- Uannik qitornavissiartaartuni ajunngitsumik peroriartorpunga. Angajoqqaatut isigaakka, affaannarmimmi ukioqartunga qitornavissiartaarigaminnga. Peroriartorninnili suminngaanneernera eqqarsaatigisalerpara, Solvej Josefsen Nørresundbymi Jyllandip avannaaniittumi, 1986-imiilli najugaqarfigisamini, videokkut attaveqaqatigiittarfikkut oqaluttuarpoq.
- Angajoqqaarsiakka, arnaq kalaaleq aamma angut qallunaaq, Ikerasassuarmi radioqarfimmi naapipput, angutisiara tassani suliffeqarami, arnarsiaralu iggavimmi sulisarluni. Taamanikkut allarpassuit assigalugit arnarsiara sakialluummik napparsimalerpoq, Solvej oqarpoq.
Facebookimi saqqummiussaq, tassani Solvejip ilaquttaminik ujaasinera amerlaqisunit qisuariarfigineqarpoq, annerusumik kalaallisut, taakkuli paasisinnaanngilai.
Foto: Privat
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat ilaanni allaaserisaavoq.
Allaaserisat pisartagaqartunit siunissami taamaallaat atuarneqarsinnaajumaassapput.
Atuarluarna.
Nuummukartitaavoq misissorneqarniassammat katsorsarneqarlunilu. Nuummiitilluni Solvejip anaanavia ilisarisimalerpaa. Taassuma oqaluttuuppaa niviarsiaqqamik kissaatiginngisaminik meerartaarsimalluni.
- Meerarlu taanna tassaalluni uanga. Angajoqqaarsiartaarisama taamaalillutik ilisarisimalerpaannga angajoqqaatullu oqartussaaffigilerlunga.
- Tassa Nuummi inunngorpunga Nanortalimmili kuisillunga, angajoqqaarsiakka tassani suliffeqarmata, Nuummilu atualernissama tungaanut tassani najugaqarlunga, Solvej Josefsen oqaluttuarpoq. Taassuma sapaatip akunneri arlaqanngitsut matuma siornagut Facebookimi quppernermi ”Nuuk Borger Info”-mi ilaquttaminik ujaasinini aallartippaa, anaanavimmi ilaqutaannik ujaasilluni.
Naqinnernik ilisarinnissinnaanngitsoq
Solvej Josefsen Facebookimi allagaqarnissaminut angerlarsimaffimmi ikiortimit ilaquttanik misissuinermik soqutigisaqartumit ikiorneqarpoq. Namminermi naqinnernik ilisarinnissinnaannginnami. Naqinnernik ilisarinnissinnaannginnera – oqaatsit saniatigut – quppernerminut saaffiginnittut pillugit ilungersunartorsiortitsivoq.
- Kalaallisut allaffigineqartarpunga, atuarsinnaanngilakkalu. Aamma kalaallisut allassinnaanngilanga. Taamaallaat Kalaallisut oqalussinnaavunga. Angajoqqaarsiakka marluullutik naqinnernik ilisarinnissinnaanngillat, tamannalu uannut sunniuteqarsimavoq. Taamaattumillu tamatumunnga atatillugu sumiginnarneqarsimaqaanga, oqarpoq.
Solvej Josefsen oqaluttuarpoq angutisiami periarfissaqarnerulersinniarluni Danmarkimut nuutsinniarluni aalajangersimasoq, tassanilu angutisiami angajoqqaavini Hundestedimi Sjællandip avannaaniittumi najugaqarpoq.
- Qangatut perorsagaapput. Sukannerujussuupput naqinnernillu ilisarinnissinnaannginneq akueriumanagu. Tamanna aamma pissutaasimagunarpoq angutisiama Kalaallit Nunaannut suliartorneranut, eqqissilluni ukiuni arlalinni sulerusulluni. Ukiunilumi 40-ni Kalaallit Nunaanniippoq. Isumaqarpunga taassuma angajoqqaami sukannerpallaarnerat qimarratigisimagaa, tamannalu taakkunani najugaqarallarama paasivara, 58-inik ukiulik Solvej Josefsen oqarpoq.
Solvej Anne Marie Josefsen (septembarip 22-anni 1963-imi inuusoq) Jyllandip avannaani Nørresundbymi utoqqarnut inissiami najugaqarpoq.
Foto: Privat
Frederiksværkimi atuarfimmi immikkut ittumi innarluutilinnut immikkoortortaqarfimmi atualerami, aatakkuminit sukannersunit qimagunnissaminut periarfissaqalerpoq. Atuarfimmilu tassani innarluutit assigiinngitsut isiginiarneqarluarlutik.
- Ukiuni pingasuni nuannersuni tassaniippunga efterskolemut atuariartornissama tungaanut. Taava iggavimmi ikiortitut ilinnialerpunga Aalborgimilu kollegiami najugaqarlunga, tassani kalaallit arlallit najugaqarput kalaallinillu aamma ilinniartitsisoqarluta, oqaluttuarpoq.
