Ataatsimiititaliaq: Qimussertartut kattuffiat missingersuutitik malinnagit aningaasanik atuisimapput

Inatsisartut nunatta karsiata 2025-mut naatsorsuutai sisamanngornermi aappassaaniissavaat. Suliaq upernaaq siullermeerneqareernermi kingorna Kukkunersiuinermut Ataatsimiititaliami suliarineqarlunilu isumaliutissiissusiornermik suliaqarfiuvoq. Kalaallit Nunaanni Qimussertartut Kattuffiata, KNQK-p, aningaasatigut ingerlatsinera pillugu aappassaanerinninnissamut isumaliutissiissummi apeqqusiisoqarpoq.

Kattuffik aningaasanut inatsit aqqutigalugu 2025-imi 250.000 koruuninik taperneqarpoq. Taakkua qimmit qamutillu unammiffissamukaannerannut kiisalu kattuffiup aningaasaqarnerata pitsanngorsarnissaanut atugassaasut, aningaasanut 2025-imut inatsimmi allassimasoqarpoq. Inatsimmittaaq tassani allassimavoq tapiissutit sumut atorneqarsimanerat pillugu naatsorsuutinik tunniussisoqassasoq.

Naatsorsuutilli 2025-imoortut Kultureqarnermut Naalakkersuisoqarfimmut suli tunniunneqarsimanngikkaluartut qimussertartut kattuffiat, aningaasanut 2026-mut inatsit aqqutigalugu aamma 250.000 koruuninik aningaasannassimasoq, isumaliutissiissummi allassimasoqarpoq.

- Kulturimut, Ilinniartitaanermut, Ilisimatusarnermut Ilageeqarnermullu Ataatsimiititaliap Kukkunersiuinermut Ataatsimiititaliamut atortussatut nassiussaani ilaatigut erserpoq 2026-mut tapiissutit KNQK-p 2025-mut tapiissutit naatsorsuutaanik suliarinninneq suli inaarutaasumik naammassineqarsimanngitsoq nalaani akuersissutigineqarsimasut, tassami aningaasartuutit akilerneqarsimasut tamarmik missingersuutini piffissami tassani naammattumik uppernarsarneqarsimanngimmata, Kukkunersiunermut ataatsimiititaliami ilaasortat, isumaliutissiissummi allapput.

Taakkua tassaapput: Nivi Rosing (IA), Erik Jensen (S), Ida Vahl (D), Mimi Karlsen (IA) aamma Bentiaraq Ottosen (D).

KNQK-p tapiissutit ilaat siunertanut atorsimanngikkaat 

KNQK 2025-mut nunap karsianit aningaasannakkami missingersuutini malinnagit atuisimasoq, Naalakkersuisut paasisimagaat, isumaliutissiissummi aamma allassimavoq. Taakkuali sumut atorneqarsimanersut allassimanngilaq.

- Kiisalu allassimavoq 2025-imut tapiissutit ilaat siunertanut allanut akuerineqarsimasuni Naalakkersuisut paasisimallugulu ilisimagaat.

Naalakkersuisut aningaasat siunertaanngitsumut atorneqarsimasut paasigamikkit, kattuffiup siunertaanngitsumut atukkani nunap karsianut utertissagai piumasaraat.

- Aamma ilisimatitsissutigineqarpoq Naalakkersuisut suliaq pillugu aalajangiisimasut aningaasat tapiissutitut tunniunneqartut, atorneqarsimasutut tapiissuteqarnermi nalilerneqartut, utertillugit siunertarineqartunit akileqquneqassasut.

Tapiissutiniilli aningaasat qanoq amerlatigisut qimussertartut kattuffiata siunertaanngitsumut sunullu atorsimanerai allaqqanngilaq.

Sermitsiaq KNQK-mi siulittaasup, Mikkel Jeremiassenip, kukkunersiuinermut ataatsimiititaliap qimussertartut kattuffianut apeqqusiinera pillugu apersornissaanik sulissuteqarpoq. Sermitsiap Kultureqarnermut Naalakkersuisoqarfik suliaq pillugu aamma attaveqarfigaa.