Aliasunneq piffissaqarfigineqanngikkaangat
Angajoqqaat meeqqamik annaasaqareernermi kingorna, ullut arfineq-pingasut qaangiuppata suliartoqqissapput - tamanna naammappa? Angajoqqaap qitornamik annaasaqarsimasut inuit attaveqaqatigiittarfiini oqallissaarilluni allagaqareersoq qinersisartunit oqallisigineqarpoq.
Takorlooruk qitornat toqusoq. Silarsuaq allanngorpoq takorlooruminaalluni. Qitornat inuulluaqqusariaqarlugu - ullulli arfineq-pingasut qaangiuppata suliartoqqinnissat naatsorsuutigineqarpoq.
Tamanna nunatsinni angajoqqaanut piviusuuvoq, inatsimmimi allassimammat qanigisaq toqukkut qimaguppat ullut arfineq-pingasut aningaasarsiaqarluni sulinngiffeqartoqarsinnaasoq.
Agguaqatigiisillugu ukiumut meeqqat 18-liineqanngitsut 17-it toqusarput. Tamanna alianartuuvoq sakkortuumik misigineqartartoq, aliasunnissamullu piffissarititaasoq sivikippoq.
Aliasunnissaq piffissalerneqanngitsoq
Rosannguaq Rossenip nammineq qitornamik annaasaqarsimasoq, angajoqqaat annaasaqarnerminni misigisartagaat Facebookikkut oqaluttuaraa.
- Takorlooruk meeqqannik annaasaqarlutit. Takorlooruk silarsuaq sequmittoq, nalullugu susoqarnersoq, pisoq piviusuunersoq nalullugu. Takorlooruk nuunuutit inuulluaqqusussanngorlugu, kingornalu takoqqittussaajunnarlugu.
Rosannguaq Rossenip Facebookimi allagaa najoqqutaralugu Sermitsiaq allaaserinninnissaminut akuerineqarsimavoq.
Meeqqamik annaasaqareernermi kingorna ullut arfineq-pingasut qaangiukkaangata ullunut nalinginnaasunut uteqqinniarnissaq naammannersoq ilaatigut oqallisigineqarpoq.
Rosannguaq Rossenillu aaqqiissutaasinnaasumik tikkuussivoq:
- Angajoqqaajusut qaammatit pingasut sulinngiffeqarsinnaatitaappata inuiaqatigiinnut 1.3 mio-mik ukiumut akeqartassaaq. Isumaqarpunga eqqissilluni aliasussinnaatitaaneq pingaarnerpaasoq, siunissami kingunerlutsitsinnginnissaq pillugu.
- Qinerseqqilerpugut. Neriuppunga aamma inuiaqatigiinni atugassarititaasut pitsanngorsarneqarnissaat eqqumaffigineqassasoq, Rosannguaq Rossen naggasiivoq.
