PAUL WATSON
Aniguisinnaavoq imaluunniit tigummigallagaanera sivitsorneqarsinnaavoq
Paul Watson, avatangiisinut illersuiniaqatigiiffinnik Greenpeacemik aamma Sea Shepherdimik pilersitseqataanikuusoq Nuummi juulip 21-iani tigusarineqarpoq. Tigummigallagaanerata killissaa tassaavoq sisamanngorneq aggustip 15-iat.
Sisamanngornermi Nuup eqqartuussiviani aalajangerneqassaaq, Paul Watson suli sapaatip akunnerini sisamani tigummineqassanersoq, imaluunniit aniguisinneqassanersoq. Sermitsiamit sulissutigaarput paasisaqarfiginiarlugu, Japanimiit saaffiginnissutigineqartumik Watson Japanimut tunniunneqarnissaanut tunngatillugu Danmarkip naalakkersuisui qanoq isummernersut.
Assiliisoq: Sea Shepherd France
Atsiornernik katersineq avatangiisinut illersuiniartartoq oqallissutaasaqisoq aniguisinneqassasoq piumasaqaatigineqarluni maanna ingerlanneqaleruttorpoq. Allaaserisap allanneqarnerani inuit 60.000-it atsioreerput iperagaanissaanik piumasaqaateqarlutik.
JAPANIMIUT NOQQAASSUTAAT
Folketingimi ilaasortaq Søren Egge Rasmussen (EL) § 20 najoqqutaralugu Inatsisit atuutsinneqarnerannut ministerimut Peter Hummelgaardimut apeqquteqarpoq Paul Watson-ip Japanimut tunniunneqannginnissaanik kaammattuutit danskit naalakkersuisuisa tusaaniassaneraat.
Ministerip akissummini 2. august ullulerneqarsimasumi suliap ingerlanneqarnissaanut tunngatillugu imatut erseqqissaateqarpoq:
- Inatsisit atuutsinneqarnerannut ministeriaqarfik ulloq 31. juli 2024 Japanimit pisortatigoortumik noqqaassutigineqarpoq pineqartoq Japanimut tunniunneqassasoq, taamaattorli noqqaassutip pappialartai akuerineqarsimasut utaqqineqarput.
- Paasissutissat pigeriikkat tunngavigalugit inatsisit atuutsinneqarnerannut ministeriaqarfiup tunniussinissamik noqqaassut siumoortumik itigartereersimassanngippagu, suliaq Kalaallit Nunaanni Politiinut tunniunneqassaaq siunertarineqarluni paasissutissanik sukumiinerusunik pissarsiniarnissaq.
- Justitsministeriap paasissutissat pissarsiarereerpagit, tassa Kalaallit Nunaanniit tunniussisarnermut inatsisit naapertorlugit suliap ingerlanneqarneranut tunngasut tunniunneqareerpata, taava tassanngaaniit inatsisit atuutsinneqarnerannut ministeriaqarfik suliap qanoq ingerlateqqinneqarnissaa pillugu aalajangiissaaq, tassanilu inatsisit malillugit tunniussisoqarnissaanik noqqaassummi piumasaqaatit naammassineqarsimanersut nalilerneqassalluni.
Tusarfik: Folketinngi
Atsiornernik katersinerup peqatigitillugu aningaasarpassuit tapersersuisunit Paul Watsonip kattuffianut nakkaatinneqarput, kattuffik taanna tamaviaarpoq Watson aniguitinniarlugu.
Atsiornerit katersukkat Ministeriunermut Mette Frederiksenimut tunniunneqassamaarput. Kisianni aningaasarpassuit katersorneqartut Watsonip aniguisinneqarnissaanut qanoq ikiuutaasinnaanerat pillugu nalunaarutigineqanngilaq.
Qanorluunniilli aningaasat qanoq amerlatigisut Watsonimut katersorneqartaraluarpata, Kommuneqarfik Sermersuumi eqqartuussiviup aalajangiiffigisassarivaa, pineqartup tigummigallagaanera sapaatip akunnerinik sisamanik sivitsorneqassanersoq.
Tamanna pissaaq sisamanngornermi aggustip 15-ani, tassani Nuummi Kredsrettimi aalajangerneqassaaq Watson aniguisinneqassanersoq imaluunniit anstaltimiinnera sivitsorneqassanersoq.
Kalaallit Nunaanni Politiit siusinnerusukkut nalunaarutiginikuuaat, eqqartuussivimmi suliaq pineqartoq tassaanngitsoq Japanimut tunniunneqassanersoq tunniunneqassannginnersorluunniit.
Danmarkimi naalakkersuisunit suli malunnartumik takussutissaqanngilaq
Taamaattumik Watson-ip anstaltimiinnera sapaatit akunnerini sisamani sivitsorneqassanersoq imaluunniit tigummigallarneqarnera tunngavissaarutissanersoq Nuummi eqqartuussiviup aalajangiiffigisuussaassavaa.
Sermitsiamit Danmarkimi Justitsministeriaqarfik attaveqarfigaarput, Watson-ip tunniunneqarnissaanik piumasaqaatitalik Japanimiut qinnuteqaataat tassani suliarineqarmat.
Suli erseqqissumik oqaatigineqanngilaq Danmarkimi naalakkersuisut Japanimiut qinnuteqaataat malissaneraat malissannginneraalluunniit, qanorluunniilli ikkaluarpat Danskit Naalakkersuisui ullut sisamaanngitsut periarfissaqarput eqqartuussineq sioqqullugu qanoq iliortoqarnissaanik aalajangernissaminnut.
