Juulip aallaqqaatani Ivalo Knudsen Kommune Kujallermi Narsami meeqqanik inuusuttunillu sullissivimmi sulilerami nuannaarpoq.
- Arlaatigut illoqarfimmi kivitseqataanissamut peqataarusukkama, meeqqallu siulliullugit ikiorneqarnissaat peqataaffigerusukkakku, taakkuummatami ungasinnerusoq eqqarsaatigalugu illoqarfimmi isumagisassat, oqaluttuarpoq.
Sulisutut aamma atorfissaqartinneqarpoq.
Kommuneq Kujallermi inunnik isumaginninnermut immikkoortortami unammillernartut annertuut pissutigalugit, meeqqanut inuusuttunut innarluutilinnullu immikkoortortap aqunneqarnera ingerlanneqarneralu Novembarip 7-iani 2024-miilli Naalakkersuisunit akisussaaffigineqalerpoq.
Aviisilli uuma ungasinngitsukkut qulaajarpaa, siunnersuisarfiup BDO-p Naalakkersuisut sulineranni killiffissiuilluni nalunaarusiaani juunimi naammassineqartumi ersersinneqartoq, sullissisinnaasunik atorfinititsiniarneq ajornakusoorsimasoq.
Siunnersuisartut misissuinerata ersersippaa Naalakkersuisut susassaqarfimmik tigusinerata kingornanut sanilliullugu Narsami pissutsit ajornarulersimasut.
Taamani ukiut marluk matusa siorna Narsami atorfiit tamarmik inuttaqarsimagaluarput, BDO-lli nalunaarusiaani allassimavoq sullissisup ataasiinnaap illoqarfimmi suliassat meeqqanut tunngasut 183-it kisimiilluni suliarigai, sullissinermi atorfiit tallimanik inuttaqartussaagaluartut,
Aviisip aallartitaa septembarip naanerani Narsamiimmat pissutsit pitsaanerulersimanngillat. Taamaalinerani Ivalo Knudsen, nammineq oqarnera naapertorlugu, atorfimmi kisimiillu sullissisuuvoq.
Naapikkatsigu suliunnaarsinneqaqqammerpoq.
- Kommunip pisortaqarfittut ilaqutariinnut iliuuserisartagau ilungersunartuupput. Taamaammmat suliap nalunngeqqissaarnissaa pingaarutilerujussuartut isigaara. Killissat sumiinnersut, susinnaanerlunga aamma susinnaannginnerlunga. Taakku tunngavissaapput, Ivalo Knudsen oqarpoq.
Assi: Birgitte Kjeldsen
Ilerasunneq annertooq
Ivalo Knudsen Narsami inunngorlunilu peroriartorpoq, ukiut 17-it illoqarfik qimaqqareerlugu angerlarsilerpoq. Taava Kommune Kujalleq meeqqanut inuussuttunullu akisussaaffilimmik sullissisussarsiortoq takugamiuk, periarfissaq atorluarlugu qinnuteqarpoq.
- Meeqqat pisussaat soqutigisorujussuuara, oqaluttuarpoq.
Ilaquttanilu Nuummi najugaqarallarami kalaallit meerartaasa Danmarkimi pinngitsaalisamik peersinneqartarneranut akerliussutsimik takutitsinermik aaqqissuusseqataavoq. Tamatuma saniatigut meeqqanut tunngasuni suliani illuatungiusumut sinniisuusarpoq ilaqutariinnullu tapersersortaasarluni.
Meeqqanut ilaqutariinnullu meerartalinnut inuttut tunniusimanermi saniatigut Ivalo Knudsen inunnik isumaginninnermik ilinniakkamik assigisaanilluunni ilinniagaqanngilaq. Ilisimitasusarfimmi teologimi bacheloritut ilinniagaqarluni.
Taamaattorli Kommune Kujallermiit oqaloqatigiinnissamut aggersarneqarpoq.
