Amerlanerussuteqartut: Pinerluttulerinermi inatsit immikkut ilisimasallit nalilersortariaqarpaat
'Annertuumik inatsisitigut isumannaatsuunissap inatsisitigullu naapertuilluarnerup attatiinnarnissaata qulakkeernissai siunertaralugit, pinerluttulerinermi inatsisip eqqartuussisarnermillu inatsisip illersorneqarsinnaasumik aaqqissugaanerannik' suleqatigiissitanik paasisimasaqarluartunik naliliisoqarnissaanik, Inatsisinut Ataatsimiititaliami amerlanerussuteqartut IA-meersut Siumumeersullu inassutigaat.
Inatsisit maanna atuuttut inatsisitigut isumannaassutsimik inatsisitigullu naapertuilluarnermik qulakkeerinninnersut, immikkut ilisimasallit misissuissapput.
Toqqorsivimmit assi: Leiff Josefsen
Eqqartuussisut pillaatissiissutaat annikippallaarpat, pillaatissiissutinullu tunngatillugu inatsisiliortoqartariaqarpa? Kalaallit Nunaanni pinerluttulerinermi inatsisip atuutilersinneqarnissaanut siunnersuutit marluk oqaluuserineqarpata, apeqqutit taakku Inatsisartuni ataasinngorpat suliarineqassapput.
Siunnersuutit marluk pillugit Inatsisinut ataatsimiititaliaq isumaliutissiissummik saqqummiussivoq, suliamillu misissuisussamik immikkut ilisimasalinnik ataatsimiititaliamik Naalakkersuisut pilersitsissasut, ataatsimiititaliami amerlanerussuteqartut inassutigaat.
Ataatsimiititaliami amerlanerussuteqartut tassaapput IA aamma Siumut, Naalakkersuisullu suliamik naliliineri taakkua isumaqatigaat, allannguutissanillu ukunannga siunnersuuteqarlutik:
Inatsisitigut naapertuilluarnermik inatsit qulakkeerinnissinnaava?
- Annertuumik inatsisitigut isumannaatsuunissamik aamma inatsisitigut naapertuilluarnerup annertuumik peqataaneranik, inuiaat inuit inatsisitigut illersugaanerannik pingaartitsisut attatiinnarneqarnissaat anguniagarineqassappat, pinerluttulerinermi inatsisip eqqartuussisarnermillu inatsisip illersorneqarsinnaasumik aaqqissugaanerannik naliliisussamik suleqatigiissitanik paasisimasaqarluartunik Naalakkersuisut pilersitsinissaannik peqquneqarnissaat pillugu, Inatsisartut aalajangiiffigisassaattut siunnersuut.
- Ilaatigut iliuusereriikkanut kinguneqartitsinernut killiliussat aamma innutaasut isumaat pillugit misissuineq aallartinneqareersoq tunngavigalugu, Kalaallit Nunaanni pinerluttulerinermi inatsimmi pillaatissiissutaasunut killiliussat eqqunneqartariaqarnersut pillugit suliarisassat allassimaffianni ingerlanissap qanoq ingerlanissaa allaaserineqassaaq. Suliarisassat allassimaffiat UPA 2025-imi saqqummiunneqassaaq.
Misissuinerup inerneri qilanaarigaat
Ilisimatusarfimmi ilisimatuunik misissuisitsinissaq pillugu Inatsisinik Atuutsitsinermut Naalakkersuisup isumaqatigiissuteqarsimanera, Inatsisinut Ataatsimiititaliamit aamma iluarisimaarneqarpoq. Eqqartuussivinni periutsit, suliamik ilisimasaqartut innuttaasullu isumaat inatsisitigullu naapertuilluartoqarneranik misigisimanerat
pillugit paasissutissanik piviusunillu misissuinermi angusat takutitsisinnaassapput.
- Misissuinerup inernerisa 2025-mi upernaakkut saqqummiunneqarnissaat Inatsisinut Ataatsimiititaliamit qilanaarineqarpoq. Taamaaliornikkut pinerluttulerinermi inatsisitta ukiut 15-it qaangiuppata qanoq ingerlanissaa takorloorneqarsinnaalissasoq ataatsimiititaliamit naatsorsuutigineqarpoq.
- Pinerluttulerinermi inatsisitta nutarterneqarnissaa pillugu politikikkut oqallinnissami misissuinerup tunngavissaqarluartitsisinnaanissaa qilanaaraarput, isumaliutissiissummini Inatsisinut Ataatsimiititaliaq allappoq.
