Niclas V. Sørensen 100 km-it arpallunilu uummatinut 100.000-nik katersisoq

Niclas V. Sørensenip Nuummersuup marlunngornerup annersaa pingasunngornermilu akunnerup aappaa avillugu arpannermut atorpaa.

Peqatigiiffik Ummatit katersuiniullugit 100 kilometerit arpattussaavai, peqatigiiffillu Kalaallit Nunaanni uummalluttut taakkulu ilaqutaat pitsaanerusumik paasissutissinneqartarnissaannik tapersersorneqarnissaannillu suliniuteqartuuvoq.

- Soorlu tassa 100 kilometerit arpassimallunga, taama misigaanga, Niclas V. Sørensen aqaguani taama oqarpoq.

Ulloq marlunngornermi ullaakkut nalunaaqutaq 06.00 aallartikkami pingasunngornerup unnuaani nalunaaqutaq 01.30 unippoq. Arpannerup annerpaartaa asfaltikkut ingerlasussaasimagaluarpoq, aqquserngilli sermeqarnerat pissutigalugu 30 kilometerit arpareerluni Nuummi timigissartarfimmi arpattarfimmut nuuppoq.

- Unnuk sivisoqaaq. Taama takitigusumik asfaltikkut arpattarfimmilu arpassimanngisaannarpunga, naggataatigullu nukeerullunga. 20-30 kilometerit kingulliit qilusooqattaarlunga naalliuppunga, taanna oqaluttuarpoq.

Facebookikkut toqqaannartumim aallakaatitsisoq

Peqatigiiffik Uummatit Niclas V. Sørensenimut pingaaruteqangaatsiarpoq. Taamani aataava uummammigut suliaritilermat anaanaata pilersitaraa.

- Ukiut qulit sinnerlugit qaangiutereerput, sulili initoqaaq. Uummalluttut uummatip uninnissaa annilaangagalugu unnuakkut itersinnaasarput, ilaqutaasunut aamma initungaatsiartarpoq, taanna oqaluttuarpoq.

Niclas V. Sørensen arpannini tamakkerlugu Facebookikkut toqqaannartumik aallakaatitsivoq, tassani inuit malinnaasinnaallutilluunniit allassinnaapput, katersuiniarnerlu aamma tapersiivigineqarsinnaavoq.

Ungasissuseq anguniakkani angummagu 100.000 koruunit katersorneqarsimapput, assoroorneralu imminut akilerpoq. Aningaasat ilaat illoqarfimmi aningaasaliisartuneerlutillu 15.000 koruunit missaanniittut inuit namminneq kaasarfiineersuupput.

- Toqqaannartumik aallakaatitsininni inuit qiimmassaapput. Ataatsimut isigalugu assorsuaq tapersersorneqarpunga, aqqutaani ilaasa arpaqatigaannga, taanna oqaluttuarpoq.

Nicklas V. Sørensenip inuit tapersersuinerat qujamasuutigigaluarlugu ullumikkut arpaqqittussaannginnini eqqissiallassutigaa.

- Ippassaq nerisinnaanngingajappunga. Taamaammat ullumikkut siniinnarlungalu neriinnassaanga, tamanna ilimagaara.