- Atorfinititsiniarluni oqaloqatigiinnermi qinnuteqarsimanera teologitullu tunuliaqutaqarnera nuannarerpasippaat, eqqaamasaminik oqaluttuarpoq.
Oqaloqatigiinneq ingerlalluarpoq suliffittaarporlu – sanileqarluni sukumiisumik ilinniartinneqarnissaanik sulianullu iseriartuaartinneqarnissaannik neriorsorpaat, eqqaamavaa.
- Kommunip pisortaqarfittut ilaqutariinnut iliuuserisartagau ilungersunartuupput, Ivalo Knudsen oqarpoq.
- Taamaammmat suliap nalunngeqqissaarnissaa pingaarutilerujussuartut isigaara. Killissat sumiinnersut, susinnaanerlunga aamma susinnaannginnerlunga. Taakku tunngavissaapput.
BDO-p nalunaarusiaa Sermitsiaq.AG-mit allagaatinik takunnissinnaaneq atorlugu pissarsiarineqartoq naapertorlugu piffissami aalajangersimasumi Narsami meeqqanut tunngasunik suliaqartup ataasiinnaap suliassat 183-it suliarisussaavai.
Assi: Birgitte Kjeldsen
Kisianni atorfinitsinneqarnermi kinguninngua sulianik meeqqanut tunngasunik pinartunik suliaqartussanngortinneqarpoq, taamaalineranili ilinniartitsissutigineqarsimasutuaq tassaavoq suliamik ingerlatsinermut qarasaasiatigut atorneqartartup ulluni marlunni pikkorissarfigisimanera.
Sapaatit akunneri marluk qaangiummata Ivalo Knudsen aqutsisuminut mailerpoq, ilinniartitsissutimininnguit ernummatiginerat anngullugu.
- Sulianik pinartunik suliaqartarnissara pisunilu ajornakusoortunik aalajangiisarnissara piareersimaffigilluinnarpara. Tamanna aamma akuerisinnaavara. Kisianni innuttaasut inatsisit atuutsinneqarneratigut qularnaatsumik sullinneqassasppata, sulinerlu eqqortumik illersorneqarsinnaasumillu ingerlanneqassappat ilinniartinneqannginnera ajornartorsiutaavoq, taanna oqarpoq.
Ivalo Knudsenip nalunngeqatiginnissusaa akulikitsumik misilinneqartarpoq. Ilaatigut sulianik pinartunik suliaqartinneqaraangat.
- Sulileqqammerlunga pinartumik suliaqarpunga, oqarpoq tikkuaallunilu:
- Allaat suliaq suliarisinnaanngitsutut isigisara suliaraara, pineqartumi isumaqataannginnama. Kingorna ulloq taanna qissaserpunga.
Sulianik tassunga assingusunik allanik takkuttoqarpa?
- Aap, akivoq.
Suliat sukkasuumik amerlippput.
- Ullut siulliit marluk misiliutissannik suliakkerpaannga, sulinermi atortagaat ilikkarniassagakku. Kingorna suleqatinnut allappunga, suliassanik misilissinnaasannik, immaqa ikiorteqarlunga suliarisinnaasannik, peqarpat uannut nassiussinnaagaat, akivoq.
- Taava ataaseq takkuppoq, aamma ajunngilaq. Taavalu aamma alla takkuteriasaarpoq, taava tassanngaannaq nalunaarutiginnittorpassuit takkussuutilerput, oqarpoq nangillunilu:
- Naggataatigut, jah. Naluaraluunniit suliat qassiunersut.
Pinartoqaraangat Nuuk ungasittaqaaq
- Ajunngilaq, kisianni suliat ingerlanerat kigaatsorujussuuvoq, saninni aperiinnarsinnaasannik inoqanngikkaangat amerliartortarput. Isumaginninnermut Aqutsisoqarfimmut telefon normu pigaara siunnersorneqarsinnaallunga, kisianni taakku tamatigut piffissaqarneq ajorput.
