Siumut nalunaaquttap ingerlaaqatigiinnerata allanngortinneqarnera nuannaarutigaa – Naleqqalli ajugaaneq tunngavissaqannginnerarpaa

Naleqqap Siumullu nalunaaquttap ingerlaaqatigiinnera nalinginnaasoq UTC-3-mut utertinniarlugu aamma aasaanerani nalunaaqutaq atorunnaarsinniarlugu 2025-mi ukiakkut ataatsimiinnermi siunnersuutigaat.

Siunnersuutit taakku marluk ukioq ataaseq qaangiuttorlu kiisami suliarineqarput. Naleqqap siunnersuutaa itigartinneqarpoq, Siumulli siunnersuutaa ippassaq akuerineqarpoq – allannguutissatulli aasaanerani nalunaaqutaq tunngaviusutut attatiinnarneqarpoq.

- Soorunami naammagisimaarinnillungalu nuannaarpunga. Piumasagut tamaasa pissarsiarisimanngikkaluarlutigit naaperiaasariaqarpugut. Illuatungiliuttuuvugummi. Naalakkersuisooqataanngilagut. Taamaammat naalakkersuisooqataannginnatta tusarnaartariaqarlutalu tusaaniarneqarluarnerput naammagisimaartariaqarparput, Erik Jensen (S) pingajussaaneerisoqareermat oqarpoq.

Aasaanerani nalunaaqutaq atuutiinnartariaqartoq paasilluarsinnaavaa.

- Maannakkorpiaq pissutsit atuuttut isiginiartariaqarpagut. Nalunaaquttap akunneri sisamat nikingassutaasussaapput. Europa suli niueqatigilluartarparput.

Nalunaaqutaq nikingassutaasoq akunnermik ataatsimik sivisunerulinnginniassammat EU-mi aasaanerani nalunaaqutaq suli atorneqartillugu aasaanerani nalunaaqutaq atortuaannarneqassasoq Inatsisinut ataatsimiititaliap inassutigaa.

Naleraq naalakkersuisunngussappat aasaanerani nalunaaqutaq atorunnaarsinneqassasoq

Siumulli siunnersuutaa akuerineqarmat Naleqqami nuannaarneq annikippoq.

Naleraq kisimi itigartitsisuuvoq. Ilaasortat arfineq-marluk najuuttut taasinngillat.

- Siumup 2023-mi kukkussutigisimasaminnik iluarsiissuteqarniarlutik ajugaanertut oqaatigimmagu, uagut tamanna qanoq ajugaanertut isigineqarsinnaanersoq paasiuminaatsipparput, Naleqqami siulittaasoq Pele Broberg oqarpoq.

AAMMA ATUAruk

Jens-Frederik: Aasaanerani nalunaaqutaq siunissami qaninnermi allanngortinneqassanngilaq

Inatsisartut nalunaaquttap ingerlaaqatigiinnera UTC-3-mit UTC-2-mut allanngortinniarlugu 2022-mi aalajangermata akerliusoqanngilaq. Pele Brobergilli Naleqqap taamanikkut siunnersuut tapersersorsimagaa ilumuunnginnerarpaa, taarsiulluguli nalunaaquttap ingerlaaqatigiinnerata allap peqqissutsimut navianaatai tikkuarsimanerarpai.

- Oqarfigigaluarlusi suli tusarnaanngikkussi maanna qinersisoqarnissaa pinngitsoortinniarlugu inatsisip allanngortinneqarnissaa anguniarlugu taamaallaat taasiumavugut.

Aasaanerani nalunaaqutaq maannakkut atorunnaarsinneqarsimanngimmat Naleqqap naammaginngilaa. Aasaanerani ukiuuneranilu nalunaaquttap aalajangerneqarnissaa Naalakkersuisunut isumagisassanngortinneqarpoq. Aasaanerani nalunaaqutaq maannakkorpiaq allanngortinneqassanngitsoq siulittaasoq Jens-Frederik Nielsen (D) oqarpoq.

Naleraq aalajangiisuussappat taamaassanngilaq.

- Pissaaneqarnerulerutta atorunnaarsinneqassaaq. Siunnersuuteqassanngilagut. Naalakkersuisut inatsisitigut tamatumunnga piginnaatitaareerput, taamaammat atorunnaarsinneqassaaq. Allaanerusinnaanngilaq, Broberg oqarpoq.