Kalaallinut tikeqqammersunut illu Københavnimi januaarip aallaqqaataani ammassasoq

Kalaallit Danmarkimi illoqarfiit pingaarnersaannut nuuttut tapersersorniarlugit Københavnip Kommuniata suliniut nutaaq qanittukkut aallartissavaa.

Aningaasaateqarfik ”Dansk Råstof” illumik ingerlatsinissamut neqerooruteqartitsinermi Assak-mik taasami ajugaasimasoq Københavnip Kommuneani Isumaginninnermut Ingerlatsivik tusagassiuutinut nalunaarummi ilisimatitsivoq.

Illu kalaallit Københavnimut tikittut inuuniarnermikkut assigiinngitsunik ajornartorsiuteqarlutik takkuttut isumannaatsumik ikiorneqarnissaannut atorneqassasoq kommunip paasissutissiissutigaa.

Københavnip Kommuniani isumaginninnermut borgmesteri, Karina Vestergård Madsen suliniutip nutaap piffissami aggersumi aallartinnissaanut qilanaarpoq:

- Københavnimi neqerooruteqalernissarput anguniarlugu ukiuni arlalinni suliniuteqarpunga, tassani kalaallit sanngiinnerusumik inissisimasut immikkut ittumik ikiorneqarlutillu tapersersorneqassapput. Taamaammat Assaap ammarnissaa qilanaaraara. Kalaallit ikiorneqarnissamik pisariaqartitsisut Københavnimi tikinnerminniit ingerlaannaq ikiorneqarnissaat pingaaruteqarluinnarpoq, isumaginninnermut borgmesteri oqarpoq nangillunilu:

- Dansk Råstof pilluaqquara. Assak illoqarfitsinni kalaallit sanngiinnerusumik inissisimasut inuunerannut annertuumik allanngueqataassasoq qularinngilara. Assaap ingerlanerata ukiuni aggersuni malinnaaffiginissaa qilanaaraara.

Københavnip Kommuniata aningaasat katillugit 11,3 millionit koruunit 2026-miit 2029-mut Assammut immikkoortippai. Suliassaq neqerooruteqartitsinikkut 2026-p ingerlanerani suliariumannittussarsiuunneqarpoq, tassanilu aningaasaateqarfik Dansk Råstof ajugaavoq. Aningaasaateqarfik kalaallit pineqartut inuuniarnerminni ajornartorsiutaannut unammilligassaannullu ilisimasaqarluartuullunilu misilittagaqarluartuuvoq.

Assak Amagerimi Geislersgade 17-imi Dansk Råstofip allaffiani inissisimassaaq.

Kalaallit Danmarkimut nuuttartut ukiut tamaasa 1.500-t missaanniittartut Det Nationale Forsknings- og Analysecenter for Velfærdip (VIVE) qanittukkut nalunaarusiami takutippaa. Taakkua amerlanersaat Danmarkimi inuunerminni ingerlalluarput, ilaalli illoqarfiit pingaarnersaanni Danmarkimilu sumiiffinni allani ajornartorsiuteqarlutillu unamminiagassaqartarput.