Ivalo Knudsen aqutsisuminut juulip 27-ani taama allappoq. Arlaleriarluni maileraluarpoq, ilinniartinneqarnissani apersuutigalugu, ksianni soorlu susoqarpianngitsoq.
Ilisimatinneqarpoq susassaqarfik Naalakkersuisunit akisussaaffigineqarmat tapersersorneqarnissamik siunnersorneqarnissamillu pisariaqartitsiguni Isumaginninnermut Aqutsisoqarfik Nuummiittoq attavigisarsinnaagaa.
- Suliffiinnaanngilaq. Inuit inuunerat akisussaaffigineqarpoq.
Ivalo Knudsen, Narsami meeqqanut inuusuttunullu immikkoortumi sullissisutut sulisimasoq.
- Kisianni tamatigut inuit telefonitik tiguneq ajorpaat, pingaartumik pisuni pinartuni innuttaasoq saninniitillugu massakkoqqissaarlu akineqarnissamik pisariaqartitsitillugu. Nuummilu telefoni tiguneqanngippat, taava tassa kisimeeqqissartutut misiginartarpoq, Ivalo Knudsen oqarpoq.
BDO-p nalunaarusiaani juunimeersumi siunnersuisartut naliliipput Isumaginninnermut Aqutsisoqarfiup Kujallermi Teamianit tapersersorneqarnissaq kujataani tamani suli annertusoq. Ivalo Knudsenilli sulinerata nalaani, aallarteqqammernerata nalaani suliamik ingerlatsinermut programmi ilitsersuussutigineqarmat Isumaginninnermut Aqutsisoqarfimmit tikeraarneqarput.
- Tamatuma saniatigut taassuma suliat tuaviuussaanerpaat isumagivai, ulapippallaanngikkaangat aperisinnaasarlunga.
Suleqatini aqutsisutillu arlallit peqatigalugit aggustip naanerani tarnikkut ikiueqqaarnermik Qaqortumi pikkorissartillutik, Ivalo Knudsenip ilitsersuunneqannginninni ataatsimoornermi tamanut eqqaavaa.
- Sumiiffimmi najugallit allat aamma taamatut misigisaqarnersut takuniarlugu. Kisianni aqutsisut ingerlaannaq imminnut illersulerput eqqumiilliornarsilluni. Eqqarsarpunga eqqartorneqarnera iluaagigaat kisianni tamanna sioqqullugu allaffigereeraluarpakka, Ivalo Knudsen oqarpoq.
Ilinniartinneqarnissani atorfinititsiniarnerni oqaloqatigiinnermi neriorsuutigineqartoq arlaleriarlugu kissaatiginerareeraluaraa eqquutsinneqanngilaq. Toqqissisimanaranilu erloqinarpoq. Kommuni aamma Isumaginninnermut Aqutsisoqarfimmi aqutsisut akisussaaffimmik tigusillutik ilinniartinneqarnissanik ilungersuussinissat kissaatigigaluarpaa.
- Piginnaasaqanngitsutut misigaanga, taava eqqarsarpunga kommunip iluamik ilitsersuunnianngippanga nammineq anaanatut malussarissusera aallaavigiinnarniarlugu, oqarpoq.
Suliarpassuit naammassineqanngitsut
Qaammatini pingasuni Ivalo Knudsenip atorfeqarnerata nalaani suliassarpassuit naammassineqanngitsut amerliartorput.
Suliat amerlanertigut aallartittariaqartarpai, pinarnerit aaqqillugit siulialu naammassitinnagu nutaamik aamma aallaritseqqittarluni.
- Orninneqarlunga sulianik iluamik naammassinninnissamut ikiorserneqarnisssara pisariaqartikkaluarpara, oqaluttuarpoq.
Meeqqanut suliat taama amerlatigusut akisussaaffigalugit pikkunarpoq, septembarillu ingerlanerani Ivalo Knudsen allamik suliffissarsiulerpoq.
