Inuiaqatigiinni atornerluisunik katsorsaariaatsini alloriarnerit aqqaneq-marluk naak?

Qinigassanngortittut meeqqat inuusuttullu pillugit qanorluunniit iliorumaartut qineqqusaarnermi tamani tusartarparput. Inersimasutut angajoqqaatullu taama aamma oqartarpugut. Qitornagut pillugit sapinngisatsinnik qanorsuarluunniit iliuuseqarniartarpugut.

Tamanna pitsaalluinnartutut nipeqarpoq. Neriorsuutilli piviusunngortinneqarneq ajortut politiit kisitsisaataasa takutippaat.

Kommuneqarfik Sermersuumi kommunalbestyrelsimi ilaasortap Poul Petersenip aamma Kommune Kujallermi borgmesterip Malene Vahl Rasmussenip LinkedInimi allaaserisaat takuakka. Allaaserisani meeqqat inuusuttullu atugarissaarnerat kommunit imigassamut politikkianni maannakkut atuuttumi siunissamilu atuutilersussami sammineqarput. Allaaserinnittut marluullutik paasisimasaqassuseqarlutillu, siumut isigisumik isiginnittaaseqarlutillu sapiitsuliorput. Inuiaqatigiittut kissaatigineqartut taakku qanoq ililluta tapersersorsinnaavagut?

Nuliara atornerluisunik ikiuinermut siunnersortaavoq, taassumalu imigassamik aalakoornartulimmik atornerluisutut katsorsartinnermi alloriarnerit aqqaneq-marluk pillugit oqaluttuuppaanga. Katsorsaanissamut neqeroorutinut, katsorsaanissamut periarfissanut piviusunut pisortallu tamatumunnga atatillugu iliuuserisassaannut atuarlunga piffissarujussuaq atorpara. Inummut ataasiakkaanut pappiaqqami ajunngitsutut isikkoqarsinnaavoq. Ilaatigut aamma ilaqutariinnut katsorsaanissamik neqeroorutit ajunngitsutut isikkoqartarput. Tamanna sooq nuna tamakkerlugu alloriarnernik aqqaneq-marlunnik pilersaarusiortoqarsimannginneranik eqqarsalersitsivoq. Kommunitsinni politikerit kommuniminni namminneerlutik sorsuuteqassappat, imaluunniit Inatsisartut Naalakkersuisullu aqqutigalugit politikki suliniutinillu ataatsimoortitsinissaq takorloorsinnaaviuk. Taamaalilluni kangianiit kitaanut avannaaniillu kujammut katsorsaanissamut neqeroorutit assigiinnerulernissaat qulakkeerneqassaaq.

Iliuuseqartoqartariaqartoq

Kommune Kujallermi aalakoornartulimmik imigassaarniarneq matugallarneqarpoq. Taama annertutigisunik iliuuseqarneq nalinginnaasumik tapersersornaveersaartarpara, pisariaqaraangalli taamaaliornissaq pisariaqarpoq. Inuiaqatigiinni innuttaasukitsuni kikkut tamarmik imminnut ilisarisimalluartut aalajangerneq annertullunilu sapiitsuliorneruvoq. Aammali aalajangerneq siuneqassusermik, siumut isiginermik sapiissuseqarnermillu ersersitsivoq. Kommunalbestyrelsimi ilaasortat iliuusertik qinikkatut iliuuseraat. Aalajangigassat taamaattut qunusuillutik aalajangiiffigissagaat neriuutigaarput. Taamaammat tapersersorlugillu ataatsimoorluta ajornartorsiut aaqqinniartigu. Tamatumuuna imigassaq aalakoornartulik sammineqarpoq, ajoraluartumilli kokainimik ajornartorsiut annertusiartorlunilu akiorniarneqartariaqarpoq.

Nunami amerlanngitsunik inulimmi inuit tamarluinnarmik pingaaruteqarlutillu inuiaqatigiit ataatsimut isigalugit pingaaruteqarfianni meeqqat inuusuttullu pillugit neriorsuutitsinnik eqqortitsinngitsoortarnerput ajorluinnarpoq. Kikkut tamarmik suut tamaasa iliuuseriumallugit neriorsuisimagaluartut sooq taama annikitsigisumik pisoqartarpa? Tamanna imminnut naapertuutinngilaq. Nuna tamakkerlugu alloriarnernik aqqaneq-marlunnik pilersaarusiorta, kikkut tamarmik kikkut sumut akisussaanersut aamma kikkut tamarmik akisussaaffitsik ilisimassagaat nalujunnaassavaat.

Politiit, isumaginninnermi sulisut, atuarfimmi sulisut allallu ullut tamaasa akiuuttuartut qutsavigalugillu nersualaarpakka. Meerarpassuarnut ullut tamaasa allanngueqataasarpusi.

Taamaammat asasagut Inatsisartunut Naalakkersuisunullu, inuiaqatigiinni atornerluisunik katsorsaanermi alloriarnerit aqqaneq-marluk suuppat?