Avinneq
Solvejip suli atualinngitsoq angajoqqaarsiai avipput. Arnarsiani qanoq imerajutsigisoq oqaluttuaraa. Tamatuma kinguneranik angutisiaa Solvejimut angajoqqaatut oqartussaassuseqalerpoq. Arnarsiaa Kujataani najugaqaannarpoq, Solvejilli arnarsiami atornerluisuunera pissutigalugu angutisiami Nuummut nooqatiginissaa kissaatigisimallugu.
Tamanna pillugu arnarsiaa ima kamatsigaaq, Solvejip assingi tamaasa eqqarsimallugit. Assit marluk allaaserisami matumani ilanngunneqartut, meeraagallarami assingini sinneruttutuaapput.
- Ataataviga ilisarisimanngilara. Tamakku tamarmik suli pinngitsut toqusimavoq. Taamaattumik takorloorsinnaavara anaanaviga aningaasatigut ajornartorsiorsimassasoq. Immaqa tamanna pissutigalugu inunngorama kissaatigisarisimanngilaanga. Tamakku tamaasa angutisiannit ilisimavakka. Angutisiamami qitornavissiaanera isertuutinngisaannarsimavaa. Akerlianik arnarsiama qitornavissiartaarineqarnera isertuulluinnartarpaa. Marluullutik maanna toqoreerput, apeqquterpassuillu niaqqunniittut akissutissarsisinnaanngilakka, oqarpoq.
Nuummut uterneq
Solvej Josefsen inuusuttuulluni Danmarkimut nuunnermi kingornagut
marloriarluni ukiup affaani Kalaallit Nunaanniissimavoq. Anaanat Illuanni suliffimmik misiliisarami, tassanilu iggavimmi ikiortitut ilinniakkani naammassivaa. Ilinniakkani taanna tulluusimaarutigeqaa.
- Kalaallinimmi kingoqqisuugama, pilertortumik sungiussipallappunga. Meeraagallarama uannik ilisarisimannittut qanoq inninnik aperisarpaannga, ilisarisimannittunillu oqaloqateqaraangama angerlarsimasutut misigisarlunga, taama eqqaamasalersaarpoq.
- Nuummut uternissara takorloortarpara, 1980-ikkunnili tassaniissimaninnit allannguutit takorusullugit takorloortarpara, Solvej Josefsen oqarpoq, taassumalu pisuutini ajattarlugit iggavimmukariarluni assit igavimmi matuni nivingasut takutillugit.
Solvej sisamanik ukioqarluni kalaallisoortoq, dronning Ingridimut naasunik tunisisussaalluni.
Foto: Privat
Danmarkimi katissimavoq, marlunnillu erneqarluni. Erneri marluk assini takuneqarsinnaapput,
Facebookimi allaaserisap saqqummiunneqarnissaata tungaanut ilaqutatuamisut ilisarisimasai.
Solvej Josefsenip ilaquttaminik ujaasinissaanut pissutaasoq pingaarnerpaaq tassaavoq qatanngutini ilisarisimalerusukkamigit. Anaanavini toqoreersoq nalunngilaa. Angajoqqaarsiai aamma toqoreerput.
- Anaanaviga uanga pillunga oqaluttuarusussimanngimmat, paasilluarsinnaavara qatanngummik arnamik ilisarisimanngisamik takkuttoqariasaarnera qanoq sakkortutigisarsimassasoq. Eqqumiissaqaarmi paasillugu anaanarisap meerartaarsimanini meerarsianngortitsisimaninilu isertuulluinnarsimammagit, oqarpoq.
Inoqatinut attaveqaqatigiittarfikkut saqqummiussinerata kinguneranik angajuni ukiunik arfineq-pingasunik angajulliusoq, qatanngutigiinnilu angajullersaasoq, Fynimi najugalik attaveqarfigilerpaa. Taassumalu oqaluttuaraa Solvej ilanngullugu qatanngutigiit aqqaniliullutik.
- Oqarasuaatima normua Facebookimi nanisimavaa sianerporlu aperalungalu oqaloqatiginissaanut piffissaqarnersunga. Aallaqqaammut isumaqaraluarpunga tuniniaasartup sianerfigigaanga, illarluni oqarpoq.
Suli neriuuteqartoq
- Qatanngutima allat aamma attaveqarfigerusummannga paasisinnaavara, kisianni piunerma sungiunniarnissaanut piffissaqartariaqarput. Piunera ilisimasimanngisaannarpaat, maannalu takornartamit oqarfigineqarlutik assigiimmik anaanaqarlutik. Tamattami kissaatigaarput uanga aamma taakkua ilaqutaannut ilannguttussaasunga, Solvej Josefsen oqarpoq, taassumalu neriuutigaa kalaallit ilaquttami aviisi atuassagaat inoqatinullu attaveqaqatigiittarfiit aqqutigalugit attaveqarfigalugu.
- Anaanarput toqoreermat aperisinnaanngilarput. Niaqqunni suli apeqqutissarpassuaqarpunga, naak apeqqutit angisuut inissinneqareeraluartut. Nalunngilara anaanaga kinaanersoq inunngorninnilu qitornavissiartaarineqartunga. Tamakkuli tamarmik ilaquttannut qanoq attuumassuteqarnersut suli paaserusuppakka, oqarpoq.
