Kalaallit Nunaanni Politiit, nunaqavissunik politiinik amerlanerusunik atorfinitsitserusupput, sulisussarsiornerli ilungersunarpoq

AAMMA ATUARUK

Politiassistenti Fisker Narsami kikkut tamarmik ilisimavaat. Inuilli qanoq oqarnersut tamatigut paasisinnaanngilai

Narsami politiini kalaallisut oqalussinnaasunik aalajangersimasumik sulisoqannginnera umamillernartuuvoq.

- Oqaatsit ajornartorsiutaanerpaagunarput, politiassistenti ataqatigiissaarisorlu Jens Christian Fisker Sermitsiaq illoqarfimmi politeeqarfimmut septembarip naanerani pulaarnerani, oqarpoq.

Politiinik atorfinitsitsinermi sulisussarsiornermilu Kalaallit Nunaanni Politiit ajornartorsiutiginerpaasaat tassaavoq kalaallisut oqaasilinnik politiinik pissarsiniarneq, taamatut oqaluttuarpoq Kalaallit Nunaanni Politiini sulisoqarnermut pisortaq Martin Bernhard.

- Kalaallisut oqaasillit politiini sulilersinnissaat maanna unamminiagassatsinni, annerpaajugunarpoq, oqarpoq.

Kalaallit Nunaanni Politiit juunimi naatsorsuinerat naapertorlugu, Kalaallit Nunaanni piffimmi tassani, politeeqarfinni 18-iusuni qulini kalaallisut oqaaseqartumik ataasinnguamilluunniit sulisoqanngilaq.

Politiilli sulisut oqaatsit sorliit atorlugit oqaluttarnersut nalunaarsorneqartannginnera pissutigalugu Kalaallit Nunaanni politeeqarfinni 18-ini sulisut qassit kalaallisut oqaaseqarnersut ilisimaneqanngilaq.

- Sumiiffinnili ilisimasatsinnit nalunngilarput politeeqarfiit ilaanni kalaallisut oqaluttut allaniit amerlanerusut, Martin Bernhard oqarpoq.

Tatsimi aalisarpugut

Kalaallit Nunaanni Politiini nunaqavissut politiillu Danmarkimiit tikisinneqartut assigiingajalluinnarput, kisiannili politiit tikisitat amerlanerupput. Sulisoqarnermut pisortap Martin Bernhardip erseqqissarpaa politiinik nunaqavissunik oqaatsinillu taakkuninnga oqalussinnaasunik atorfinitsitsisoqarnissaa kissaatigineqartoq.

Unammilleqatigiinneq sakkortooq.

- Suliffeqarfinnut allanut sanilliullugu ataavartumik sulisoqarniarneq ajornarnerutillugu, tatsip mikisup iluani arlalinni aalisarfigineqartumi, qanoq ililluni suliffeqarfittut soqutiginarsartoqarsinnaanerpa? Martin Bernhard aperivoq.

Sulisoqarnermut pisortaq naapertorlugu akissutissap ilaa tassaavoq sulisunut atugassarititaasut. Kalaallit Nunaanni naalagaaffiup atorfilittai 230-t missaanniittut – politiit ilanngullugit – ukiup aallartinnerani aningaasarsiaqarnermut atorfeqarnermullu tunngatillugu qallunaatut suleqatitik naligilerpaat, oqarpoq.

Tamanna qanoq sunniuteqarnersoq takusinnaaviuk?

- Oqaatigiuminaappoq. Suleqatigisimasatsinnilli qanoq politiinut utersinnaanerlutik aperisunik saaffigineqartarpugut, sulisoqarnermut pisortaq akivoq.

Politiit sulisussaminnik naammattunik amigaateqarnerisa saniatigut aamma inuiaqatigiit amerlassusaat suliassamik ajornakusoornerulersitsisarpoq — politiinngorniarsinnaasunillu kajumiunnaarsitsisarsinnaalluni.

- Qularutissaanngilaq inuiaqatigiit qanimut attaveqaateqarnerat suliassap imaannaanngitsuuneranut pissutaasoq. Ikinngutit, suleqatit ilaquttallu sullittarpavut, Martin Bernhard oqaluttuarpoq.

Politiit amerlasuut Kalaallit Nunaanni inunngorlutillu peroriartortut kikkut tamarmik imminnut ilisarisimanerat sungiusimagaat, sulisoqarnermut pisortaq misigisimavoq.

- Qanoq ingerlaqqittoqarsinnaaneranik allassimanngitsumik isumaqatigiissuteqartoqarpoq, naluneqanngimmat atisat tungujortut inuussutissarsiummut attuumassuteqartut suliassaqarnermillu isumaqartartut. Qanigisat pinerluttuliorsimagaluarpataluunniit tamanna ataqqineqarpoq, oqarpoq.

Ilaannikkut oqarasuaatikkut aaqqiissuteqartoqartariaqarpoq

Politiit angalagaangamik sumiiffimmi najukkami taartissaqartarnerat pisariaqartinneqartorujussuusoq, Narsami politiini politiassistenti Jens Christian Fisker oqarpoq.

Taamaattoqartilluguli pineqartoq tamatigut taamaaliorsinnaaneq ajorpoq – tamakkunanilu politiit aggersarneqartut innuttaasullu akornanni oqaatsit akornutaanerat malugineqarnerpaasarpoq. Kalaallit Nunaanni Politiini sumiiffinni allani aamma taamatut unamminartoqartoq, Martin Bernhard oqaluttuarpoq.

- Taamaattumik ilaatigut politiit paarsisut kommunefogedillu aamma politiinik tapersersuisarput, oqarpoq.

Nuummi pigaartut qitiusumik allaffiat ikiortissarsiorfigisinnaasaminnik atorfissaqartitsigaangamik iluaqutigisaraat, Martin Bernhardip tikkuarpaa.

- Ajornartorsiuteqarutta pigaartut qitiusumik allaffiat telefonikkut oqaloqateqarnikkut ajornartorsiutit ilaannikkut aaqqinneqartarput, oqarpoq.

Politiit atuarfinni takkuttarlutillu politiit suliassaat oqaluttuuttarpaat, Politiinillu Ilinniarfik ussassaarutigisarlugu, illoqarfiilli inoqarfiillu inuttusiartuinnarnerat akiorniarlugu ilungersortoqarpoq.

Inuit Nuup illoqarfiillu anginerusut allat avataani suliffissarsiornissaannut pinngitsaalineqarsinnaanngitsut, sulisoqarnermut pisortaaneq oqarpoq.

- Tamanna siunissaq ungasinnerusoq eqqarsaatigalugu, aaqqiissutissatut sulissutigaarput. Maannakkut pingaarnerpaatillugu pisariaqartitsiffiusumi sulisussanik piginnaasanillu eqqortunik peqarneq pingaartipparput.