaannerullunilu sunniuteqarluarnerusoq
Taamaattumik
Greenland Airportsip ullumi aalajangiineq pingaarutilik soorunami
nuannaarutigaa.
-
Timmisartunik aqutsinermut aaqqiissutissap nutaap atulernerani Nuummi
Mittarfimmi angallannerup patajaannerusumik
sunniuteqarluarnerusumillu iliuuseqarfiginissaanut nukittunerusunik
tunngavissaqalissaagut, Greenland Airportsimi ingerlatsinermut
pisortaq Mie Rajcic oqarpoq.
-
Tamanna mittarfiup ammanerani angallannerup ingerlatinnissaanut
pitsaanerusunik tunngavissaqalersitsivoq, peqatigisaanillu Nuummi
ingerlatsinerup ineriartorteqqinnissaanut alloriarnerulluni
pingaaruteqartoq, nangippoq.
Naalagaaffiup
ataaniittup Naviairip Nuummi qullersaqarfianiit silaannakkut
angallanneq nakkutigineqassaaq. Taakku Issittumi Sakkutooqarfik
illoqatigaat.
Timmisartunik
aqutsisoqarnermik aaqqiissut TMA-mik taaneqartarpoq. Timmisartunik
aqutsisut timmisartup ingerlanerani qutsissutsip aalajangersimasup
tungaanut nakkutigisassavaat. AFIS-illu mittarfimmi sulisut
timmisartortartut qangattalernerini milernerinilu
ilitsersortassallugit.
