Akerliussutsimik takutitsinerit sumiiffinni arlalinni pissasut
KNAPK-p sumiiffinni pingasuni sisamanngornermi akerliussutsimik takutitsinissaq nalunaarutigaa.
Nuummi akerliussutsimik takutitsisoqarnissaa nalunaaqutaq 11.50-imiit pissasoq KNAPK-p nalunaarutigaa.
Nunatsinni illoqarfinni
pingasuni ullumi akerliussutsimik takutitsisoqarnissaa
nalunaarutigineqartoq, politiinit Anette Ostenfeldt Sermitsiamut
sisamanngornermi ullaakkut allappoq.
Nuummi nal. 11.50 aamma
Maniitsumi Nanortalimmilu nal. 13 akerliussutsimik takutitsinissat
pilersaarutaasut aalisartut piniartullu kattuffiat nalunaarpoq
KNI-p akit
qulakkeerniarlugit isumaqatigiissuteqarneranit ikummatissat akii
qaffanneqarnerat KNAPK-p akerliussutsimik takutitsiffigaa.
KNI-p sinneqartoorutai
atuisunut ikummatissap akiata appasinnerutinneqarneranut
atorneqartartut taakku ilisimatitsissutigaat.
KNAPK-lli ikummatissap
akisunerulernera naammaginngilaa, siusinnerusukkullu aalisarnermik
inuussutissarsiuteqartut ikiorserneqarnissaat piumasaralugu
tusagassiuutinut nalunaaruteqarnikuupput.
KNAPK-p nalunaarummini
aamma aalisarnermut inatsisissatut siunnersuut ullumi
siullermeerneqartoq naammaginngilaa. Siunnersuutip sinerissap
qanittuani aalisartut ikilinerannik kinguneqarsinnaasoq kattuffiup
akerleraa.