Jens-Frederik Nielsen qinigaaqqittoq
Demokraatit nuna tamakkerlugu ulluni pingasuni ataatsimeersuarmata partiip siuttua Jens-Frederik Nielsen unammillerteqarnani siulittaasutut qinigaaqqippoq. Siulersuisuuninngortut marlunnik nutaartaqarput.
Siulersuisuuninngortut saamimmiit: Siulersuisunut ilaasortat heidi Møller Pipaluk Olsenilu, aaqqissuussaanikkut siulittaasup tullia Anna Wangenheim, siulittaasoq Jens-Frederik Nielsen, politikkikkut siulittaasup tullia Nivi Olsen, aningaaserisoq Malene Vahl Rasmussen kiisalu siulersuisuni ilaasortaq Lena Ravn Davidsen.
Assiliisoq: Ernst Bo Frederiksen
Ukioq kingulleq Demokraatinut pisoqarfioqaaq. Siornami qinersinermi nunatsinni partiini annerpaanngorput kommuninilu marlunni borgmesteriutitaqalerlutik. Naak Folketingimut ukioq qinersinermi isertitaqanngitsooraluarlutik Nuummi akunnerup naanerani katerikkamik eqqartugassaaleqisimassanngillat.
Katerinneq tallimanngormat aallartinneqarmat politikkikkut inissisimaneq oqallisigineqarpoq. Tassani Naalakkersuisut, Inatsisartut, borgmesterit kommunalbestyrelsemilu ilaasortat killiffimmik ilaatigut nassuiaallutik.
Arfininngornermi ileqquusumik ataatsimeersuartoqarpoq, tassanilu siulersuisuunernut qinersisoqarluni.
Arnarpassuit angutitatuallit
Siulersuisuunernut qinersisoqarmat Jens-Frederik Nielsen unammillerteqarani siulittaasutut ingerlaqqippoq.
Siulersuisuunernullu inissittut amerlanerpaat ingerlaqqipput. Marlunnilli nutaanik ilaasortanngortoqarpoq, tassa Avannaata Kommuniani kommunalbestyrelsemi ilaasortaq Heidi Møller siulersuisuunernut ilanngukkami.
Taassumalu saniatigut Inatsisartunut siorna qinersisoqarmat ilaasortanngortoq Pipaluk Olsen siulersuisuunernut ilaasortanngorluni.
Partiimi siulersuisuunerit siulittaasoq minillugu ataatsimeersuarnerup siuliatigut arnaannaasimasut, siulersuisuunernut qinersinerup kingorna taamatulli inisseqqipput.
Katerinneq sapaammi naggaserlugu ilaasortanut sammisaqartitsisoqarpoq pikkorissaasoqarlunilu.
