ULLORMUT NALUNAARUSIAQ
Angut hashimik anngiortumik eqqussisutut tigusarineqartoq
Ilanngaaserisut Danmarkimiit Nuummut tikittoq hashimik 200 grammit missaanniittumik nassatalik paasigamikkut, politiit Nuup mittarfiannukaqquaat. Ataasinngornerup unnukkuani tamanna pivoq.
Foto: Oscar Scott Carl
Nuummi mittarfimmi angalasoq hashimik nassatalik paasineqartoq Kalaallit Nunaanni Politiit ataasinngornermi unnukkut qulingiluat missaanni nalunaarfigineqarput.
Angut tigusarineqarpoq ikiaroornartumillu hashimik 200 grammit missaanik anngiortumik eqqussisimasutut unnerluutigineqarluni, pigaartut pisortaat Jørgen Madsen oqarpoq.
Angut iperagaaqqippoq, qularnanngitsumillu akiligassinneqassalluni.
Nuummi biilinik malersuineq
Nuummi politiit biilit tillinneqarsimasut pillugit nalunaarfigineqareersullu biilit malersorneqalerput.
Illoqarfimmi politiit biilii nipiliortitsillutik malersuiereersullu biilit tillitat unitsinneqarput, paasineqarporlu inuit arfineq-pingasut ilaasuusut.
Taakku tamarmik 18-it inorlugit ukioqarput, pigaartut pisortaat oqarpoq.
Taakku arfineq-pingasut tamarmik tigusarineqarput politeeqarfimmukaallugillu killisiorneqarlutik. Tillinniarsimasutut allatigullu pinerluttuliortutut unnerluutigineqarput maannalu iperagaareerlutik.
Pisumit kalluarneqartut ujartorneqartut
Biilinik malersuinermi illoqarfiup iluani sukkasuumik ingerlaartoqartoq Jørgen Madsenip aamma oqaatigaa.
- Taamaattumik malersuinermi innuttaasut eqqortikkumanatik qimaariartariaqarsimasut tusarfigerusuppagut, pigaartut pisortaat oqarpoq. ?Politiit oqarasuaammut 70 14 48-mut sianerfigineqarsinnaapput.
Unnuaq ulapaarfiusoq pigaartut pisortaata aamma oqaatigaa. Nuummi sinerissamilu aningaasarsisoqarnera pissutigalugu imigassartorsimanermut tunngasunik pisoqartarsimavoq.
