Qinigaaffiup qiteqqunnerani qinersinermi inerniliunneqartoq Ruslandimut ersarissumik nalunaarutaassasoq, Kallasip neriuutigaa

USA-mi qinigaaffiup qiteqqunnerani qinersineq Europa Ukrainemut kisimiigani illersuisuusoq, Ruslandimut ersarissumik oqariartuutaasinnaavoq.

Taama isumaqarpoq EU-p nunanut allanut tunngasunut pisortaa Kaja Kallas.

- Neriuppunga USA-mi kongressimi senatimilu ilaasortanngortut Ukraine tapersersorumaaraat Ruslandimullu annerusumik tatisiumaartut.

- Europa USA-lu ataatsimoorlutik nukittunerupput. Tamanna Ruslandimut nalunaarutigerusupparput. Ruslandip sorsunneq unitsittariaqarpaa, Kaja Kallas oqarpoq.

Demokraatit Kongressip ataatsimiittarfissuini marluni amerlanerussuteqalerlutillu ajugaarujussuartut, ersarippoq.

Inatsisartuni aappaanni (House of Representatives aaqq.) amerlanerussuteqarneq ukiuni 20-ngajanni aattaat taama, partiimut tassunga annertutigaaq.

Repuplikanerit naalagaaffinni qinigaaffiginerpaasartaagaanni ukiuni qulikkuutaani arlalinni maanna Demokratit, mumisitsipput. Qinersisartut præsidenti Donald Trump ukiunilu marlunni kingullerni Republikanerit, naalakkersuisuunerat ajorsartippaat.

Reuters naapertorlugu qinersisartut kristumiuunerartut tapersersortaanniittut Trumpimik præsidentinngortitsinissamik ukiut marluk matuma siorna isumalluartut Iranimi sorsunneq pissutaalluni, inuuniarnerullu akisunerulernera, Trumpillu siulersuinera pakatsissutigalugu, Demokraatinut saqipput.

Ukrainemi sorsunneq qinersisartut pingaarnerpaatinngikkaluaraat, Demokraatit Trumpimit Ukrainemik tapersersuinissamut piumassuseqarnerunerat ilisimaneqarpoq.

- Takussavarput qanoq pisoqarumaarnersoq. Qinersinermili inernerit kinguuneqartarput, Kaja Kallas oqarpoq.

Aamma EU-p kommissioniani Bruxellesimi USA-mit Ukrainemillu siunnersortitut qaffasissumik atorfillit Tysklandimit, Tuluit Nunaannit, Frankrigimit, Natomit Verdensbankenimillu aallartitat pingasunngornermi ataatsimiipput.

Ataatsimiinnermi Ukrainep Ruslandillu aallartitaasa Abu Dhabimi ataatsimiinnissaat sapaatip-akunnerata tulliani pisussaq USA-mit aaqqissuunneqartoq, piareersaatigineqarpoq.

Aamma tamatumani EU Ukrainemik isumaqatiginninniarnermi ikiuutissaaq.

- Ataatsimiinnermi ilimagaara siunnersortitut qaffasissumik atorfillit EU-mi nunanut allanut ministerit Europap Ruslandimut piumasaqaatai pillugit innersuussutaat malinneqassasut.

- Isumaqatiginninniarnerni Ukrainep qanoq tunniussaqarnissaa kisiat maannamut sammineqarsimavoq, taamaattumik nunanut allanut ministerit peqatigalugit isumaqatigiinniarnerit oqimaaqatigiissarisinnaajumallugit piumasaqaatit annerpaartaat piareersarsimavavut.

- Ruslandimmi piumasaqaatini qaffasinnerpaaffiat aalajangiusimajuarpaa, taamaattumik isumaqatigiinniarnerni aamma uagut taamaaliortariaqarpugut. Taamaattumik isumaqatiginninniarnitsinni taakkua isiginnittaasaat assigalugu isiginnittaaseqartariaqarpugut, Kallas oqarpoq.

RITZAU