Múte B. Egede akuersisoqareersoq: – Sulineq aatsaat aallartilerpoq

– Aqqussua ilungersunarnikooqaaq. Inuiaat kalaallit sinnerlugit tulluusimaarpunga, Múte B. Egede (IA) tussunngulluni oqarpoq.

Naalakkersuisoq Inatsisartut iluani suliaq maanna naammassimmat oqiliallassimanini isertuussinnaanngilaa, taamaalillunilu misigissutsini ersarippoq. Tunuminiippoq kalaallit aallartitaasa isumaqatigiissuteqartarnermut pisortaat Mininnguaq Kleist, taanna aamma ersarissumik oqiliallassimavoq.

– Nunami maaniittuarnissamut toqqammaviit nalorninarsinnaasarsimagaluartut maanna qaangiupput. USA-mik qallunaat nunaannillu inatsisitigut pituttugaasunik isumaqatigiissuteqarnikkut maanna alloriarsinnaanngorpugut, Múte B. Egede oqarpoq.

Naalakkersuisup suliap Inatsisartuni naammassineqarnera tussunngussutigalugulu oqiliallassimaarutigigaa takuneqarsinnaavoq. Kalaallit isumaqatigiinniartuisa siuttuat Mininnguaq Kleist tunuani utaqqivoq, tassuma oqiliallassimanera aamma malunnarpoq.

Angusaq annertuutut taavaa, kalaallillu taama anguaqarnermi tunngaviliisuunerarlugit.

– Nunatsinnik piginnittuuginnarsinnaanerput nalorninarsinikuugaluarami. Ilumut pigiinnassaneripput nalorninarsisarnikuugaluarami.

– Inuppassuit suleqataaffiginikuuaat, taamaakkaluartorli maanga killinnissatsinnut inuiaat kalaallit tunngaviliisuupput.

16-it isumaqatigiissummut akuersipput

Illersornissamut isumaqatigiissut 16-init akuerineqarluni, arfineq-marlunnillu taaseqataaffigineqarani akuersissutigineqarpoq.

Inuit Ataqatigiit, Demokraatit, Atassut attaviitsorlu Kim Kielsen akuersillutik taasipput. Siumut taaseqataanngilaq. Ilaasortat ataasiakkaat sulinerminnut atatillugu angalanerat napparsimasoqarneralu pissutigalugu partiip taaseqataannginnissaa Inatsisartut Siulittaasoqarfianut isumaqatigiissutaavoq. Partiili illersornissamik isumaqatigiissummik 100 procentimik tapersersuisoq Siumut sinnerlugu Inatsisartunut ilaasortaq Erik Jensen Sermitsiamut ilisimatitsivoq.

Naleqqap siullermeerinninnermi isornartorsiuinini attatiinnarpaa. Partiip USA-miit aningaasaliisoqarnissaa piumasaralugulu kalaallit suliffeqarfiisat aningaasatigut iluanaaruteqarnissaasa qulakkeerneqarnissaa piumasaraa.

– Suleqatigiinnissaq pinnagu isumaqatigiissutip Kalaallit Nunaannut kingunissaa isornartorsiorparput, Naleraq aappassaaneerinninnissaq sioqqullugu ikinnerussuteqarluni oqaaseqaammini ilaatigut allappoq.

Partii sakkutooqarnikkut periarfissarpassuarnut toqqaannartumik nunatta karsianut akiliisoqartarnissaa qulakkeerneqarsimanngitsoq ilaatigut isumaqarpoq. Kiisalu kiffartuussinissamik isumaqatigiissutit suliffeqarfinnut kalaallinit pigineqartunut tunniunneqassasut sinneqartoorutilluunniit Kalaallit Nunaanniiginnarnissaat isumaqatigiissummi qulakkeerneqanngitsoq partiip aamma isornartorsiorpaa.

Naleraq isumaqatigiissut avatangiisinut tunngasunik nutaanik pisussaaffiliinngitsoq aamma isumaqarpoq.

– Avatangiisinut tunngasut eqqarsaatigalugit isumaqatigiissummi amerikamiut sakkutuuisa mingutsitsisimanerannik saliinissaq, avatangiisinik saliinissamut aningaasalersuineq taarsiissuteqarnissamilluunniit akisussaaffik pillugit nutaamik pisussaaffilerneqartoqanngitsoq Naleqqamit nalilerneqarpoq.

Partii isumaqatigiinniarnerit pillugit paasissutissiinermut tunngatillugu Múte B. Egedemut tatiginnikkunnaarnermik taasititsinissamik aamma saqqumiivoq, taannali naalakkersuisooqatigiinnit attaviitsumiillu Kim Kielsenimit pinngitsoortinneqarpoq.

Naleraq nipangiussisimasussaatitaanermik unioqqutitsisimasutut politiinut aamma unnerluutigineqarpoq, tassani Inatsisartuni Nunanut allanut Sillimaniarnermullu Ataatsimiititaliap matoqqasumik ataatsimiinnerani paasissutissat partiip ikinnerussuteqarluni oqaaseqaateqarnermigut saqqummiussisimanera nipangiussisimatitaanermik unioqqutitsinertut pasilliutigineqarluni.

Danmarkip isumaqatigiissut akuersissutigeqqaassavaa

Isumaqatigiissut Inatsisartuni akuersissutigineqaraluartoq suliaq suli naammassineqanngilaq. Folketingimi novembarip 12-ani siullermeerneqassaaq, novembarillu 19-iani aappassaaneerneqarluni taasissutigineqartussaassalluni.

Akuersissutigineqareerpat nunat taakku pingasut suliaminnik nangitsisinnaanngussaput, suleqatigiissitallu pioreersut aqqutigalugit ataatsimiinnerit aallartittussanngussallugit.

– Sulineq aatsaat aallartilerpoq, Múte B. Egede oqarpoq.

Suliap ingerlateqqinnissaanut innuttaasut peqataatinneqassasut, ilaatigut Kalaallit Nunaanni sakkutooqarfiliortoqassappat sinaakkutissat aalajangersarneqarnissaani innuttaasut tusaaneqartarumaarnerat naqissuserpaa.

– Sakkutooqarfiliortoqassappat oqaloqatigiissutigissavagut, suut malinneqassanersut eqqartussallugit. Soorunami innuttaasut tusaaneqarlutillu peqataatinneqassapput.

– Danmarkip piareersarnissaa qilanaaralugu utaqqivarput.