Angut 25-nik ukiulik Upernavimmi ujaarineqarpoq

Kalaallit Nunaanni Politiit angummik 25-nik ukiulimmik ujaasillutik maanna aallartipput. ANgut sapaatip akunnerata naanerani maqaasineqartutut nalunaarutigineqarsimavoq.

Angut 25-nik ukiulik Upernavimmi maqaasineqartoq nalunaarutigineqarpoq, taanna kingullermik takuneqarpoq tallimanngornermi aggustip 30-ani.

- Ilaqutaasut ernumallutik maqaasisaqarlutik nalunaarput. Angut 25-nik ukiulik Upernavimmi festivalimi tallimanngornermi peqataasimavoq. Festivalimiilli ingerlammat takuneqaqqissimanngilaq. Ujaasinermi malinnaavigisinnaasagut ikittuinnaapput taakkulu maanna paasiniaaffigaagut, Kalaallit Nunaanni Politiini pigaartut pisortaat, Jeppe Andsager Sermitsiamut oqaluttuarpoq.

Misissugassat amerlanngitsut

Kalaallit Nunaanni Politiit ilisarisimannittunik maanna apersuillutik ingerlatsipput, angutillu oqarasuaataa aamma sumiissusersiniarneqarluni. Ujaasinerli suli kinguneqarsimanngilaq.

- Malinnaavigeriarsinnaasagut ikittuinnaapput, misissorpagulli. Angutip sumiinneranik ilisimasaqarsinnaasut politiinut saaffiginneqquneqarput, Jeppe Andsager oqarpoq.

Angutip maqaasineqartup sumiissinnaaneranik ilisimannittut politiinut, oqarasuaat  70 1448-mut, saaffiginneqquneqarput.

Nutartigaq: Angut taanna aamma aggustip 31-anni ullup-qeqqata missaani takuneqarsimasoq ataasinngormat ullaakkut politiit nalunaarput. Suli nassaarineqarsimanngimmat ataasinngornermi ullaakkut ujaasineq nanginneqarpoq.