Tusassip sinneqartoorutini 179,5 mio. koruuninut qaffakkai

Tusass Namminersorlutik Oqartussanit pigineqartoq pingasunngorpat ataatsimeersuassaaq, ingerlatseqatigiiffiullu tamatuma saniatigut 2025-mut naatsorsuutit saqqummiutissavai.

Tusass 2025-mi 179,5 millionit koruuninik sinneqartooruteqarpoq, tassa 2024-mi akileraarutit suli ilanngaatiginagit 169,9 millionit koruuninik sinneqartoorutinit 9,6 millionit koruuninik qaffasinneruvoq.

- Angusat missingersuutigineqartut 160-170 million koruuniusut sinnermagit tamanna angusatsialattut isigineqarpoq, Tusass nalunaarusiami allappoq.

Ukioq manna akileraarutit ilanngaatigereerlugit sinneqartoorutit 134,2 millionit koruuniullutillu kaaviiaartitat 804,8 millionit koruuniupput.

Tusassip ileqquusoq malillugu sinneqartoorut ilai Namminersorlutik Oqartussanut tunniuttussaavai, 60 millionit koruuninillu tunniussisoqassasoq siunnersuutigineqarpoq. Tunniussassat akuerineqarpata ingerlatseqatigiiffik ukiuni tallimani kingullerni 410 millionit koruuninik Namminersorlutik Oqartussanut tunniussaqarsimassaaq.

Tusassip nalunaarusiaani 2025-mi kinguneqarluartut uku erseqqissarneqarput:

• Inuussutissarsiortunit akinik aalajangersimasunik isumaqatigiissuteqarnikkut internetimik atuisunit kaaviiaartitat qaffapput.
• Frimærkinik tuniniaaneq allakkerinermullu akiliutit poortukkat akilerneqarnerisa kingunerisaannik qaffapput.
• NIP-ip, GIP-ip mobilillu attaveqaataannik tuniniaanermi kaaviiaartitat qaffapput.

Kingunerluutit:

• Allakkanut nakkartitsiviit atorunnaariartuaarneqarnerat pissutigalugu kaaviiaartitat apparput.
• Paasissutissanik digitaliusunik toqqorsivinnik ingerlatsinermi kaaviiaartitat apparput.
• Suliffeqarfinnut tuniniaanerit apparput.
• Nunani allani attaveqaateqarnermi kaaviiaartitat apparput.

Naalakkersuisut ullumikkut ataatsimeersuarnermi siulersuisuni ataasiinnarmik taarsiipput. Eqalunnguaq Abel Kristiansen siulersuisunit tunuartoq Kim Duusimit taarserneqarpoq.