Angut aallaasersortoq ulluni 25-ni tigummigallarneqarpoq
Angut 20-t sinnerlugit ukiulik sapaatiummat Sermersuup Eqqartuussiviani sassartinneqarpoq, Kuummiunilu aallaasersortoqarneranut atatillugu tigummigallarneqarnissaa eqqartuussiviup aalajangerpaa.
Angut 20-t sinnerlugit ukiulik tigusarineqarpoq ullunilu 25-ni tigummigallarneqassalluni. Arfininngormat nunaqarfimmi Kuummiuni aallaasersortoqarneranik Kalaallit Nunaanni Politiit nalunaarfigineqarput.
Leiff Josefsen
Tasiilap eqqaani nunaqarfimmi Kuummiuni aallaasersortoqarneranik politiit misissuineranni, angut 20-t sinnerlugit ukiulik maanna ulluni 25-ni tigummigallarneqarpoq.
Kalaallit Nunaanni Politiini pigaartut pisortaata Anette Ostenfeldtip, tamanna Sermitsiamut uppernarsarpaa.
- Kuummiuni nunaqarfimmi silami tallimariarluni igittoqarsimavoq. Angut ataaseq arfininngormat tigusarineqarpoq, sapaatiummallu eqqartuussivimmut sassartinneqarluni. Aallaasersortoqarnerani eqqortittoqarsimananilu ajoqusertoqarsimanngitsoq oqarsinnaavunga, pigaartut pisortaat Anette Ostenfeldt oqarpoq.
Kommunefogedi ingerlaannaq orniguppoq
Politiit suliamik misissuileruttortut, politiit pisortaat oqarpoq. Arfininngormat ualikkut nalunaaqutaq 15.12 aallaasersorneq politiinut nalunaarutigineqarpoq, tamatumalu kingorna politiit nunaqarfimmut ornigupput.
- Suliami tamatumani kommunefogedi suleqatigilluarsimallugu oqarsinnaavunga. Suliamik naammassinnilluarsimapput, Anette Ostenfeldt oqarpoq.