Angut unnuup ingerlanerani marloriarluni tigusarineqartoq
Angut nakuusertoq politiinit pingasunngornerup unnuaani tigusarineqarpoq, killisiorneqareerlunilu iperagaareeraluartoq politiit tigusaaqqittariaqarsimavaat.
Assi: Oscar Scott Carl
Angut 40-t sinnerlugit ukiulik nalunaaquttap akunneri arlaqanngitsut ingerlaneranni marloriarluni Kalaallit Nunaanni Politiinit tigusarineqarpoq.
Politiit Nuussuarmi angerlarsimaffimmi nakuusertoqartoq nal. 01.21 nalunaarfigineqartut, pigaartut pisortaat Aputsiaq Hansen oqarpoq.
Inuk persuttarneqarsimavoq politiillu pinerlussimasutut pasisaq ornigullutik tigusaraat. Angut 40-t sinnerlugit ukiulik tigusarineqartuuvoq, taannalu piffissap sivikitsup ingerlanerani siullermeerlugu tigusarineqartoq paasinarsivoq.
Tamatuma kingorna angut iperagaaneranit piffissaq sivitsunngitsoq qaangiuttoq politiit Nuussuarmiit nalunaarfigineqaqqikkami sumiiffimmut orniguteqqipput.
Angerlarsimaffimmut ujaqqamik milloortoq
Nuussuarmi angerlarsimaffimmut, siusinnerusukkut pisoqarfiusumi, nakuusertutut pasineqartoq ujaqqanik miilloortoq nalunaarutigineqarpoq. Angullu pinerluuteqarsimasutut pasineqartoq tigusarineqaqqippoq.
Angut sisamanngornerup ullaavani suli tigummigallarneqartoq, poolitiit najugakkami aserorterneqarsimanersoq misissoraat, Aputsiaq Hansenip oqaatigaa.
- Iperagaassanersoq eqqartuussivimmulluunniit sassartinneqartassanersoq kingusinnerusukkut nalilissavarput, Aputsiaq Hansen oqarpoq.
Sumiiffimmi pisariaqanngitsumik toqqissisimanngittoqalernissaa pinaveersaartinniarlugu pinerlineqartoq nakuusersimasutullu pasineqartoq qanigisariittut pigaartut pisortaata paasissutissiissutigaa. Tassalu piaarinaatsoornerinnakkut pisoq pinngitsoq.
