KL

DK

AK: NIISIP-ip eqqunngitsumik paasissutissiinera eqqissiviilliortitsivoq

Isumaginninnermi siunnersortit kattuffiata NIISIP-ip isumaqatigiissut nutaaq pillugu paasissutissanik eqqunngitsunik tunngaveqarluni isornartorsiuisimanerarlugu, kattuffiup AK-p isornartorsioqqippaa.

Thomas Munk Veirum
Tusagassiortoq
Saqqummersinneqarpoq

Isumaqatigiissut nutaaq pillugu isornartorsiuineq kukkuneqarpoq paasissutissanillu eqqunngitsunik tunngaveqarluni. Isumaginninnermi siunnersortit kattuffiannit NIISIP-imit eqqunngitsumik paasissutissiineq Atorfillit Kattuffianni (AK) qatsuteqaat.

Taamatut kattuffiup siulittaasua Sermitsiamut allakkatigut nalunaaruteqarpoq.

NIISIP-imi siulittaasoq Martha Lund Olsen sapaatip-akunnerata siuliani Naalakkersuisunut ammasumik allagaqarluni isumaginninnermi siunnersortit isumaqatigiissutaat nutaaq AK-p Namminersorlutillu Oqartussat akornanni isumaqatiginninniutigineqarsimasoq sakkortuumik isornartorsioreeraalu, taamatut oqaaseqarpoq.

NIISIP-ip nalunaarutaa Sermitsiami allaaserisami allaaserineqarpoq. Paasissutissat NIISIP-imeersut AK-mut saqqummiutinngikkaluarlugit Sermitsiap ingerlateqqissimammagit Sermitsiamit ajuusaarutaavoq.

Qaangiuttoorluni sulisimanermut akissarsisinneqartarneq suli atuuttoq

Isumaginninnermi siunnersortit pigaartuullutik sulisartut, ingammik unnukkut, unnuakkut nalliuttunilu sulisartut, qaangiuttoorluni sulisimaneq pillugu akissarsiaat isumaqatigiissutip nutaap kingunerisaanik appariartut, Martha Lund Olsenip Naalakkersuisunut allakkamini pingaarnertut oqaatigaa.

Tamannali eqqunngilaq, AK Sermitsiamut ilisimatitsivoq. Isumaginninnermi siunnersortit Martha Lund Olsenip innersuussutigisai qaangiuttoorluni sulisimanermut akissarsisinneqartarnerat suli atuuttoq, kattuffiup naqissuserpaa.

- Isumaginninnermi siunnersortit oqartussaasut tapiissutaannik pissarsisut suliffiup avataani sulinermi aaliangersimasumik tapeqartinneqassanngillat (NIISIP-ip oqaatigisaatut, aaqq.), atugassarititaasullu siornatigutulli issapput; tassa isumaginninnermi siunnersortit pigaartuusartut qaangiuttoorlutik sulisimagaangamik nalunaaquttap-akunneranit siullermit akissarsisinneqartassapput, AK-mi siulittaasoq Dina Olsen oqarpoq.

Eqqissiviilliorneq tatiginninnginnerlu

NIISIP-ip eqqunngitsumik paasissutissiinera eqqissiviilliornermik tatiginninnginnermillu pilersitsisoq, taanna nangilluni oqarpoq:

- Martha Lund Olsenip/Niisip-ip tusagassiuutinut eqqunngitsumik paasissutissiiuarnera AK-p soorunami qatsulluinnarpaa.

- Tamanna eqqissiviilliortitsillunilu tatiginninnginnermik pilersitsivoq. Martha Lund Olsenip/Niisip-ip eqqunngitsumik paasissutissiisimanera tunngavigalugu ilaasortat saaffiginninneri piffissarujussuaq atorlugu AK-p akissuteqarfigisarpai, Dina Olsen allakkatigut oqaaseqarpoq.

Aasaq manna NIISIP assingusumik nalunaaruteqareersorlu, isumaqatigiissummullu ilaasortani naaggaaqqullugit kajumissaarereersorlu, Martha Lund Olsen AK-mit ilaasortaajunnaartitaavoq.

NIISIP-ip siulittaasua siulittaasullu tullia ilaasortaajunnaartitaasimasut, NIISIP-ilu peqatigiiffittut ilaasortaalluunniit allat ilaasortaajunnaartitaanngitsut, Dina Olsenip erseqqissarpaa.

Martha Lund Olsen: Uanga nammineq isummertuunngilanga

AK-p isornartorsiuinera Sermitsiap Martha Lund Olsenimut saqqummiuppaa, taannalu ima oqaaseqarpoq:

- NIISIP-ip siulersuisui tamanna pillugu kingusinnerusukkut ataatsimiissapput. Uanga nammineq isummerlunga nassiussisuunngilanga, allagarli NIISIP-imi ilaasortat ataatsimiinneranni aalajangerneqareersorlu Naalakkersuisunut allanneqarsimavoq, Martha Lund Olsen oqarpoq.

Peqatigiiffik ataatsimiitereerpat uterfiginninniarluni aamma oqarpoq.

inuiaqatigiit samfund

ATORFIIT Se alle jobs

Powered by Labrador CMS