Angut sakkortuumik unnerluutigineqarnermini pinngitsuutinneqartoq
Angut 19-inik ukiulik toqumik kinguneqartumik nakuusersimasutut ukiuni sisamani affarmilu pineqaatissinneqarsimasunut inissiisarfimmiittussanngortinneqarpoq. Angulli pinngitsaaliillunili arnerisimasutut niviarsiaqqamillu 15-it inorlugit ukiulimmik pinngitsaaliisimasutut unnerluutigineqarnermigut pinngitsuutinneqarpoq.
Toqqorsivimmit assiliisoq: Leiff Josefsen
Angutip 19-inik ukiullip ukiuni qulingiluani pineqaatissinneqarsimasunut inissiisarfimmiittussanngortinneqarnissaa unnerluussisussaatitaasup piumasaraa, Qaasuitsulli Eqqartuussiviani sisamanngornermi pineqaatissiissut ukiunik sisamanik affarmillu sivisussuseqarpoq.
Unnerluussisussaatitaasoq Cecilie Stürup Sørensen Sermitsiamut oqarpoq.
19-inik ukiulik sapaatip-akunnerani matumani ulluni arlalinni eqqartuunneqarpoq. Angut 19-inik ukiulik Aasianni siorna juulimi angummik 22-nik ukiulimmik savimmik kapisisimasutut toqutsisimasutullu unnerluutigineqarpoq.
Angut 22-nik ukiulik savimmik kapineqarnermini aanaarnini toqqutigaa.
19-inik ukiulik toqunneqartumut sioorasaarisimasutut aamma unnerluutigineqarpoq.
Nakuusernermi toqumik kinguneqartumi pisuutinneqartoq
Unnerluussisussaatitaasoq naapertorlugu 19-inik ukiullip 22-nik ukiulimmik toqutsinissaminik siunertaqarsimaneranut naammattumik uppernarsaatissaqartoqanngitsoq eqqartuussiviup nalilerpaa.
Taamaattumik 19-inik ukiulik nakuusersimasutut toqumik kinguneqartumik taavalu sioorasaarisimasutut pineqaatissinneqarpoq. Sioorasaarisimasutut toqutsisimasutullu eqqartuunneqarani. Taamaattumik unnerluutigineqartoq toqutaasumut unataasimasutut, savimmik qungasianut tigumminnittutut kapisisutullu pisuutinneqarpoq.
Nakuuserneq toqumik kinguneqartoq ukiuni 3,5-ini pineqaatissinneqarsimasunut inissiisarfimmiittussassanngortitsissutaavoq, eqqartuussivilli pissutsit ilungersunarnerusorigamigit ukiuni 4,5-ini pineqaatissinneqartunut inissiisarfimmiittussassanngortitsisoq Cecilie Stürup Sørensen nassuiaavoq.
Aammattaaq ilaquttaminik 15-it inorlugit ukiulimmik pinngitsaaliisimasutut unnerluutigineqarnermigut pinngitsuutinneqarpoq. Unnerluunneqartoq pisumi tassani pinngitsuutinneqarpoq.
Eqqartuussut tusaatissatut tiguneqartoq
19-inik ukiulik niviarsiaqqamik 15-it inorlugit ukiulimmik pinngitsaaliisimasutut unnerluutigineqarnermini pinngitsuutinneqarpoq.
Unnerluutigineqartoq eqqartuussivimmi nassuiaavoq niviarsiaraq 15-it inorlugit ukioqartoq nalusimallugu.
- Eqqartuussut tusaatissatut tiguneqarpoq. Pisimasut ilisimannittullu nassuiaataat eqqarsaatigalugit eqqartuussisut isummerput unnerluussut naapertorlugu eqqartuunneqassanngitsoq.
- Eqqartuussut takkuppat atuariarlugu qanoq iliorniarnerluta nalilissavarput, Cecilie Stürup Sørensen oqarpoq.
Unnerluussisoq illersuisorlu eqqartuussut suliareqqitassanngortissanerlugu ullut 14-it ingerlaneranni eqqarsaatigeqqissaarsinnaavaat.
