SIUMUT NUUK
Jørgen Wæver Johansen tunuarpoq - Aká Hansen siulittaasunngorluni
Siumut Nuuk arfininngornermi maajip 16-iani ileqquusumik ataatsimeersuarmat nutaamik siulersuisoqalerpoq. Jørgen Wæver Johansen ukiuni 33-ni Siumumut ilaasortaasoq partiimit tunuarpoq, taamaalillunilu aamma Siumut Nuummi siulittaasuujunnarluni. Aká Hansen tassaalerpoq immikkoortortaqarfiup siulittaasua.
Siulersuisunngortut qulaani saamerlermiit: Inunnguaq Reimer, Lars David Mølgaard, Poul Olsen, Peter Davidsen. Ataani saamerlermiit: Aká Hansen aamma Doris J. Jensen. Siulersuisuni ilaasortanngortoq Ane Lona Bagger assimi ilaanngilaq.
Assi: Siumut Nuuk
Siumut Nuummi immikkoortortaani siulersuisunut ilaasortani arfineq-marluusuni pingasut ingerlaqqipput. Taamaalilluni siulersuisunut ilaasortat affaat sinnerlugit nutaajullutik.
Siulersuisut nutaat inissititernerat Nuummi Qapiarfiusaami ataatsimoortarfimmi arfininngornermi maajip 16-iani ileqquusumik ataatsimeersuarnermi pivoq.
Aká Hansen Siumup illoqarfiit annersaanni immikkoortortaqarfiani siulittaasunngorpoq. Siulersuisunut ukiut tamaasa maajimi qinersisoqartarmat siulersuisunngortut aappaagu tungaanut atuutissapput. Aká Hansen isummanik siammarterisutut politikkip silarsuaani ukioq manna sassarpoq, Folketingimummi qinersinermi kingullermi partii sinnerlugu qineqqusaarami.
Siumutoqaq tunuartoq
Annermilli maluginiagassaavoq Siumut Nuummi ukiuni marluni kingullerni siulittaasuusoq, Jørgen Wæver Johansen, partiimit siulersuisunillu tunuarluni ileqquusumik ataatsimeersuarnermi nalunaarutigimmagu. Facebookimilu quppernermini ima allappoq.
- Taamaammat aamma aalajangerpunga ukiut 33-it suleqataaffigisara, nuannersuni ilungersunartunilu, SIS-imi ilaasortatut, SIS-imi siulitaasup tulliatut, SIS-imi siulitaasutut, Siumumi arlaleriarlunga naalakkersuinikkut Siulittaasup tulliatut, Aleqa Hammondilu tunuartitaallarmat ikaarsaariarfimmi Siumumi siulittaasuutut, qinigaaqqittuaannarlunga Inatsisartuni ilaasortatut, arlaleriarlunga Naalakkersuisunut ilaasortatut, Siumut Qaqortumi siulittaasutut, Kommune Kujallermi Borgmesteritut, Kommunalbestyrelsimi ilaasortatut aamma ataasiaannarnanga Siumut Nuummi siulittaasutut suleqataaffigisanniit ullumi, maannakkut, ilaasortaaninnit tunuassallunga, Jørgen Wæver Johansen taama allappoq.
Siumut naalakkersuisoqatigiinnit animmat Siumutoqqat nuimasut arlallit tunuarput. Tassa Vivian Motzfeldt aamma Kim Kielsen marsimi tunuaramik.