Naggataagut, atorfinninneranit qaammatit marluk qaangiummata, ikiuiartortoq siunnersorti avataaneersoq takkuppoq, taanna ilinniartitsisussatut kommunimit sulisinneqarpoq.
- Nuannaartorujussuuvunga, Ivalo Knudsen oqarpoq.
Siunnersortip Ivalo Knudsen ulluni 14-ini ikiortussaagaluarpaa teknikimilli silarlunneranillu peqquteqartumik ulluni tallimani kinguaattoorpoq.
Taava Ivalo Knudsen soraarsinneqarpoq.
Novembarip arfineq-aappaani ukiut marluk matuma siorna Kommune Kujallermi meeqqat inuusuttullu aamma innarluutillit pillugit suliassaqarfik Naalakkersuisunit alkisussaaffigineqalerpoq. Narsami sullissisutut atorfiit taamani tamakkerlutik inuttaqartut, BDO-p nalunaarusiaani atuarneqarsinnaavoq.
Assi: Birgitte Kjeldsen
Soraarsitsinermut atatillugu Ivalo Knudsenip aqutsisuminik telefonikkut oqaloqateqarneranik allakkatigut imaqarniliami allassimavoq, qaammatit pingasut misiliinerup kingorna suliunnaarsinneqarnissaa aalajangiunneqarsimasoq.
- Atorfinitsinnerani teologitut ilinniarsimanera sullissinermik atorfimmi suliarineqartartunut tulluartuunissaa neriuutigisimagaluarparput, imaqarniliami allassimavoq.
Tulluartumilli ilinniagaqarsimannginneranik tunngavilersuuteqarlutik suliunnaarsitsinerat Ivalo Knudsenip pisariaqartitani naapertorlugit ilinniartinneqannginnini eqqarsaatigalugu “oqippallaarsoraa”.
Ilimagaajuk piffissaqaratillu nukissaqarsimanngitsut?
- Nukissaqanngillat, aamma taarseraattoqarpallaarpoq. Taamaammat nukissaarussoraakka, tamanna aamma paasinarpoq, Ivalo Knudsen akivoq.
Aqutsisut akisussaassusillit maqaasivai
Ivalo Knudsen maanna Inuussutissalerinermik Ilinniarfimmi Inuilimi Narsami kontorfuldmægtigitut sulivoq, tamannalu nuannaraa.
- Soorunami aamma uggornartortaqarpoq. Peqquteqarlungami kommunimut qinnuteqarpunga. Soqutigigaluarpara aamma meeqqat atugarissaarnerulernissaanut suleqataarusukkaluarama.
KOMMUNi AAMMA ISUMAGINNINNERMUT AQUTSISOQARFIK ISORNARTORSIUINERMUT AKISSUTEQARPUT
Sermitsiamut allakkatigut akissuteqarlutik Kommune Kujallermiit aamma Isumaginninnermut Aqutsisoqarfimmiit inunnik isumaginninnermik suliassaqarfimmi sulisussarsiornermik atorfeqareersullu pikkorissut suliinnarnissaannut unammillernartoqarnera nassuerutigaat, ingammik illoqarfinni minnermi. Sullissisulli pisariaqartitaminnik tapersersorneqartannginnerat ilumuunnginnerarlugu, tapersersoqatigiinnik siammasissunik pilersitsisoqarsimanera oqaatigaat, sullissisut kisimiillutik suliaqartannginnissaat taakku qulakkiigassaasa ilagaat.
- Taanna ilaatigut ilisarititsinermik, sanileriilluni ilinniartitsinermik suliat pillugit ataatsimiinnermik aamma siunnersorteqarnermik ilaqassaaq.
Taakkuli aamma tikkuarpaat napparsimaneq aamma atorfiit inuttaqanngitsut peqqutaallutik ilinniartitsineq piffissap ilaani pilersaarutit malillugit ingerlanneqarsinnaassanngitsoq.
