Paasissutissiineq: Ilaasut Greenland Airportsip nukittorsarneqarnissaa pillugu akiliinerusalissasut

Greenland Airportsip aasaanerani naatsorsuutitigut milliardit koruuninik amigartooruteqarluni nalunaarutigalugulu aningaasanik pissarsinissamik pisariaqartitsineq erseqqissarpaa. Tamatuma kingorna Greenland Airportsip nammineq aningaasaataasa isumannaarunnaarnissaannut kiisalu aningaasanik ingerlaavartumik pisariaqartinneqartunik qulakkeerinninnissamut aningaasat annertuut Namminersorlutik Oqartussat naalagaaffiullu neriorsuutigaat.

Ilaasut timmisartumut bilitsit akilertakkatik aqqutigalugit namminneq aningaasartuuteqarnissaat naatsorsuutigineqartoq maanna ersarissiartuinnarpoq, tamannalu Namminersorlutik Oqartussat naalagaaffiullu akornanni isumaqatigiissuteqarnikkut pisussaasoq paasissutissiissummi Naalakkersuisut Siulittaasuata Naalakkersuisoqarfiata septembarimi Inatsisartut Aningaasaqarnermut Akileraartarnermullu Ataatsimiititaliaannut nassiussaani erserpoq.

– Nunanit allaniit ilaasut akitsuutaat 202-mi januaarip aallaqqaataa  aallarnerfigalugu ukiuunerani 310 koruuninik, aasaaneranilu 620 koruuninik qaffanneqassasoq naatsorsuutigineqarpoq (548 koruuniniit, 858 koruunit, 1.168 koruuninut), ataatsimiititaliamut allakkami allassimavoq.

Tamatuminnga aaqqissuussinerup Greenland Airportsip aningaasanik ingerlaavartumik atugassaqartitsinini 74 millionit koruuninik 2027-mi pitsanngorsassagaa pilersaarutaavoq.

Aamma atuaruk

Greenland Airportsimi naatsorsuusiornermi kukkunerit kukkunersiuinermut ataatsimiititaliap naammaginngikkai

Sermitsiap Greenland Airports oqaaseqartinniarlugu attaveqarfigaa. Greenland Airportsip akigititaasa politikkikkuttaaq aalajangiiffigisassaaneri pissutigalugit  Naalakkersuisut Siulittaasoqarfia kiisalu Ineqarnermut, Attaveqaasersuutinut Isorliunerusunut Upalungaarsimanermullu Naalakkersuisoqarfik Sermitsiap attavigai.

Taakkuli arlaannaataluunniit paasissutissiissummi imarisat akuerineqarsimanersut imaluunniit akuerineqartussaanersut maannamut uppernarsarsimanngilaat.

Aasaanerani akigititat qaffasinnerusut

Ilaasoq Kalaallit Nunaanni mittarfimmit angalagaangat timmisartortitseqatigiiffiit Greenland Airportsimut akitsuummik akiliisuusaraluarput. Naggataatigulli akiligassat ilaasut namminneq akilissavaat, Air Greenland paasissutissiivoq. 

Timmisartuutileqatigiiffiup pisortaanera, Jacob Nitter Sørensen aappaagu akigitassat pillugit qularnaatsumik oqaaseqarsinnaanngilaq. Taamaakkaluartoq ataatsimiititaliamut paasissutissiissummi imarisat oqaaseqarfigerusuppai.

- Aningaasatigut ilaasutigulluunniit qanoq akeqassanersoq ataatsimut oqaatigineqarsinnaanngilaq. Taamaammat akit qaffannerat pisariaqartitsineq pillugu pitsaanngitsumik sunniuteqartartoq misilittakkatsinnit nalunngilarput, akitsuutillu taakku qaffanneri nammineq aningaasartuutitta qaffakkiartortut, ilaatigut orsussamut, saniatigut ajoraluartumik ilanngunneqassapput, Jacob Nitter Sørensen oqarpoq. 

- Peqatigisaanik soorunami Greenland Airportsip mittarfinnik pisariaqartitatsinnik ingerlatsineq ingerlaatiinnarniarlugu amerlanerusunik aningaasarsiornissaminik pisariaqartitsineranik paasinnilluarpugut, taanna erseqqissaavoq. 

- Akigititat qaffasinnerusut pisariaqartinneqarpata nunanut allanut ingerlaarfiit immikkut eqqarsaatigineqarnissaat Jacob Nitter Sørensenip naleqquttuusoraa, taamaaliornikkut nunani allaniit ilaasut nunanit allaneersut sapinngisamik annertunerpaamik tapiissuteqarsinnaassapput.

Air Greenlandip pisortaa nunanut allanut timmisartuussinermi akitsuutit aasaanerani ukiuuneranilu assigiinngissuteqarsinnaanerat pillugu aamma paasinnippoq. Aap, paasissutissiissummi siunnersuutigineqartumit allaat annertunerusumik taamatut aaqqissuussisoqarnissaa kissaatigaa:

– Akitsuutit suli annertunerusumik piffissami angallaffiunerpaami qaffanneqarnissaat uanga kissaatigisinnaagaluarpara. Timmisartuttami ilaasunik ulikkaarnissaat piffissami tassani ajornannginnerusarpoq. Paarlattuanilli ukiuunerani akitsuutit allanngortinneqannginnissaat kissaatiginarneruvoq. Tamanna tikeraanut Kalaallit Nunaata ukioq naallugu ammanerulernissaanik suliniuteqarfigisatsinni isumassaqarluassaaq, Jacob Nitter Sørensen oqarpoq.

Ilaasunut akitsuut taamaallaat ilaasunut aallartunut atuuppoq. Taamaammat Greenland Airportsip nunanut allanut timmisartuussinermut akitsuutai ataasiarlutik taamaallaat sunniuteqartassapput, aamma utimut bilitsimik pisinermi.

Nunattami iluani timmisartuussinerit?

Nunatta iluani timmisartuussinerni akitsuutit qaffanneqarnissaat Naalakkersuisut septembarimi paasissutissiissutaani eqqaaneqanngilaq. Taamaakkaluartoq ukiumut 4 millionit koruuninik aningaasaliissutissanik Inatsisartut aningaasanut inatsisaanni allannguutissatut siunnersuummi akitsuutit qaffanneqarnissaat naatsorsuutigineqarsinnaasoq takuneqarsinnaavoq.

Sullissinermut isumaqatigiissuteqarnikkut timmisartuussisartut “ilaasunut akitsuutit qaffanneqarnerisa kingunerisaanik” aningaasatigut taarsiivigineqarnissaannik qulakkeerinninniarneq siunnersuummi tunngavilersuutigineqarpoq.

Nerlerit Inaanniit Islandimut attaveqarneq eqqaassanngikkaanni timmisartuussinermi sullissinissamut isumaqatigiissutit nunatsinni timmisartuussinernut tunngapput.

Oqaatigineqareersutulli akitsuutit aappaagu qanoq annertutigissanersut suli pisortatigoortumik uppernarsarneqanngilaq.

Inatsisartut pilersaarutaat malillugit aningaasanut inatsit ataasinngornermi akuersissutigineqassaaq. Tamatumunnga atatillugu Greenland Airports Regionalimut 250 millionit koruuninik aningaasaliissuteqassapput, taakkulu Qaqortumi mittarfimmut immikkut atugassanngortitaapput. Tamatuma saniatigut Greenland Airports International ukiumut 125 millionit koruuninik 2027-miit 2029-mut aningaasaliiffigineqartassasoq naalagaaffik neriorsuivoq.