Angalasut nuannaartut Nuummi timmisartoqarfiup illorsuartaavanik ammaanersiortut
Nuummi timmisartoqarfiup illorsuartaava atorneqalerpoq, ataasinngormallu ullaakkut angalasut nuannaartut siullerpaallutik illorsuarmit timmisartumut ikiartortuupput.
Timmisartoqarfimmi illorsuatoqaq maanna oqaluttuaannanngorpoq. Greenland Airportsip ataasinngormat ullaakkut timmisartoqarfiup illorsuartaavata matui ammarpai, siunissami Nuummit Nuummullu angalasunut tamanut kiffartuussivissaq.
Ataasinngormat ullaakkut Greenland Airportsimit angalasut siulliit ullaakkorsiortinneqarnerannik ulloq nalliuttorsiutigineqarpoq.
- Piffissaq nutaaq pissanganarluinnartoq Greenland Airportsimut Kalaallit Nunaannullu aallartippoq. Angalasut tamarmik illorsuarmut tikilluaqqunissaannut sullitattalu tamarmik sullilluarnissaannut qilanaarpugut, Greenland Airportsimi pisortaaneq Jens Lauridsen ingerlatseqatigiiffiup Facebookimi quppernerani allappoq.
Angalasut nassatanik tunniussinermi malittarisassat nutaat eqqumaffigisariaqaraat timmisartortitseqatigiiffik allappoq. Allaaserisap qulaani illorsuup ammarneqarneranit assit takusinnaavatit.