Kommunip aamma Isumaginninnermik Aqutsisoqarfiup erseqqissarpaat Kommune Kujallermi sullissisut arlalitsigut suliamut tunngasumik oqaloqateqarnissamut periarfissaqarmata.
- Maanna iliuuserineqartunut ilanngullugu Isumaginninnermik Aqutsisoqarfik Kommune Kujallermi misilttagartuunik, aamma kalaallisut oqaasilinnik, suliassaqarfimmik sulisunik inissiivoq, taakku ingerlatsivik aamma Isumaginninnermut Aqutsisoqarfimmi siunnersortit aqutsisullu qanimut suleqatigaat.
PIsortaqarfiit naggataagut allapput, “tunngaviusumik isiginiagassaasoq aalajangigassat oqimaatsut susassaqarfiup tunngavii inatsisillu tungavigalugit illersorneqarsinnaasumik aalajangerneqartassasut”. Taamaammallu suliat immikkuullarissut aqutsisunut imaluunniit ataatsimiititalianut susassaqartunut saqqummiunneqartartut, sullissisut ataasiakkaat aalajangernerni ilungersunartuni kisimiillutik akisussaaffeqannginniassammata, allapput.
- Tamatuma saniatigut susassaqarfiup ineriartortittuarnissaa sulissutigaarput, Kommune Kujallermit aamma Isumaginninnermut Aqutsisoqarfimmiit naggataarutaasumik oqaaseqaammi allassimavoq.
Inuit meeqqanut tunngasunik suliani inuit inuunerannut tunngasuni aalajangigassaqarlutik akisussaaffeqartut, illersorneqarsinnaasumik ilinniartinneqarnissaat kommunimi aamma Isuginninnermut Aqutsisoqarfimmi aqutsisunit naammattumik iliuuseqarfigineqannginnera misigisimallugu Ivalo Knudsenip pisut kingorna eqqarsaatigaa.
- Suliffiinnaanngilaq. Inuit inuunerat akisussaaffigineqarpoq, taanna oqarpoq.
Taamatut sulinermut ikiuussinnaasimannginnini erloqinarnerarpaa.
- Ilinniartilluarniarlunga neriorsorpaannga, namminerlu suliaqalinnginninni iperarniarnanga, teologitullu ilinniagaqarnera tulluartuunngitsutut tunngavilersuutigalugu suliunnaarsinneqarnera eqqumeeqaaq.
Kingumut eqqarsaruit, ilimagaajuk eqqortumik ilinniartinneqarsimagaluaruit taava nuannarisimassagaluarpiuk?
- Ilimagaara. Qularnaatsumik oqaatigisinnaanngikkarluarlugu ilimagaara. Taamaattoqarsimasuuppat taama amerlatigisunik erloqinartoqarsimassanngikkaluarpoq, taanna akivoq.
Sullissisunik nutaamik naammaginanngitsumik ilinniartitsineq allaaserisamik uani saqqummiunneqartoq Kommune Kujallermut, Isumaginninnermut Aqutsisoqarfimmut aamma Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisoqarfimmut Sermitsiamiit ingertaleqqipparput. Ivalo Knudsenip saaffiginnissutai ilitsersuunneqannginnerminillu ernumassutai sooq siusinnerusukkut iliuuseqarfigineqarsimannginnersut ilaatigut apeqqutigaarput.
Isumaginninnermik Aqutsisoqarfik aamma Kommune Kujalleq ataatsimoorussamik isornartorsiuinermut akissuteqarput. Nipangiussisussaatitaanerminnut innersuussipput inuillu ataasiakkaat pillugit paasissutissanut malittarisassanut innersuussillutik, taamaammallu Ivalo Knudsenip atorfinitsinneqarneranut tunngasoq oqaaseqarfigiumanagu. Akissuteqaalli ataatsimut isigalugu akissuteqaataasoq paasissutissatut allatami atuarneqarsinnaavoq.
Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisoqarfik Isumaginninnermut Aqutsisoqarfiup akissuteqaataanut innersuussivoq.
