Ilinniartitaaneq
Pisortaq nutaaq: Inuili inuussutissarsiornermik ilinniarfittut ilinniartut nuannarinerpaasaattut ineriartortitsinneqassaaq
Nivikka Brandt Narsamut nuulluni inuussutissalerinermik ilinniarfimmi Inuilimi inuussutissanik piujuartitsilluni tunisassiornermut namminerlu pilersornissamut qitiusumik ineriartortitsinermi siuttuusussanngorpoq.
Nivikka Brandt Narsami inuussutissalerinermik ilinniarfimmi Inuilimi nutarterinermut aqutsisussatut Narsamut nooqqammerpoq.
Assi: Naalakkersuisut
Inuussutissalerinermi ilinniarfik Inuili nunalerinermik, imminut pilersornermik piujuartitsinermillu siuarsaaniarnermi pingaarutilimmik inissisimassaaq.
Ilinniartitsineq soorlu qappitsinermik, nerisassanik igitsisarnermik, karsinik naatitsisarfiusartunik aamma ikittunik uumasuuteqarnermik annertusarneqassaaq. Siunissaq ungasinnerusoq eqqarsaatigalugu illup iluani naasorissaasarneq, annikitsumik nunalerinermik ingerlatsineq imminullu pilersorsinnaaneq sammineqarnerussapput, taamaalillunilu nerisassanik avataaneersunik pisariaqartitsineq annikillisinneqarlunilu nerisassanik igitsisarneq annikillisinneqassaaq.
“Suliniutini taakkunani Kalaallit Nunaata piujuartitsilluni inuussutissalerinermi siuttuulluni inissisimaffini nukittorsarsinnaavaa peqatigisaanillu nunarsuup immikkoortuani aningaasarsiornikkut siuariartorneq imminullu pilersorneq siuarsarlugu, Naalakkersuisut 2024-mi nalunaarusiaanni allassimavoq.
- Nunarsuarmi nerisassiassat pitsaanerpaat ilaat nunatsinniipput, inuppassuillu imminut pilersorsinnaaneq kulturikkut sammisarisarpaat, Inuilimi pisortanngortoq Nivikka Brandt oqarpoq.
Assi: Nammineq pigisaq
Suliaq
Inuilip nutarterneqarnerani Nivikka Brandt, ilaquttanilu Nuummiit Narsamut nooqqammersoq, siuttuussaaq.
- Inuussutissarsiornermi ilinniarfinni inuussutissarsiornermilu ilinniakkani sulinermik sammisaqartarneq pingaartinneqartarmat pingaaruteqartorujussuusut isumaqarpunga, Nivikka Brandt, umiarsuarmi naalakkatut ilinniarsimasoq ukiorpassuarnilu umiartortarsimasoq, oqarpoq.
Tamatuma saniatigut Imarsiornermik Ilinniarfimmi pisortaasimallunilu ukiuni arlalinni Naalakkersuisut Siulittaasuata Naalakkersuisoqarfiani sulisimavoq.
Inuussutissanik tunisassiornermi nutaaliorfik
Nivikka Brandtip ilinniarfiup nutarternissaa inuussutissanik tunisassiornermi imminullu pilersornerup tungaatigut nutaaliornermut qitiusutut isigaa, tamannalu Kalaallit Nunaanni uumassusililerinermik ilinniarfittaarnitsinnut – SILA-mut – naapertuuppoq.
– Nunarsuarmi nerisassiassat pitsaanerpaat ilaat nunatsinniipput, inuppassuillu imminut pilersorsinnaaneq kulturikkut sammisarisarpaat. Aammali inuussutissanik tunisassiornermut tunngatillugu nutaaliornerusariaqarpugut. Atuarfik periutsinik assigiinngitsunik misileraaffiusinnaasutut ineriartortinneqarumaartoq Kissaatigaara. Naasunik inuussutissatut atugassanik imeq akuutissalluunniit inuussutissallit atorlugit naatitsisarusinnaavoq, imaluunniit kalaallit nerisassiaannik taamaallaat tunngavilinnik qanoq nerisassiortoqarsinnaaneranik isumassarsiat periutsilluunniit sammineqarsinnaapput.
Nivikka Brandtip ilaquttani Narsamut nooqatigai.
Assi: Nammineq pigisaq
Imminut pilersorneq
Ullumikkut nunalerinerup ingerlaannarnissaa qulakkeerniarlugu nerukkaaterpassuit avataaneersut tikisinneqartarput. Taamaammat Nivikka Brandt aalajangiisuussagaluarpat suliffissuaqarnermi inoqutigiinnilu imminut pilersorneq pingaartinnerussagaluarparput.
– Ilaqutariiulluta neqinik imminut pilersorpugut - pingaartumik tuttunik, pinngortitamilu naasunik paarnanillu katersisarpugut. Aamma aalisakkanik, qalerualinnik uillunillu. Ilinniarfik ilinniartut nuannarinerpaasaat pilersinniarlugu Narsami periarfissaqarluartoq pinngortitallu pisuussutai matup silataaniittut atorluarneqarsinnaasut isumaqarpunga.
Allaaserisaq aviisimiit ilinniarneq pillugu sammisameersuuvoq, akeqanngitsumik una toorlugu atuarneqarsinnaavoq.
